घाइते मृगको पालन–पोषणमा समस्या

डिभिजन वन कार्यालयको वन्यजन्तु उद्धार गृहमा राखिएको रतुवा मृगको पालन पोषणमा समस्या भएको सहायक वन अधिकृत श्रीनारायण शाहले बताए । काँडे तारमा फसेको अवस्थामा गुल्मका जवानले फेला पारी वन कर्मचारीलाई खबर गरेका थिए ।

लामो समयको प्रयासपछि तार हटाएर उद्धार गरिएको वयस्क भाले मृगको शरीर, टाउको र खुट्टामा गहिरो चोट लागेको छ । उद्धारपछि केही समय डिभिजन वन कार्यालयको वन्यजन्तु उद्धार गृहमा राखेर पशु प्राविधिक समेतको निगरानाीमा उपचार गर्दा पनि घाउ निको नभएको वन कर्मचारीको भनाइ छ ।

मृगको शरीरमा देखिएका चोट निको नभएपछि गाडीमा राखेर धनकुटामा रहेको पशुविज्ञ केन्द्रमा लगेर उपचार गरी ल्याएको डिभिजनल वन अधिकृत सुनिलकुमार सिंहले बताए । शरीर हृष्टपुष्ट अवस्थामा फेला परेको बयस्क भाले रतुवा मृग अहिले दुब्लाएर कमजोर अवस्था पुगेको छ । शरीरमा लागेको चोटपटकको दुखाई र नयाँ बास स्थानका कारण मृगले घाँस पानीसमेत नखाएको सहायक वन अधिकृत शाहले बताए ।