एसईईमा छात्रा बढी
धनकुटा — धनकुटमा एसईई परीक्षामा छात्रभन्दा छात्रा बढी सहभागी भएका छन् । यसपालि २ हजार ८ सय २२ परीक्षार्थीमध्ये १ हजार ५ सय १३ छात्रा छन् । १ हजार ३ सय ९ जना छात्र परीक्षामा सामेल भएको शिक्षा समन्वय एकाइले जनाएको छ ।
यसका आधारमा कुल परीक्षार्थीमध्ये छात्राको संख्या २ सय ४ ले बढी छ । पहिलो दिन अंग्रेजी विषयको परीक्षामा जिल्लाभर २९ परीक्षार्थी अनुपस्थित रहेको एकाइ प्रमुख रामबहादुर थापाले बताए ।
दृष्टिविहीन, क्रियापुत्री र अपांग सहभागी
जिल्लामा एक दृष्टिविहिन परीक्षामा सामेल भएका छन् । धनकुटा बोर्डिङ स्कुलका सुदेश राई दृष्टिविहीन हुन् । त्रिवेणी परीक्षा केन्द्रबाट परीक्षा दिइरहेका उनले आफ्नै विद्यालयका ९ कक्षाकी छात्रा समीक्षा भट्टराईको सहयोगमा परीक्षा दिएका हुन् । यसैगरी, एक अपांगता भएका परीक्षार्थी पनि सामेल छन् ।
साँगुरीगढी गाउँपालिकाको सिंहकाली मावि आहालेका सन्दिप राईले सोही विद्यालयका ९ कक्षाका सन्देश राई सहयोगी लेखकको माध्यमले परीक्षा दिइरहेका छन् । उनको दुबै हात चल्दैनन् । उनी ग्रामीण जनता मावि नाम्जे केन्द्रबाट परीक्षामा दिदैछन् । हिले मावि परीक्षा केन्द्रमा एकजना क्रियापुत्रीले परीक्षा दिइरहेका छन् ।
हिले स्थित मनकामना बोर्डिङ स्कुलका दिपेन दर्लामी मगरले आमाको निधन भएपछि क्रियापुत्रीका रूपमा परीक्षा दिएको जनाइएको छ । पहिलो दिन जिल्लाभर शान्तपूर्वक परीक्षा सञ्चालन भएको जनाइएको छ ।
संखुवासभामा १९ अनुपस्थित
संखुवासभा– आइतबारबाट सुरु भएको यो बर्षको एसईई परीक्षामा यो जिल्लामा १९ जना अनुपस्थित भएका छन् । २ हजार ६ सय ३१ जना परीक्षामा सहभागी भएको शिक्षा कार्यालयले जनाएको छ । परीक्षामा छात्रभन्दा छात्राको संख्या बढी सहभागी छन् । १ हजार २ सय ४१ छात्र र १ हजार ३ सय ७४ जना छात्रा सहभागी भए । पुराना १३ र नयाँ ३ जनाले ग्रेड बृद्धिका लागि परीक्षा दिएका छन् । यो जिल्लामा एसईईका लागि १५ वटा परीक्षा केन्द्र तोकिएको छ ।
प्रकाशित : चैत्र ११, २०७५ १०:०८