मेयरलाई तारेखमा छाडियो

‘प्रारम्भिक बयान लिइएको छ, विस्तृत विवरण अख्तियार पठाउँछौं’
शिव पुरी

रौतहट — जिल्ला प्रशासन कार्यालय गौरले मंगलबार गढीमाई नगरपालिकाका मेयरसहित ५ जनालाई नियन्त्रणमा लिई साँझ छाडेको छ । चन्द्रपुर नगरपालिकास्थित होटल हिमालयनबाट मेयर, प्रमुख प्रशासकीय अधिकृत र लेखापाल लगायतका कर्मचारीलाई नियन्त्रणमा लिइएको हो ।

पक्राउ परेकै स्थलमा प्रहरीले नगरपालिकाको चेकसहित विभिन्न कागजात फेला पारी प्रशासनमा बुझाएको थियो । उनीहरू सित पालैपालो बयान लिएर चाहिएका बेला हाजिर हुने सर्तमा प्रशासनले छाडेको हो ।

नगरपालिकाको विभिन्न योजनाको भुक्तानीलगायतको काम होटलमा बसेर गरिरहेको सूचनापछि मेयर श्यामप्रसाद यादव, प्रमुख प्रशासकीय अधिकृत नरबहादुर विक, लेखापाल विमल मिश्र, नायव सुब्बा करपुरी ठाकुर र कार्यालय सहायक अजयकुमार यादवलाई नियन्त्रणमा लिइएको प्रमुख जिल्ला अधिकारी गोविन्दप्रसाद रिजालले बताए । ‘नियन्त्रणमा लिईएकाहरूको प्रारम्भिक बयान लिएका छौं,’ उनले भने,’ विस्तृत विवरण अख्तियारको हेटौंडा कार्यालयमा पठाउने छौं ।’

Yamaha

लेखापाल मिश्रकै कारण भुक्तानीमा ढिलासुस्ति र झमेला हुन थालेपछि बिहानदेखि होटलको रुम नम्बर १११ मा मेयर यादव लगायतका कर्मचारी छलफल गर्न बसेका थिए । मेयर लगायतका कर्मचारी होटलमा बसेर भुक्तानीका लागि चेक काटिरहेको भन्दै स्थानीयले अख्तियारको हेटाैंडा कार्यालयलाई जानकारी गराएका थियो । त्यसपछि जिल्ला प्रशासन कार्यालयलाई एक्सनमा जान अख्तियारले निर्देशन दिएको हो । प्रजिअ रिजालको निर्देशनमा तत्कालै होटलबाट मेयरलगायतलाई नियन्त्रणमा लिइएको हो ।

इलाका प्रहरी कार्यालय चन्द्रनिगाहपुरको टोलीले उनीहरूलाई नियन्त्रणमा लिई अपराह्न सदरमुकाम गौर पठाएको थियो ।

नगरपालिकाका कर्मचारीका अनुसार नगर परिषद्का बारेमा समेत केही छलफल गर्न होटलमा बसेका थियौं । सबै कर्मचारीले लेखापाल मिश्रको बदमासीले मेयर लगायतका कर्मचारीले सास्ती भोग्नुपरेको आरोप लगाएका छन् ।

नगरप्रमुख यादवले लेखापाल मिश्र कार्यालयमा हाजिर नहुने र उनलाई सर्लाहीको बलराबाट बोलाएर कार्यालयकै काम गराउन लागिएको बताए । ‘हामीले कुनै किसिमको अनियमितता गर्न लागेका होइनौं,’ उनले भने, ‘कार्यालय समय अगावै नियमअनुसार नै कार्यालयका कर्मचारीको तलब भत्ता र अन्य काम गर्न बसेका हौं ।’

लेखापाल मिश्र कार्यालयमा हाजिर नभएपछि नगरप्रमुख यादवलाई विभिन्न योजनाको भुक्तानीमा समस्या हुँदै आएको थियो । उनले पटक–पटक भुक्तानी रोक्न नहुने भन्दै लेखापाल मिश्रलाई बोलाउने गरेका थिए ।

Esewa Pasal

प्रकाशित : असार २८, २०७५ १०:५९
ADVERTISEMENT
प्रतिक्रिया
पठाउनुहोस्
ADVERTISEMENT

बाढीले पुल भत्काउँदा आवागमन ठप्प

रवीन्द्र उप्रेती

महोत्तरी — बाढीले जंगाहा पुलमा क्षति पुर्‍याएपछि प्रहरीले आवागमनमा रोक लगाएको छ । बाढीले सडकसँग जोड्ने पुलको पूर्वी भाग ‘अवोटमेन्ट वाल’ मा क्षति पुर्‍याएको हो । सार्वजनिक आवागमन ठप्प भएपछि महोत्तरीका प्रहरी उपरीक्षक कुवेर कडायतले क्षतिग्रस्त पुलको निरीक्षण गरे ।

पुल उच्च जोखिममा रहेकाले मानवीय क्षति हुन नदिन सवारी सञ्चालनमा रोक लगाएको उनले बताए । बाढीले पुलको दायाँबायाँ कटान गरी पूर्वी खण्डमा क्षति गरिरहेकाले औरही नगरपालिकाको कृषि बजारसमेत जोखिममा परेको छ ।

पुलको एक नम्बर पिलर वरिपरिको माटोसमेत बाढीले बगाएपछि जोखिम बढेको प्राविधिकले जनाएका छन् । बर्दिवास–जलेश्वर सडक खण्डलाई सर्लाही सदरमुकाम मलंगवासँग जोड्ने १ सय ४९ मिटर लम्बाइको जंगाहा पुलमा आवागमन ठप्प भएपछि सर्वसाधारण मार्कामा छन् । उनीहरूलाई सदरमुकाम जलेश्वर पुग्न बर्दिवास वा भारतीय घुमाउरो बाटो प्रयोग गर्नुपर्ने बाध्यता छ ।

पुलबाट आवागमन ठप्प भएपछि ३ दर्जन टेम्पो सञ्चालकको रोजीरोटी पनि प्रभावित भएको छ । यात्रुले पनि सास्ती पाएका छन् । स्थानीय कृषकको उत्पादनलाई गौशाला र औरही बजार पुर्‍याउन असहज भएको छ । औरही–गौशालाबीच ३० भन्दा बढी टेम्पो सञ्चालनमा थिए । दैनिक हजार बढी यात्रु र कृषि व्यापारलाई सेवा दिए पनि पुल भत्किएपछि रोजीरोटी गुमेको टेम्पो चालक विमल साहले बताए । ‘पुल क्षतिसँगै हामीलाई पनि छाक टार्ने समस्या परेको छ,’ साहले भने ।

सामान्य बाढीमा पनि क्षति हुन थालेपछि पुलको गुणस्तर कमसल रहेको आशंका गरिएको छ । अहिले भने तत्काल मर्मत गरी आवागमन सहज बनाउन स्थानीयसँग औरही नगरपालिकाका मेयर सुनिल यादवले माग गरेका छन् । उनले मर्मतका लागि जनकपुरस्थित डिभिजन सडक कार्यालयलाई समेत आग्रह गरेको बताए । डिभिजन कार्यालयका प्रमुख कुबेर नेपालीले बिहीबारसम्म एकतर्फी भए पनि सडक खुला गरिने बताए।

डिभिजन सडक कार्यालयका डिई कुवेर नेपालीका अनुसार प्रतिकूल मौसम र बजेट अभावले तत्काल जंगाहा पुलको मर्मत हुन सक्दैन । ‘अहिले पुलमा थप क्षति हुन नदिन प्रयास मात्र गर्न सकिन्छ । त्यसका लागि ठेकेदारलाई मौखिक आग्रह गरेको छु,’ उनले भने । ठेकेदार श्याम पोखरेललाई बजेट आएमा मिलाउने गरी काम गरिदिन आग्रह गरेको डिई नेपालीले बताए । ‘बजेट एक पैसा छैन,’ डिई नेपालीले भने, ‘तर पनि संरचना त जोगाउनैपर्‍यो । ठेकेदारलाई पुलमा थप क्षति रोक्ने किसिमले कम गरिदिन आग्रह गरेको छु ।’

प्रकाशित : असार २८, २०७५ १०:५९
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT