सम्भावनाको केन्द्र बन्दै दोभान बजार

आनन्द गौतम

ताप्लेजुङ — सडक सञ्जाल जोडिएसँगै फुङलिङ नगरपालिका २ को दोभान बजारमा चहलपहल वढेको छ । यो बजार तीनवटा सडकले जोडिएको एकमात्र केन्द्र बन्न पुगेको छ ।

ताप्लेजुङको दोभान बजार ।तस्बिर : आनन्द/कान्तिपुर

तमोर करिडोर, इटहरी, धरान, धनकुटा, वसन्तपुर गुफा बजार हुँदै ताप्लेजुङ जोड्ने मदन भण्डारी राजमार्ग र चीनको तिब्बतबाट जोडिने उत्तर–दक्षिण लोकमार्गको केन्द्रविन्दु बनेसँगै यहाँको व्यापार–व्यवसाय पनि बढेको छ ।

Citizen

‘तीनैवटा सडक भएर आउने यहाँ जोडिएपछि मात्रै गन्तव्यतर्फ लाग्न सक्छन्, त्यसैले पनि अहिले दोभान वजारको महत्व बड्यो,’ दोभान नजिकै घरभएका पत्रकार सिताराम गुरगाइले भने, ‘यहाँको जग्गा खोज्न अहिले तराईदेखिका मान्छे आउन थालेका छन् ।’ फुङलिङ नगरपालिका २ का वडाध्यक्ष मोहन न्यौपाने यो बजार पर्यटकीय गन्तव्य बन्न सक्ने सम्भावना रहेको बताउँछन् । तमोर नदीबाट र्‍याफटिङ गर्न प्रत्येक वर्ष विदेशी तथा स्वदेशी आउने गरेका छन् । यहाँबाट सुरु गर्नेहरू धनकुटाको लेगुवाघाट हुँदै सुनसरी निस्कन्छन् ।

जिल्ला समन्वय समितिका पूर्व योजना अधिकृत मनमणि काफ्ले यो क्षेत्रको थप विकासका लागि योजना बनाएर लाग्नुपर्ने बताउँछन् । ‘अहिले पूर्वका नौ जिल्लाको चक्रपथ बनेको छ,’ उनले भने, ‘यसलाई उपयोग र विकास गर्ने कुरामा स्थानीयवासी र सरकार लाग्नु जरुरी छ ।’ जमिन भएकाले जग्गा बिक्री नै गर्दिनँ भने पनि विकास सम्भव नभएको काफ्ले बताउँछन् । यसका लागि समयमै विस्तृत योजना बनाउन जरुरी रहेको उनको बुझाइ छ ।

सदरमुकामबाट नजिक, मैवाखोला, मेरिङदेन, आठराई त्रिवेणी र मिक्वाखोला गाउँपालिकाको केन्द्र पनि यही बजार हो । यी चारवटै गाउँपालिकाबाट दोभान बजारभएर मात्रै सदरमुकाम प्रवेशगर्न सकिन्छ ।

दोभान उद्योग वाणिज्य संघका अध्यक्ष चन्द्रप्रसाद पौडेल अहिलेसम्म नभएको तर कस्तो योजना बनाउने भनेर सोच भइरहेको बताउँछन् । उनले बस्तीको संरक्षण गर्ने किसिमको तटबन्ध पनि बन्नुपर्ने बताए । ‘हामीलाई २०७२ जेठ २७ गते रातिको बाढीले दिएको पीडा सेलाएको छैन,’ उनले भने, ‘खोलालाइ दिगो गरी व्यवस्थित गरेर पर्यटकीय योजना बनाउनुपर्छ ।’ मैवाखोलामा आएको बाढीले यहाँको पश्चिमपट्टिको केही भाग कटान गरेको थियो ।

प्रकाशित : वैशाख ८, २०७६ ०९:४०
ADVERTISEMENT
प्रतिक्रिया
पठाउनुहोस्

जस्ता पाता किन्न अनुदान

गाउँलाई खरको छानो मुक्त बनाउन छथर गाउँपालिकाले निःशुल्क जस्तापाता दिँदै 
कान्तिपुर संवाददाता

तेह्रथुम — छथर गाउँपालिकाले खरको छाना मुक्त बनाउने भन्दै महत्त्वाकांक्षी योजना अघि सारेको छ । गापाले खर तथा परालको छाना भएकाहरूलाई जस्ता पाता किन्नका लागि अनुदान दिन थालेको छ ।

‘खरको छानो हटाउने अभियान सुरु गरेका छौं,’ गाउँपालिका अध्यक्ष सन्तवीर लिम्बूले भने, ‘यसका लागि यो वर्ष मात्र २० लाख रुपैयाँ बजेट छुट्याएका छौं ।’

खरको छाना मुक्त अभियान पहिलो चरणमा सुक्खा क्षेत्रका बस्तीबाट सुरु गरिएको उनले बताए । यस्ता बस्ती आगलागीको उच्च जोखिममा समेत रहेकाले खर हटाएर जस्ता पाता लगाउन थालिएको अध्यक्ष लिम्बूले बताए । पहिलो चरणमा ७० परिवारलाई जस्ता पाता वितरण थालिएको छ । जस्ता पाता वितरणको सुरुवात स्थानीयवासी समेत रहेका कानुन मन्त्री भानुभक्त ढकालले गरे ।

मन्त्री ढकालले छथर गाउँपालिका २ हमरजुङकी गीता देवी दमाईलाई जस्ता पाता हस्तान्तरण गरेर खरको छानामुक्त गाउँपालिका अभियानको शुभारम्भ गरेका हुन् । जस्ता पाता वितरण गर्दै मन्त्री ढकालले स्थानीय तहले सुरु गरेको यो अभियानमा रकम अभाव भए केन्द्र सरकारले समेत सहयोग गर्ने वचन दिए ।

विपन्न परिवारलाई वितरणगरिएका जस्ता पाताको रंग नीलो छ । यसअघि नै गाउँपालिकाले सबै घर एकै रंगका बनाउने अभियान सुरु गरेको थियो ।

गाउँपालिकाले गरिब, दलित, अपांग, पिछडिएका समुदायका घरको छानालाई प्राथमिकतामा राखेको छ । घरका छानामा एकै रंगका जस्ताका पाता लगाउँदा गाउँको सौन्दर्य समेत बढ्ने र परबाट हेर्दा धनी रगरिबको अवस्था समेत नछुट्टिने अध्यक्ष लिम्बूले बताए ।

जस्ता पाता खरिदका लागि सम्बन्धित व्यक्तिले एक रुपैयाँ खर्च पनि व्यहोर्नु पर्दैन । मिस्त्री र काठ भने सम्बन्धित व्यक्तिले नै ब्यहोर्नु पर्ने छ । मिस्त्री खर्च र काठपात पनि खरिद गर्न नसक्ने अवस्थाका गरिबलाई भने गापाले दिने भएको छ ।

विपन्न समुदायको आवासलाई सुरक्षित बनाएर गाउँको मुहार फेर्ने अभियानले गाउँलेहरू भने दंग परेका छन् । खरको छानोमुक्त अभियानका लागि अलग्यै कार्यविधि बनाई विपन्न परिवार पहिचान गरेर जस्ता पाता वितरण गरेको जनाएको छ । घर निर्माण गरी छाउनका लागि ठिक्क भए पछि मात्रै वडा कार्यालयमा निवेदन दिएपश्चात् जस्ता
पाता पाइनेछ ।

प्रकाशित : वैशाख ८, २०७६ ०९:४०
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT