आधा बजेट सडकमा

बजेट छरेर रकम सिध्याउनुभन्दा हरेक वर्ष एउटा विषयमा पुग्ने बजेट विनियोजन गर्ने सोचअनुसार यसवर्ष नगरपालिका क्षेत्रभरिकै सडक निर्माणमा बजेटको आधा सडक विनियोजन गरेको नगरपालिकाका मेयर शैलेशकुमार साहले जानकारी दिए ।

आर्थिक वर्षमा हनुमाननगर–कंकालिनी नगरपालिकाले २४ करोड रुपैयाँ विकास कामका लागि विनियोजन गरेको छ । जसमध्ये ११ करोड रुपैयाँ नगरपालिका क्षेत्रभित्रका विभिन्न सडक निर्माणका लागि विनियोजन गरिएको मेयर साहले बताए ।

हनुमाननगर कंकालिनी नगरपालिकाका प्रमुख प्रशासकीय अधिकृत सुरेन्द्रकुमार यादवका अनुसार चालु आर्थिक वर्षमा नगरपालिका क्षेत्रभित्र करिब ८ किलोमिटर सडक पीसीसी कालोपत्रे गर्ने योजना छ । यस्तै, विभिन्न सडकको ८ किलोमिटर क्षेत्रमा मर्मतसम्भार गरिनेछ । यसका अतिरिक्त डंगराहादेखि बेल्हासम्मको नयाँ सडक समेत चालु आर्थिक वर्षभित्रै निर्माण गर्ने लक्ष्यका साथ बजेट विनियोजन गरिएको मेयर यादवले बताए । नयाँ निर्माण हुने सडक र पीसीसी कालोपत्रे हुने सडकको डीपीआर निर्माण गरेर काम अघि बढाइने मेयर साहले बताए । ‘पर्याप्त बजेट विनियोजन गरेका छौं । डीपीआर निर्माण गरेर त्यसका आधारमा सडक निर्माणलाई गति दिइनेछ,’ उनले भने ।

सप्तरीमा क्षेत्रफलको हिसाबले सबैभन्दा ठूलो नगरपालिका रहेको हनुमाननगर–कंकालिनी नगरपालिकाको कुल क्षेत्रफल ११८ दसमलव ६ वर्गकिलोमिटर छ । भारतीय सिमाना कुनौली बोर्डरदेखि कोसी ब्यारेजसम्म फैलिएको यो नगरपालिकाका क्षेत्र जिल्लामा बाढीबाट अति
प्रभावितमा पर्छ ।

वर्षौंदेखि बाढीका कारण नगरपालिकाभित्रको ग्रामीण क्षेत्रका सडकको अवस्था लथालिङ भएकाले यसवर्ष सडक निर्माणलाई उच्च प्राथमिकतामा राखेको साहले बताए । उनले सडकपछि शिक्षालाई आफूले प्राथमिकतामा राखेको बताए । नगरपालिका क्षेत्रभित्रको शैक्षिक सुधारका लागि यसवर्ष डेढ करोड रुपैयाँ विनियोजन भएको छ । यस्तै विद्युत् विस्तारका लागि ४० लाख विनियोजन गरिएको छ ।