आगलागीमा २ घर नष्ट
निजगढ — बाराको महागढीमाई नगरपालिका–१ सिमरातेगछिया टोलमा बिहीबार बिहान भएको अगलागीमा २ वटा घर जलेर नष्ट भएका छन् ।
लामखुट्टे धपाउन बालिएको घुरबाट सल्किएर भएको आगलागीमा परी स्थानीय जोखु गिरी र रामनवास गिरीको घरसंगै लताकपडा, भाँडाकुँडा, अन्नपात जलेर नष्ट भएका छन् । उनीहरुका ३ चौपाया पनि जलेर मरेका छन् ।
आगलागीबाट दुवै जनाको ६ लाख बराबरको धनमाल नष्ट भएको जिल्ला प्रहरी कार्यालयले जनाएको छ ।
जोखुको घरगोठबाट सुरु भएको आगो स्थानीय बासिन्दा, दमकल र सुरक्षाकर्मीको सहयोगमा नियन्त्रणमा लिएको प्रहरीले जनाएको छ । समयमा दमकल पुग्न नसक्दा क्षति बढेको स्थानीयले आरोप लगाएका छन् । आगलागीपछि घरवारवीहिन बनेका दुवै परिवार बिच्चलीमा परेका छन् ।
प्रकाशित : जेष्ठ ३, २०७५ १२:४५