छात्रवृत्ति विवादले विद्यालयमा तालाबन्दी

२ सय ८० रुपैयाँका दरले छात्रवृत्ति दिएर ४ सय रुपैयाँ बुझेको भर्पाइमा दस्तखत गराउन खोजेपछि स्थानीय आन्दोलित भएका हुन् । विद्यालयमा छात्रवृत्ति पाउने विद्यार्थीको संख्या ४ सय ४१ छ ।

प्रधानाध्यापक यादवले जिल्ला शिक्षा कार्यालयको गलतीले छात्रवृत्तिमा विवाद उत्पन्न भएको बताए । ‘विद्यार्थी संख्याका आधारमा बजेट निकासा नहुँदा समस्या भयो,’ उनले भने, ‘थोरै बजेटवाट सबै विद्यार्थीलाई छात्रवृत्ति दिनुपर्ने भएकाले रकम घटाएर दिनुपर्ने भयो ।’ शिक्षा कार्यालयले १ लाख २५ हजार १ सय रुपैयाँ मात्र छात्रवृत्तिका लागि रकम निकासा गरेको छ । त्यो रकम ३ सय १२ जना विद्यार्थीलाई मात्र ४ सय रुपैयाँको दरले पुग्छ ।

पुग्ने विद्यार्थीलाई ४ सयको दरले छात्रवृत्ति दिएको भर्पाइ गराएर ४ सय ४१ जनालाई नै बराबरी भाग लगाउन खोज्दा अनियमितताको आशंकामा विद्यालयमा तालाबन्दी गरिएको प्रधानाध्यापक यादवले बताए ।

‘शिक्षा कार्यालयको नियमअनुसार समान वितरण गर्न पनि नपाइने,’ उनले भने, ‘बजेट अपुग भएर केहीले नपाउँदा पनि विवाद नै हुन्छ । बैठकले कम बजेटबाटै सबैलाई समान भाग लगाउने निर्णय भएको थियो । तर, दलितलाई उचालेर विद्यालयमा तालाबन्दी गराइयो ।’ दलित अगुवाले छात्रवृत्तिको रकम प्रधानाध्यापक शिवशंकर राय यादवले अनियमितता गर्न खोजेको आरोप लगाएका छन् । दलित अगुवा सुधिर पासवानका अनुसार अघिल्लो वर्ष छात्रवृत्तिको रकम बढी आउँदा फिर्ता गएको थियो । ‘यसवर्ष कसरी कम बजेट आयो ?,’ उनले भने, ‘हामीलाई अनियमितताको आशंका छ ।’