फिदिम-राँके सडकमा अझै पहिरो रोकिएन

ज्ञानु घिमिरे

पाँचथर — बुधबारदेखि अवरुद्ध भएको मेची राजमार्गको फिदिम–राँके सडकखण्ड सञ्चालनमा आउन सकेको  छैन  । लगातारको वर्षाका कारण उक्त सडकखण्डमा पहिरो झर्ने क्रम नरोकिएपछि सवारी आवगमन ठप्पा भएको हो । सडक अवरुद्ध हुँदा यात्रुहरु बीच बाटोमै अलपत्र परेका छन् ।

फाल्गुनन्द–३ को पाग्रेंभीरमा बुधबार बेलुकाबाटै पहिरो खसेपछि सडक अवरुद्ध भएको थियो । बिहीबार पनि पहिरो खसेपछि सडक सञ्चालनमा आउन सकिरहेको छैन । बिहीबार साँझ ५ बजेसम्म पहिरो पन्छाउने काम गरेपनि नसकिएको जिल्ला ट्रफिक प्रहरी कार्यालयले जनाएको छ ।

कार्यालयका प्रमुख जनक तिम्सिनाका अनुसार पहिरो झर्ने क्रम नरोकिएकाले पन्छाउने कामलाई स्थगित गरिएको छ । रातिसम्म पनि पहिरो नरोकिए वैकल्पिक बाटो प्रयोग गरेर भएपनि सवारी आवगमनलाई सुचारु गरिने उनले जानकारी दिए ।

प्रकाशित : श्रावण २, २०७६ १७:४१
प्रतिक्रिया
पठाउनुहोस्

विराटनगरमा प्रदेशस्तरीय कृषि उद्यम केन्द्र स्थापना

कान्तिपुर संवाददाता

विराटनगर — नेपाल उद्योग वाणिज्य महासंघअन्तर्गत प्रदेशस्तरीय कृषि उद्यम केन्द्र स्थापना गरिएको छ । महासंघ अध्यक्ष भवानी राणाले महासंघ प्रदेश १ समितिको सचिवालयमा उक्त केन्द्रको बिहीबार उद्घाटन गरिन् ।

२८ वर्षदेखि नेपाल सरकारसँगको सहकार्यमा कृषि उद्यम केन्द्रले कृषि क्षेत्रमा काम गर्दै आइरहेकामा देश संघीयतामा गइसकेपछि त्यसैअनुसार सातै प्रदेशमा केन्द्र स्थापना गर्न लागिएको राणाले बताइन् । प्रदेश १ को राजधानी विराटनगरको बरगाछीमा स्थापना गरिएको केन्द्र पहिलो भएको उनले बताइन् ।

महासंघ प्रदेश समिति अध्यक्ष नरेन्द्रकुमार खड्काले कृषि क्षेत्रमा व्यावसायिक उत्पादन, प्रशोधन, बजारीकरणका माध्यमबाट रोजगार, स्वरोजगारको संख्या वृद्धि गरी हालको परनिर्भरताको अवस्थालाई आयात प्रतिस्थापनका माध्यमबाट कम गर्दै लैजानुपर्नेमा जोड दिए ।

प्रदेश सरकार, महासंघको प्रदेश समितिबीच सार्वजनिक निजी साझेदारी कार्यक्रम सञ्चालन गर्न गत माघमा आर्थिक मामिला तथा योजना मन्त्री इन्द्र आङ्बो र महासंघ अध्यक्ष राणाबीच समझदारी पत्रमा हस्ताक्षर भएअनुसार कृषि उद्यम केन्द्रको स्थापना गरिएको हो ।

कृषि तथा कृषिजन्य वस्तुहरुसँग सम्बन्धित सबै क्रियाकलापहरु आपूर्ति, उत्पादन, प्रशोधन, पारवहन तथा बजार व्यवस्थापन जस्ता काममा केन्द्रले सघाउने जनाइएको छ ।

प्रकाशित : श्रावण २, २०७६ १७:३५
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT