मकैमा दाना नै लागेन

कान्तिपुर संवाददाता

पर्सा — पर्सा र बारामा मकै बालीमा दाना नलाग्दा किसान चिन्तित बनेका छन् । पर्साको सखुवा प्रसौनी गाउँपालिका–१ मधुवन मथवलका किसानले लगाएको मकैको घोगामा दाना नलागेको गुनासो गरेका छन् । 

बाराको जितपुर सिमरा उपमहानगरपालिकाको पूर्वी भेगका किसानले पनि मकैमा दाना नलागेको गुनासो गरेका छन् । मधुवन मथवलको औराहा, सिद्धपुर सथवलमा लगाइएको करिब ३ बिघामा खेती गरिएको मकैबालीमा दाना लागेको छैन । बोटमा मकैको घोगा तयार भएजस्तो देखिए पनि भित्र भने एउटै पनि दाना छैन । बाली नै नसप्रेपछि किसानले मकैबाली जोतेर अर्को खेती गर्न थालेको मधुवन मथवलका किसान दिनेश तिमिल्सिनाले जानकारी दिए ।

यता बाराको जितपुर सिमरा उपमहानगरपालिका–११ का किसान परमानन्द चौधरीले केही किसानको मकै बालीमा पनि समस्या देखिएको बताए । बन्नी, ड्रेगन, स्रेस्ता, सिपी ८३८ हाइब्रिड लगाएका मकैमा दाना लागेको छैन । किसानले मकै बालीमा भिटामिन, मल, कीटनाशक औषधिको प्रयोग गरे पनि दाना नलाग्दा हैरान छन् ।

पर्सा र बाराका अधिकांश किसानले बाराको जितपुर बजारका बिउबिजन पसलबाट मकैको बिउ किनेका थिए । क्षेत्रीय कृषि अनुसन्धान केन्द्र परवानीपुरका प्रमुख तथा कृषि वैज्ञानिक तुफेल अख्तरले मकैमा दाना नलागेको अनुसन्धान भइरहेको बताए । लामो समयको शीतलहर चलेकाले पनि मकै बालीमा दाना नलागेको उनको दाबी छ । ‘बालीनालीको उत्पादनमा मौसमको पनि ठूलो प्रभाव हुन्छ,’ उनले भने, ‘मकै बालीलाई शीतलहरले असर गरेको हुन सक्छ ।’

प्रकाशित : फाल्गुन ३०, २०७४ २०:१०
प्रतिक्रिया
पठाउनुहोस्

साउदीमा फसेका कामदारहरूलाई टिकट पठाइदिन ताकेता

कान्तिपुर संवाददाता

काठमाडौँ — साउदी अरवस्थित नेपाली दूतावासले बिचल्लीमा परेका २३ नेपालीलाई उद्धारको लागि टिकटको व्यवस्था गरिदिन वैदेशिक रोजगार विभागसमक्ष अनुरोध गरेको छ । 

७ महिनादेखि बिचल्लीमा परेका ती कामदारलाई स्वदेश पठाउन कम्पनीले एक्जिट भिसा उपलब्ध गराएपछि दूतावासले टिकटका लागि विभागसमक्ष अनुरोध गरेको हो। ती कामदारलाई प्रिन्स इन्टरनेसनल इम्प्लोइमेन्ट सर्भिसले साउदीस्थित इम्प्राटोर सोलुसन कन्ट्रक्टिङ कम्पनीमा पठाएका थिए।

‘कम्पनीका स्पोन्सर सम्पर्कमा थिएनन्। एजेन्ट मात्रै सम्पर्कमा थिए। निकै लामो प्रयासपछि कम्पनीले एक्जिट भिसा लगाइदियो,’ नेपाली दूतावासका उपनियोग प्रमुख आनन्दराज शर्माले भने, ‘टिकटका लागि म्यानपावरसँग समन्वय गरी यथाशीघ्र पठाइदिन अनुरोध गरेका छौं।’
अलपत्र पर्ने अधिकांश कामदार एउटै गाउँका उराव समुदायका छन्। ‘हामीलाई कम्पनीले काम र तलब दुवै दिएन,’ सिराहाका रामजतन कामतीले भने, ‘आएलगत्तै भोलिदेखि काम दिन्छु भन्यो। सात महिना बितिसक्दा पनि केही गरेको छैन।’

अलपत्र पर्नेमा अधिकांश महनौर अर्नामा–१, सिराहाका छन्। जसमा सिराहका कामती, युधिर कामती, रामकुमार उराव, देवकुमार उराव, परमेश्वर उराव, प्रभात कुमार उराव, सन्जु उराव, रञ्जीत उराव, सञ्जयकुमार उराव, नवीनकुमार उराव, सगमलाल उराव र मुनेश्वर उराव छन्।
त्यस्तै भोक्राहा–४ सुनसरीका हेमन्ता उराव, पवन उराव, रामलाल उराव, रञ्जीत उराव, कालो उराव, सन्देव उराव, पुष्पलाल उराव, अशोककुमार उराव, दुहबी–८ सुनसरीका सीताराम उराव, उमेश उराव र रंगेली–२ मोरङका बोवालाल उराव रहेका छन्।

लामो समयसम्म कामविहीन भएर बस्नुपर्दा ऋण भुक्तानी गर्न नपाइरहेको बताए। ‘न त माम खान पाइयो। न त काम। घर फर्कन चाहन्छौं भन्दा पनि कम्पनीले कुनै चासो दिएको छैन,’ सीतारामले भने। पीडितले आफूहरूलाई उद्धार गरिदिन नेपाली दूतावासलाई आग्रह गरिसकेका छन्।
साउदीको श्रम बिभागमा पुग्दा पनि गुनासो सम्बोधन नभएको उनीहरूले बताए। पवन उरावले प्रहरीले आफूहरूलाई चारपटक पक्राउ गर्दै छाडदै गरेको बताए। उनीहरूको साउदीको आवासीय अनुमति कार्ड (भिसा) समेत दिएको छैन।

पीडितलाई खानाका लागि म्यानपावरले ५ हजार रियाल पठाइदिएको छ। मिथिला एकता समाजका महन्थ विन्देश्वर यादवले थप आर्थिक सहयोग जुटाइरहेका छन्।

प्रकाशित : फाल्गुन ३०, २०७४ २०:०५
पूरा पढ्नुहोस्
प्रतिक्रिया
पठाउनुहोस्