समयमै पुगे नयाँ पाठ्यपुस्तक

कान्तिपुर संवाददाता

संखुवासभा — प्रदेश १ को दुर्गम पहाडी जिल्लामा नयाँ शैक्षिक सत्र सुरु हुन् अगावै पाठ्यपुस्तक आइसकेका छन् । सामुदायिक विद्यालयका लागि कक्षा ५ देखि १० सम्मको १ हजार ५ सय सेट पुस्तक आइसकेको रुधेस पुस्तक पसलका सञ्चालक रुद्र पोखरेलले बताए । तर कक्षा १ देखि ५ कक्षासम्मका पुस्तक भने आउन बाँकी छ । 

संखुवासभा सदरमुकाममा आइपुगेको नयाँ पुस्तक ग्रामीण क्षेत्रमा पठाउँदै स्थानीय व्यापारी ।तस्बिर : दीपेन्द्र शाक्य/कान्तिपुर

विगतका वर्षहरूमा शैक्षिक सत्र सुरु भएको तीन/चार महिनामा पनि नयाँ पुस्तक विद्यार्थीको हातमा पुग्दैन थियो । समयमा पुस्तक नआउँदा विद्यार्थीहरूको पठनपाठन नै प्रभावित हुने गर्दथ्यो । जिल्ला शिक्षा कार्यालयका अनुसार कक्षा १ देखि ५ सम्म १८ हजार ६ सय ६३ सेट पुस्तक आवश्यक पर्छ ।

कक्षा ६ देखि ८ सम्मलाई ११ हजार ५ सय ८८ तथा कक्षा ९ र १० लाई ५ हजार ६ सय ३५ सेट आवश्यक पर्छ । जिल्लाभरी १० वटा पुस्तक पसललाई ग्रामीण भेगका विद्यालयसम्म पुस्तक पुर्‍याउने जिम्मेवारी दिइएको छ । यहाँ ४ सय ९ वटा विद्यालय छन् । कक्षा १ देखि ८ सम्म ३ सय ९ वटा आधारभूत, ६३ वटा माध्यमिक, ३२ वटा संस्थागत र ५ वटा धार्मिक विद्यालय सञ्चालनमा छन् ।

कडाइका साथ शैक्षिकसत्र अगावै पुस्तक विद्यालयमा पुर्‍याउन शिक्षाले सूचना जारी गरिसकेको शिक्षाका प्रमुख केशब भट्टराईले बताए । विद्यार्थी भर्ना सँगै पुस्तक गाउँगाउँमा पुग्नेमा विश्वस्त छौं उनले भने । सिलिचोङ गाउँपालिका ४ मा रहेको वागीश्वरी आधारभूत विद्यालयका शिक्षक हस्तकर्ण राईलाई समयमा पुस्तक पाउनेमा शंका लागेको छ । दुर्गम र सडक यातायात नपुगेकाले पुस्तक सदरमुकाम आए पनि विगतका वर्षमा ढुवानीले गर्दा ढिला हुने गरेको उनले बताए ।

खाँदबारीमा समयमै पुस्तक आए पनि ग्रामीण क्षेत्रका विद्यालयले जेठतिरमात्र पुस्तक पाउँछन्, उनले भने, खच्चड र भरीयालाई बोकाएर ल्याउँदा समस्या हुने गरेको छ । ‘गएको चैतको दोस्रो सातासम्ममा पुस्तक ग्रामीण भेगमा पुगे विद्यार्थीले पाउने थिए,’ उनले भने, ‘पुस्तक समयमा नपुग्दा पुराना पुस्तकले काम चलाउनु पर्छ ।’ भोटखोला, सिलिचोङ, मकालु गाउँपालिकाको अधिकांस ग्रामीण भेगमा सडकको पहुँच नहुँदा विद्यार्थीले समयमै पुस्तक नपाउने उनले बताए । शिक्षा कार्यालयले कडाइ गरे यी क्षेत्रमा समयमै पुस्तक पुग्ने उनको भनाइ छ ।

प्रकाशित : वैशाख ३, २०७६ १०:४५
ADVERTISEMENT
ADVERTISEMENT
प्रतिक्रिया
पठाउनुहोस्

स्कुल गएकै दिन नयाँ पुस्तक

कान्तिपुर संवाददाता

ताप्लेजुङ — रानी आधारभूत विद्यालयले शैक्षिक सत्र सुरु भएकै दिन विद्यार्थीलाई पाठ्यपुस्तक उपलब्ध गराएको छ । प्रधानाध्यापक प्रेम खतिवडाका अनुसार पहिलोदिन विद्यालय आएका ६२ जनालाई पाठ्यपुस्तक र झोला प्रदान गरिएको हो ।

ताप्लेजुङको रानी आधारभूत विद्यालयका विद्यार्थीहरू किताब पाएपछि ।तस्बिर सौजन्य : रानी आधारभूत विद्यालय

यो विद्यालयले तीन वर्ष यता प्रत्येक वर्षको बैशाख २ गते विद्यार्थीलाइ किताव उपलब्ध गराउँदै आएको छ ।

सदरमुकाम फुङलिङबाट एक दिनको पैदलमा रहेको फक्तालुङ गाउँपालिका ४ इखावुको यो विद्यालयसम्म सडकको पहुँच पुगेको छैन । गाउँपालिकाको केन्द्र तापेथोकसम्म पुगेको छ । खतिवडाका अनुसार सदरमुकामवाट लगिने किताव छिरुवासम्म गाडीमा लगिन्छ र त्यसपछि मान्छेलाइ बोकाएर लगिन्छ ।

‘म परीक्षा सकिनुभन्दा अगाडि नै विद्यालयमा किताव पुर्‍याइसक्छु,’ प्रधानाध्यापक खतिवडाले भने, ‘रिजल्ट हुँदा पुस्तक झोलाको बन्दोबस्त मिलाएर केही दिनका लागि स्कुल बन्द हुन्छ ।’ स्टेशनरी व्यवसायी संघका अनुसार खतिवडा सबैभन्दा पहिला पुस्तक खरिद गर्नेमा पर्छन् ।

गाउँपालिकाले पहिल्यै किताव खरिदको निकासा दिने गरेको छ । यदि ढिला भएको खण्डमा विद्यालयको स्रोतबाट खरिद गर्ने तयारी गर्ने खतिवडा बताउँछन् । पछि आउने निश्चित भएकाले विद्यालयको पैसा लगाइराख्ने र पछि भरपुर गर्ने तयारी पनि गर्ने गरेको खतिवडाले बताए । यो गाउँपालिकामा नमुना बिद्यालयको रूपमा पटकपटक पुरस्कृत भएको विद्यालय हो ।

व्यवसायीले सामुदायिक विद्यालयको पुस्तक फागुनमै ल्याउने गरेका छन् । स्टेशनरी व्यवसायी संघका अध्यक्ष दिनेश भट्टराई चैतको पहिलो सातादेखि बिक्री खुला गर्नेगरेको र यो वर्ष पनि त्यसरी नै बिक्री खुलाइएको बताउँछन् । किताव आएकाले समयमै सम्पर्क गर्नुहुन भनेर स्थानीय सञ्चार माध्यमबाट सूचना पनि दिने गरेको उनले बताए ।

भट्टराईका अनुसार यहाँबाट लैजाने अधिकांस विद्यालयले बुकिङ गराएका छन् । तर सबैले गोदामबाट लगिसकेका भने छैनन् । सदरमुकाम भित्रैका विद्यालय पनि सवैले लगिनसकेको उनले बताए । २ गतेसम्म १ सय २६ वटा विद्यालयले बुकिङ गरिसकेका छन् । बुकिङ गरेकामध्ये ७५ प्रतिशतले लगेका छन् ।

२५ प्रतिशतको गोदाममै रहेको छ । २८ वटा माध्यमिक विद्यालयले अर्डर गरेका छन् । तेह्रथुम, संखुवासभा र पाँचथरसँग सिमाना जोडिएको जिल्लाका सीमावर्ती गाउँका विद्यालयले छिमेकी जिल्लाबाट पनि खरिद गर्ने गरेका छन् । सदरमुकामका व्यवसायिले भने संयुक्त रूपमा बिक्री गर्दै आएका छन् ।

ताप्लेजुङमा ३ सय १७ वटा विद्यालय रहेका छन् । नगरपालिका तथा गाउँपालिकाले शैक्षिक सत्र सुरु हुनुभन्दा अघि ७५ प्रतिशत रकम दिने गरेको छ । २५ प्रतिशत खरिद र वितरणपछि गाउँपालिकालाई विवरण बुझाएर भुक्तानी लिन सकिने व्यवस्था रहेको छ ।

प्रकाशित : वैशाख ३, २०७६ १०:४५
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT