‘८० प्रतिशत काम सकियो’

कान्तिपुर संवाददाता

खोटाङ — दिक्तेल रुपाकोट मझुवागढी नगरपालिकाले चालु आर्थिक वर्षको ८० काम सम्पन्न भएको दाबी गरेको छ । करिब ७१ करोड बजेटबाट यतिको काम भएको नगरको भनाइ छ ।

नगरप्रमुख दीपनारायण रिजालका अनुसार वडा ६ नेर्पा, वडा नं–१० पाथेका र वडा ११ खार्मीको बीचमा पर्ने बगरेभन्ज्याङ ताल निर्माणमा ५४ लाख, वडा १४ बुइपास्थित एलम्बर पार्क निर्माणमा ७२ लाख, माटिकोरे कभर्डहल निर्माणमा ७५ लाख, पर्यापर्यटकीय रुपाकोट भ्युटावर निर्माण २७ लाख, साप्सुढाप २६ लाख, दिक्तेल–पाथेका सडक एक करोड ३५ लाख लगानी गरिएको छ ।

यस्तै, दिक्तेल क्याम्पस भवन निर्माण एक करोड ९९ लाख, दिक्तेलबजार सडक बत्ती एक करोड ८२ लाख, बुइपास्थित सीतादेवी मन्दिर ३५ लाख रुपैया“को योजना धमाधम भइरहेका छन् । यसबाहेक दिक्तेल–दुम्ली सडक १७ लाख, अस्पतालचौक–साप्सु खोला सडक २० लाख, दोर्पा निभारे–साप्सुढाप सडक ४५ लाख, कम्पोस्ट मल उत्पादनमा तीन करोड ३२ लाख रुपैयाँको योजना सम्पन्नको तयारीमा पुगेको नगरप्रमुख रिजालले सुनाए । शिक्षा क्षेत्रमा पनि उल्लेख्य काम भएको नगरप्रमुख रिजालको भनाइ छ । उनका अनुसार नगरका सबै माध्यमिकतहका सबै विद्यालयहरूमा इहाजिरी लागू हुनुका साथै पाठ्यपुस्तक अभाव समेत नभएको रिजालको दाबी छ ।

स्वास्थ्य क्षेत्रमा ब्लड बैंक स्थापना, नगरपालिकाको बुइपा र दोर्पामा बर्थिङ सेन्टर, लफ्याङ र पाथेकामा खोपकेन्द्र र औषधीको पर्याप्तता रहेको रिजालले दाबी गरे । कृषि क्षेत्रमा बुइपामा कागती र लिची, विजयखर्क र लफ्याङमा केरा, सोल्मामा किवी, नेर्पा र निर्मलीडाँडामा अलैची, सोल्मामा तरकारी, नेर्पा र जालपामा रेन्बोट्राउट माछा पकेट क्षेत्र बनाउने योजना अनुसार काम भइरहेको नगरप्रमुख रिजालले सुनाए । यसबाहेक सिँचाइका पाँचवटा ठूला योजनाहरू सञ्चालनमा छन् ।

उपप्रमुखसँग महिला कार्यक्रमअन्तर्गत विनियोजित ५० लाख रुपैयाँको बजेटबाट महिला उद्यमशीलता विकासको काम पनि भइरहेको रिजालले सुनाए । सबै योजनाहरू आगामी असारभित्रै सकिने रिजालले दाबी गरे ।

गुणस्तरीयताका लागि निरन्तर अनुगमन भइरहेको समेत रिजालले बताए । ‘समृद्ध नगरपालिका बनाउने रणनीतिका आधारमा गुणस्तरीय काम भइरहेको छ ।’ रिजालले भने–‘यसका लागि नियमित अनुगमन र द्रुतगतिमा काम गर्न निर्देशन गरिएको छ ।’ रिजालले थपे, ‘असारसम्ममा कुनै पनि योजना अपूरो हुने छैन ।’

प्रकाशित : वैशाख १०, २०७६ ०९:३७
प्रतिक्रिया
पठाउनुहोस्

स्काउटमा अनियमितता आरोप

कान्तिपुर संवाददाता

विराटनगर — नेपाल स्काउटको आयोजनामा विराटनगरमा आइतबार सम्पन्न प्रदेश स्तरीय स्काउटको आधारभूत तालिममा अनियमितता भएको भन्दै प्रदेश १ सांसदहरूले छानबिनको माग गरेका छन् । 

प्रदेशसभाको सोमबार बसेको बैठकको शून्य समयमा बोल्दै कांग्रेसका कांग्रेसका प्रुमख सचेतक केदार कार्कीले कार्कीले दुःख र पीडामा उद्धार गर्ने उद्धारकर्मीको रूपमा तालिम दिने नाममा प्रदेशभरका पुराना स्काउटकर्मीलाई पाखा लगाएको र कार्यकर्ता भर्ति गरिएको आरोप लगाए । कार्कीले स्काउटको तालिममा आउने जानेलाई भत्ता दिइएको, पैसाको भरमा सदस्यता वितरण गर्दै दीक्षित गरिएको र उपस्थित सबैलाई लत्ताकपडा बाँडेर करोडौँ रकम दुरुपयोग गरिएको आरोप लगाए ।

‘स्काउटमा तालिम लिन आउनेहरू आफै पैसा तिरेर तालिम लिन आउँछन् तर यो प्रदेशमा अचम्मको खेल भयो अमूक कार्यकर्तालाई बोलाइयो, लुगा बाँडियो,, पैसा बाँडियो,’ उनले भने ‘स्काउटको तालिमको नाममा करोडौं भ्रष्टाचार भएको छ यसको छानबिन गरियोस् ।’

स्काउटको १ नम्बरस्तरीय तालिम ६ दिनसम्म संचालन भएर आइतबार सकिएको थियो । उक्त तालिमको आइतबार संघीय सरकारका युवा तथा खेलकुदमन्त्री जगतबहादुर विश्वकर्माले समापन गरेका थिए । ६ दिनसम्मको तालिममा विद्यार्थी र शिक्षकहरूलाई एकै पटक १९ कोर्षमा तालिम दिएको थियो ।

एक नम्बर प्रदेशबाट सुरु भएको यो तालिम सातै प्रदेशमा हुने स्काउट मोरङका कार्यकारिणी सदस्य नवलप्रसाद उपाध्यायले जानकारी दिए । नेपाल स्काउटका तदर्थ समिति संयोजक लोकबहादुर भण्डारीले सांसदले लगाएको आरोप गलत भएको बताए । विगतमा परिवारमा मात्रै सिमित रहेको स्काउटलाई स्थानीय तहसम्म पुर्‌याउन आफुहरू लाािग परेको केहि तत्वहरूलाइ चित्त नबुझेका कारण यस्तो आरोप लगाइएको उनले दाबी गरे ।

तालिममा करिब १८ लाख खर्च भएको बताउँदै उनले युवार सीमान्तकृत वर्गलाई स्काउटमा आबद्ध गराउने उद्देश्यले तालिमको आयोजना गरिएकाले यातायात खर्च वितरण गरिएको उनले बताए ।

६० हजार सदस्य संख्या रहेको नेपाल स्काउटमा सन् २०२० सम्ममा ३ लाख सदस्य संख्या पु¥याउने उद्देश्यले तालिमको आयोजना गरिएको उनले बताए । तालिममा ३ सय २७ पुरुष र १ सय ९५ जना महिला स्काउटहरूको सहभागिता थियो ।

–विनु तिम्सिना

प्रकाशित : वैशाख १०, २०७६ ०९:३६
पूरा पढ्नुहोस्
प्रतिक्रिया
पठाउनुहोस्