महानगरमा जनशक्ति अभाव

शंकर आचार्य

पर्सा — वीरगन्ज महानगरपालिकामा सीमित जनशक्तिका कारण कर्मचारीमाथि अत्यधिक कार्यभार बढेको छ । सेवाग्राहीले पनि कार्यालयबाट छिटो र छरितो सेवा पाउन सकिरहेका छैनन् । 

वीरगन्ज महानगरपालिकाको कार्यालय । तस्बिर : शंकर

जनशक्ति अभावले आफूहरूलाई काम गर्न गार्‍हो भएको गुनासो महानगरपालिकाको कार्यालय प्रमुख प्रशासकीय अधिकृत डा. भीष्मकुमार भुषाल गर्छन् । हाल कार्यालयमा राजपत्रांकित द्वितीय तहको उपसचिव अधिकृत ५ जनाको दरबन्दी रहेकोमा ५ वटै पद रिक्त रहेका छन् ।

Yamaha

राजपत्रांकित द्वितीय उपसचिव (कृषि), राजपत्रांकित द्वितीय उपसचिव (स्वास्थ्य), उपसचिव लेखा राजपत्रांकित द्वितीय (लेखा) र सिनियर डिभिजन इन्जिनियर राजपत्रांकित द्वितीय (प्राविधिक सिभिल, जनरल, स्यानिटरी, सिँचाइ, हाइ वे), शाखा अधिकृत राजपत्रांकित तृतीय (शिक्षा/प्रशासन/कानुन) तहको एकएकवटा दरबन्दी रहेकोमा सबै खाली छन् ।

त्यसैगरी, अधिकृत २१ दरबन्दी रहेकोमा १७ पद रिक्त छ । महिला विकास/जनस्वास्थ्य अधिकृतका २ वटा दरबन्दी रहेकोमा एउटा खाली छ । नापी अधिकृतको एक, वन अधिकृतको ३, कम्प्युटर अधिकृतको एक, गुणस्तर नियमन अधिकृतको एक दरबन्दी रहेकोमा सबै खाली छन् ।

लेखा अधिकृतको २ दरबन्दीमा एक, कृषि तथा पशु विकास अधिकृतको २ दरबन्दीमा २, इन्जिनियरको ६ दरबदीमा ५, तथ्यांक अधिकृतको २ दरबन्दीमा एक, नगर प्रहरी निरीक्षकको २ दरबन्दीमा एक, शिक्षा प्राविधिक सहायकको २ दरबन्दीमा एक, कृषि प्राविधिक सहायकको २ दरबन्दीमा २ खाली छन् । लेखापालको ७ वटै दरबन्दी खाली छ ।

अन्य अधिकांश पदमा पनि दरबन्दीअनुसारका कर्मचारी छैनन् । संघीय बाहेकका महानगरपालिकाको जम्मा कर्मचारी संख्या ६ सय ५५ छ । तिनमा अधिकांश श्रेणीविहीन कर्मचारी हुन् ।

जसमा ८ फायरम्यान जवान, ४५ कार्यालय सहयोगी, ३ चैनम्यान, १० चौकीदार, १५ कुल्ली, ८ माली, १ यान्त्रिक हेल्पर, ४३ नाइके र १ सय ९३ स्वीपर छन् । जनशक्ति कम हुँदा सीमित जनशक्तिउपर अत्यधिक कार्यभार परेको अधिकृत भुषाल बताउँछन् । ‘हामीबिहान ६ देखि राति ९ बजेसम्म पनि कार्यालयकै काम गरिरहेका हुन्छौं,’ उनले भने, ‘यसरी काम गर्न निक्कै गार्‍हो भएको छ ।’

कार्यालयमा अधिकृत स्तरका कर्मचारी कम र तल्लो तहका कर्मचारी बढी रहेको अवस्था छ । यस्तो अवस्थामा तल्लो तहका कर्मचारीबाट अधिकृत तहका कर्मचारीले गर्ने काम लिन सकिँदैन । ‘दक्षता नभएका कर्मचारीबाट दक्ष काम लिन सकिँदैन,’ उनले भने, ‘अप्ठेरो गरी जेनतेन कार्यालय सञ्चालन गरेका छौं ।’

आफूले कार्यालयमा रहेको यो समस्याबारे संघीय मामिला तथा सामान्य प्रशासन मन्त्रालयलाई पत्राचार गरी जानकारी गराइसकेको उनले बताए । असार मसान्तसम्म अपुग कर्मचारीको व्यवस्था गरिदिने आश्वासन मन्त्रालयबाटपाएको उनले बताए ।

Esewa Pasal

प्रकाशित : असार ६, २०७५ १०:५६
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT

सर्पले डसेर २ को मृत्यु

कान्तिपुर संवाददाता

निजगढ — सर्पले डसेर कलैया अस्पतालमा उपचार गराउन आएका मध्ये एक नाबालिकासहित दुई जनाको मृत्यु भएको छ ।

अस्पतालका चिकित्सक जगमोहन चौधरीका अनुसार विषालु सर्पले डसेर बाराको महागढीमाई नगरपालिका–१० गंजभवानीपुरकी २८ वर्षीया कान्ति देवी कुशवाहा र कोल्हवी नगरपालिका– ८ बोधवन माछागाउँकी रामनरेश धामीकी छोरी ९ वर्षीया सोनम कुमारी धामीको मृत्यु भएको हो ।

पसाहा खोला किनारामा घाँस काट्न जाँदा कान्ति देवी कुसवाहलाई सर्पले डसेको थियो । सोनम धामी भने साथीसँग खेल्न गएका बेला सर्पको डसाइबाट घाइते भएकी थिइन् ।

‘मृतक दुवैलाई उपचारका लागि समयमै अस्पताल पुर्‍याउन नसक्दा बचाउन सकिएन,’ अस्पतालका चिकित्सक चौधरीले भने, ‘उनीहरूलाई समयमा अस्पतालमा पुर्‍याउन सकेको भए बचाउन सकिन्थ्यो ।’ सर्पदंशका बिरामीहरू समयमा उपचार गर्न अस्पताल पुर्‍याउँदा निको भएर फर्किने गरेका छन ।

‘कलैया अस्पतालमा सर्पदंश बिरामीको उपचार प्रभावकारी छ,’ चिकित्सक चौधरीले भने, ‘तर गाउँबाट अस्पताल ल्याउन ढिलो गर्छन् ।’ उनका अनुसार वैशाखदेखि सर्पदंश घटना बढन थालेका छन् । ‘दैनिक ४/५ जना सर्पदंश बिरामी अस्पताल आउने गरेको चिकित्सक चौधरीले भने । ‘सर्पदंश बिरामीको उपचार थप प्रभावकारी बनाउन जरुरी छ ।’

प्रकाशित : असार ६, २०७५ १०:५२
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT