१८.१२°C काठमाडौं
शय्यामै हातखुट्टा बाँध्दा सुत्केरीको मृत्यु
धनुषा — शल्यक्रिया गरी पेट दुख्दा शय्याको बेडमा हातखुट्टा बाँधिएकी महिलाको मृत्यु भएको छ । जनकपुर अञ्चल अस्पतालमा स्वास्थ्यकर्मीको लापरबाहीले दुईपटक शल्यक्रिया भएकी सुत्केरी महिलाको मृत्यु भएको हो ।
जनकपुर उपमहानगरपालिका १, पुल्चोककी २५ वर्षीया सोनियादेवी ठाकुरको शुक्रबार बिहान मृत्यु भएको हो । बिहीबार बिहान ४ बजे सोनियालाई सुत्केरीका लागि जनकपुर अञ्चल अस्पताल भर्ना गराएका थिए ।
सामान्य रूपमा बच्चा नजन्मेपछि बिहीबार बिहान ८ बजे अस्पतालका प्रसूति रोग विशेषज्ञ डा. धीरेन्द्र साहले शल्यक्रिया गरेका थिए । शल्यक्रियापछि ठाकुरको पेट दुख्ने क्रम झन बढेको थियो । पेट दुखाइ बढ्दा स्वास्थ्यकर्मीले शल्यक्रियापछि पेट दुख्नु सामान्य भनेका थिए ।
सहनै नसक्ने गरी पेट दुखाइ बढेपछि अस्पतालका महिला स्वास्थ्यकर्मीको सुझावमा मृतक ठाकुरको हातखुट्टा बेडमा बाँधेको मृतककी सासू प्रेमदेवी ठाकुरले बताइन् । पेट दुखाइ नरोकिएपछि अस्पतालबाट बाहिर लैजान चिकित्सकले सुझाव दिएका थिए । ठाकुरका आफन्तले अस्पतालकै डाक्टरलाई पटकपटक आग्रह गर्दा पुन: शल्यक्रिया गर्दा पेटमा रगत जमेको पाइएको थियो ।
दोस्रोपटकको शल्यक्रियामा डाक्टरले समस्या रहेको भन्दै पाठेघर निकालेका थिए । डाक्टरको शल्यक्रियापछि आईसीयूमा भर्ना गराइएकी महिलाको शुक्रबार बिहान ५ बजेतिर मृत्यु भएको हो ।
सोनियाको ३ वर्षका छोरा पनि छन् । लापरबाही गर्ने डाक्टरलाई कारबाही र क्षतिपूर्ति दिने आश्वासनपछि परिवारले शव बुझेका छन् । उनको मृत्युपछि अस्पताल परिसरमा तनाव बढेको थियो ।
प्रसूति सेवा लिन आएकी महिलाको मृत्यु सम्बन्धमा अनुसन्धान टोली बनाएर छानबिन गरी दोषी डाक्टरलाई कारबाही गर्ने जनकपुर अञ्चल अस्पतालका मेडिकल सुपरिटेन्डेन्ट रामपरीक्षण यादवले बताए ।
प्रकाशित : जेष्ठ २७, २०७५ ०९:४०
