लोकसेवा परीक्षामा साढे १५ हजार सामेल

कान्तिपुर संवाददाता

धनकुटा — लोकसेवा आयोग धनकुटाले सञ्चालन गरेको पाचौं तह (नायब सुब्बा) र खरिदार तहको परीक्षामा १५ हजारभन्दा बढी परीक्षार्थी सामेल भएका छन् । 

नासुका लागि ८ हजार ३ सय ९ र खरिदारका लागि १० हजार ४ सय ९९ ले फारम भरेकोमा दुवैमा औषत ८० प्रतिशत परीक्षार्थीले परीक्षा दिएको आयोग स्रोतले जनाएको छ ।

नासुमा ६ हजार ६ सय ६२ र खरिदारमा ८ हजार ७ सय २१ जना परीक्षामा सामेल भएको लोकसेवा आयोग धनकुटाका उपसचिव पवनकुमार तिमल्सिनाले जानकारी दिए । समावेशी तथा खुला कोटामा धनकुटा र विराटनगरमा परीक्षा सञ्चालन गरिएको थियो । दुवै परीक्षा शनिबार एकै दिन बिहान र दिउँसो सञ्चालन गरिएको छ ।

२० प्रतिशत परीक्षार्थी अनुपस्थित
लोकसेवा आयोगले सञ्चालन गरेको नायब सुब्बा र खरिदार पदका परीक्षामा २० प्रतिशत परीक्षार्थी अनुपस्थित भएका छन् । खरिदार र नासु पदका लागि झन्डै १९ हजारले फारम भरेको मध्ये १५ हजार ३ सय ८३ जनाले मात्र परीक्षा दिएका छन् ।

परीक्षा हुने दिन यातायात बन्दको हल्ला र मौसमको प्रतिकूलताले २० प्रतिशत परीक्षार्थी अनुपस्थित भएको अनुमान आयोग स्रोतको रहेको छ । नासुमा फारम भर्ने मध्ये धनकुटाका विभिन्न २४ केन्द्रबाट ७८ प्रतिशत र विराटनगरका विभिन्न केन्द्रबाट ८१ प्रतिशत परीक्षार्थी सामेल भएको उपसचिव तिमल्सिनाले बताए । यस्तै, खरिदारमा विराटनगरमा ८४ र धनकुटामा ८१ प्रतिशतले
परीक्षा दिए ।

परीक्षाभन्दा बासको सकस
मोरङबाट लोकसेवा आयोगले सञ्चालन गरेको परीक्षा दिन धनकुटा पुगेकी आरती खनाललाई परीक्षा दिनेभन्दा बास बस्ने समस्याले पिरल्यो । विराटनगरमा परीक्षा केन्द्र भए पनि उनले धनकुटा केन्द्रमा परीक्षा दिनुपर्ने भएपछि घरपायकको केन्द्रको रोजाईमा परिनन् । होटल भरिभराउ भएपछि बासस्थान खोजीमा बढी समय दिनुपरेको गुनासो पोखिन् ।

फारम भर्दा परीक्षा केन्द्रको रोजाईको व्यवस्था गरिनुपर्ने उनको तर्क छ । ‘कम्तीमा सुरुमा फारम भर्दाआफ्नो केन्द्र रोज्ने व्यवस्था गरिनुपर्छ,’ उनले भनिन्, ‘व्यावहारिकता तर्फ पनि आयोगको उचित ध्यान जान जरुरी छ ।’ विराटनगरबाट परीक्षा दिन धनकुटा पुगेकी कामना फागोको पनि उस्तै भनाइ छ । होटल नपाएपछि आफन्तको खोजी गर्दै बास बस्नु परेको उनले सुनाइन् । विराटनगरकै राम पौडेलले बास नपाएपछि एउटै कोठामा कोचिएर धेरै जना बस्नु परेको बताए । कतिपय परीक्षार्थी हिले, पाख्रिबाससम्म पनि बासका लागि पुगेका थिए ।

तर, परीक्षार्थीलाई विभिन्न व्यक्ति तथा संस्थाले पनि बस्ने व्यवस्था मिलाएका थिए । धनकुटा बजारबासीले होमस्टेका रूपमा कोठा उपलब्ध गराएको स्थानीय सीता दाहालले बताइन् । अभाव भएकालाई आफ्नै घरको कोठा उपलब्ध गराएको उनले जानकारी दिइन् ।

पत्रकार महासंघका अध्यक्ष राजेश्वर श्रेष्ठले बासको अभाव खेपेका ४० भन्दा बढीलाई बजारका निजी घरमा बासको व्यवस्था मिलाएको बताए । यस्तै, दलित एकता सञ्जालले ४० जनालाई निःशुल्क खाना र बासको व्यवस्थापन गरेको सञ्जालका अध्यक्ष नारायण विश्वकर्माले जानकारी दिए ।

प्रकाशित : श्रावण ६, २०७६ १०:१०
ADVERTISEMENT
प्रतिक्रिया
पठाउनुहोस्
ADVERTISEMENT

निर्माणाधीन सडकमा यात्रुलाई सकस

पानीपर्दा हिलो र सुक्खा हुँदा धुलोले सडक वरपरका बस्ती पीडित
ओमप्रकाश ठाकुर

सर्लाही — पूर्व–पश्चिम राजमार्गदेखि सदरमुकाम मलंगवा जोड्ने मुख्य सडक कालोपत्रे गर्न पटक–पटक म्याद थपिए पनि कालोपत्रेको काम भने सकिएको छैन । 

सडक कालोपत्रे नहुँदा स्थानीयले हिउँदमा धुलो र वर्षामा हिलोले सास्ती खेप्न बाध्य छन् । ठेकेदारले कल्भर्टका लागि खनेको सडकमा सामान्य पानी पर्दा यातायातका साधन फस्ने गरेको छ । यातायातका साधन फस्दा यात्रुलाई सकस हुने गरेको छ ।
पहिलो चरणमा ठेक्का लागेको सडकमा कामै नगरी भारतीय ठेकेदार फरार बनेपछि २०७३ सालमा नेपाल सरकारले पुनः सडक कालोपत्रे गर्न दुई चरणमा ठेक्का लगायो ।

नवलपुरदेखि गैरसम्म र गैरदेखि मलंगवासम्म दुई खण्डमा छुट्टाछुट्टै कम्पनीले निर्माणको जिम्मा लिएका छन् । कालोपत्रेसहित सडक निर्माण सक्ने सम्झौता गत भदौ मसान्तमै सकिसकेको छ । समयमा काम हुन नसकेपछि सम्बद्ध कार्यालयले पुनः मंसिर १५ गतेसम्म म्याद थपेको थियो । दोस्रोपटक थपिएको म्यादमा पनि सडक कालोपत्रे भएन । त्यसयता ठेकेदारले सडकको म्याद थप्दै कछुवा गतिमा काम गर्दै आइरहेको छ ।

ठेकेदारले मंसिरमै तापक्रम नपुगेर छोडेको झण्डै ६ किलोमिटरको कालोपत्रेको काम असार बित्दा समेत पूरा गर्न सकेको छैन । यो समयमा करिब ३ किलोमिटर मात्र एक चरणको कालोपत्रेको काम सकेको छ । बाँकी सडकमा बेस बनाउने समेत काम गर्न सकेको छैन ।

अति व्यस्त सडकमा वर्षाको बेला कल्भर्ट खनेर त्यतिकै छाडेका कारण यातायातका साधन फस्ने गरेका छन् । यातायातका साधन फस्दा यात्रु तथा यातायातका साधनलाई सकस हुने गरेको छ । मलंगवा–नवलपुर सडकमा शनिबार सामान्य पानी पर्दा बाटो नै अवरुद्ध बनेको थियो । सडकमा कल्भर्टका लागि खनिएको खाल्टोमा गाडी फसेका कारण अतिव्यस्त सडक अवरुद्ध बनेको थियो । अवरुद्ध सडकलाई स्थानीय सशस्त्र प्रहरीको सहयोगमा आइतबार बिहान मात्र सडक सञ्चालनमा आएको थियो ।

२०७३ सालमा दुईचरणमा ठेक्का लागेको नवलपुर–मलंगवा २६ किमि सडक अन्तर्गत पहिलो चरणको ठेक्का हिम्दुंङ एन्ड थोकर/हिरा एन्ड नमिता जेभी काठमाडौंले लिएको छ । भण्डै ३ किमि सडकमा ठेकेदारले कामै नगर्दा हिउँदमा सडक छेउछाउका बस्ती नै ढाक्ने गरी धुलो उड्ने गरेको छ भने वर्षाको बेला यात्रु तथा यातायतका साधनले सास्ती खेप्न बाध्य छन् ।

सडकमा काम गर्ने ठेकेदारको लापारबाहीका कारण दैनिक यातायातका साधन फस्ने र आफूहरूले सास्ती खेप्न बाध्य भएको चालकहरूले बताएका छन् । ‘ठेकेदारले ठेक्का कबोल गर्ने तर काम नगर्दा समस्या बल्झिएको छ, ठेकेदारको लापारबाहीका कारण सडक कालोपत्रे हुन सकेको छैन,’ नवलपुर–मलंगवा सडकमा यातायातका साधन चलाउँदै आएका चालक रामबाबु यादवले भने, ‘सडक चाँडो बनाउन दबाब दिन सम्बन्धित निकाय पनि मौन देखिएको छ ।’

यस्तै उक्त सडकको दोस्रो चरणको ठेक्काको पनि पूर्ण रूपमा कालोपत्रेको काम सम्पन्न हुन सकेको छैन । उसले अन्तिम चरणको कालोपत्रेको काम गर्न बाँकी छ । दोस्रो चरणको यो सडक रमण/आश्रय जेभी काठमाडौंले ठेक्का लिएको छ । वर्षाका बेला सडक निर्माणको काम रोक्न भनिए पनि ठेकेदारले कल्भर्टका लागि सडक खनेको जानकारी आएपछि पुर्न लगाएको हुलाकी सडक आयोजनाका प्रमुख राजेन्द्र प्रसाद दासले बताए । उनले वर्षा सक्ने बित्तिकै काम सुरु हुने जानकारी दिए ।

प्रकाशित : श्रावण ६, २०७६ १०:१०
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT