‘झूटो प्रतिवेदनमा परमादेश’

कान्तिपुर संवाददाता

काठमाडौँ — प्रदेश २ का आन्तरिक मामिला तथा कानुनमन्त्री ज्ञानेन्द्र यादवले सशस्त्र प्रहरीका असई थमन विक हत्या प्रकरणमा अदालतले झूटो प्रतिवेदनको सहारामा आदेश गरेको आरोप लगाएका छन् ।

विक हत्या प्रकरणमा आरोपी रहेका प्रदेश २ का राज्यमन्त्री अभिराम शर्मा र जलेश्वर नगरपालिकाका मेयर रामशंकर मिश्रलाई पक्राउ गर्न उच्च अदालत जनकपुरले परमादेश जारी गरेको थियो ।

‘उनीहरू दुवै जना निर्दोष छन्,’ आन्तरिक मामिला तथा कानुनमन्त्री यादवले भने, ‘झूटो प्रतिवेदनका आधारमा अदालतको आदेश भएको छ ।’ उनले पहिलो चरणमा प्रतिवादी बनाइएका १६ जनामा मन्त्री शर्मा र मेयर मिश्रको नाम नरहेको तर पछि उनीहरूलाई प्रतिशोध साँध्न प्रतिवादी बनाइएको दाबी गरे । ‘दोषी थिए भने पहिलो किन उनीहरूको नाम थिएन ?’ प्रश्न गर्दै मन्त्री यादवले भने । विक हत्या प्रकरणमा उच्च अदालत जनकपुरको परमादेशपछि सर्वोच्चमा पुनरावेदन गइसकेकाले त्यसपछि मात्र थप बताउने बताए ।

उच्च अदालत जनकपुरको परमादेश कार्यान्वयन हुन्छ कि हँुदैन ? भन्ने प्रश्नमा मन्त्री यादवले भने, ‘निर्दोषलाई जबरजस्ती प्रतिवादी बनाएर झूटा प्रतिवेदनको सहारामा गरिएको आदेश कसरी कार्यान्वयन हुन्छ त ?’ उनले मधेस आन्दोलनका क्रममा विभिन्न जिल्लामा मधेसी मोर्चा आबद्ध दलका नेता कार्यकर्तामाथि झूटा मुद्दा लगाइएको बताए ।

Yamaha

प्रकाशित : श्रावण २२, २०७५ ०९:३२
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT

भूकम्पप्रतिरोधी विद्यालय

कान्तिपुर संवाददाता

ओखलढुंगा — भूकम्पले क्षतिग्रस्त सोलुखुम्बुको दुधकुण्ड नगरपालिका ५ स्थित जनजागृति आधारभूत विद्यालयमा नयाँ भवन बनाइएको छ । हिमाली हावापानी सुहाउँदो अत्याधुनिक र भूकम्पप्रतिरोधी दुई कोठे भवन निर्माण भई आइतबार औपचारिक उद्घाटन भएको हो ।

सोलुखुम्बुस्थित जनजागृति आधारभूत विद्यालयको नवनिर्मित अत्याधुनिक भूकम्पप्रतिरोधी भवन । तस्बिर : कुम्भराज राई

सोलु दुधकुण्ड नगरपालिकाकी उपप्रमुख कल्पना राई र अस्ट्रेलियन हिमालयन फाउन्डेशनकी कार्यक्रम प्रमुख छिरिङ लामा ओगरमनले संयुक्त रूपमा उद्घाटन गरे । ३९ लाख १८ हजार ४ सय ४८ रुपैयाँ लागतमा भवन निर्माण सम्पन्न भएको हो । विद्यालय भवन सोलुखुम्बुमा शैक्षिक क्षेत्रमा काम गरिरहेको ग्रामीण शिक्षा तथा वातावरण विकास केन्द्र (रिड नेपाल) ले अस्ट्रेलियन हिमालयन फाउन्डेसनको आर्थिक सहयोगमा निर्माण भएको हो ।

भवन उद्घाटन कार्यक्रममा फाउन्डेसनकी कार्यक्रम प्रमुख ओगरमनले नवनिर्मित विद्यालय भवन अस्ट्रेलियाको उत्कृष्ट डिजाइन भएको र यो हिमाली हावापानी सुहाउँदो भएको बताइन् । उनले यही डिजाइनले अस्ट्रेलियामा उत्कृष्ट डिजाइनको पुरस्कार जितेको समेत बताइन् । आगामी दिनमा पनि नेपालको शैक्षिक क्षेत्रमा सहयोग गर्ने उनले बताइन् ।

रिड नेपालका महाप्रबन्धक उज्जवल अमात्यले २०७२ सालको भूकम्पपछि नेपालमा अस्ट्रेलियन हिमालयन फाउन्डेसनको सहयोगमा ८७ वटा विद्यालय भवन निर्माण गरेको बताए । त्यसमध्ये सोलुखुम्बुमा १३ वटा अस्ट्रेलियन डिजाइनको भवन बनेको जानकारी दिए । प्रत्येक भवनमा दुईदुई वटा कोठा रहेको अमात्यले बताए ।

निर्माण भएका सबै भवनहरू भूकम्प प्रतिरोधी, साउन्ड प्रुफ, हावाहुरी तथा पानी पर्दा समेत पढाइमा बाधा नपुग्ने, जाडो मौसमका लागि समेत उपयोगी भएको रिड नेपालका इन्जिनियर सुमन राईले बताए । रिड नेपालले जन जागृति आधारभूत विद्यालय, सिंहकाली आधारभूत विद्यालय, कालिका आधारभूत विद्यालय, वासाखाली माध्यमिक विद्यालयमा, गार्मा माध्यमिक विद्यालय र चाँगेस्थान माध्यमिक विद्यालय केरुङका गरी जम्मा १३ वटा भवन निर्माण गरेको हो ।

प्रकाशित : श्रावण २२, २०७५ ०९:२९
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT