वीरगन्जमा अडिँदैनन् पर्यटक

शंकर आचार्य

पर्सा — गत वर्ष वीरगन्ज नाकाबाट आउजाउ गर्ने तेस्रो मुलुकका पर्यटकको संख्यामा निकै कमी पाइएको छ । अध्यागमन कार्यालयको तथ्यांकअनुसार गत वर्ष २ हजार २ सय ६९ पर्यटक मात्र आउजाउ गरेका छन् । तीमध्ये १ हजार १ सय १९ पर्यटक भित्रिएका छन् भने १ हजार १ सय ५० जना बाहिरिएका छन् ।

अध्यागमन सहायक धु्रव अधिकारीका अनुसार नेपाल प्रवेश गरेका पर्यटकमध्ये ६ सय ५३ पुरुष र ४ सय ५ महिला थिए । त्यसैगरी बाहिरिनेमा ६ सय ५३ पुरुष र ४ सय ९७ महिला थिए । यो नाकाबाट आवागमन गर्ने पर्यटक अधिकांश थाइल्यान्ड, अमेरिका, बेलायत, अस्ट्ेरलियाका हुने गरेको उनले बताए ।

सीमावर्ती भारतीय सहर रक्सौलबाट त्यहाँका अधिकांश महानगर तथा ठूला सहरसम्म सोझो रेल सेवा भए पनि यो नाकाबाट पर्यटकको आवागमनको आँकडा निकै कम हो । नाका अव्यवस्थित र फोहोर हुँदा पर्यटकमाझ मुलुकको छवि धमिलिने गरेको छ । वर्षौंदेखि वीरगन्ज–रक्सौल नाका अव्यवस्थित, फोहोरी, दुर्गन्ध र कोलाहलयुक्त छ । जाम, धूलो, धूवा र अव्यवस्थाले पर्यटक आजित हुने गरेका छन् ।

यसै कारण उनीहरू दोहोर्‍याएर यो नाका प्रयोग गर्न चाहँदैनन् । वीरगन्जमा रात बिताउने पर्यटक विरलै हुन्छन् । उनीहरू सकेसम्म सौराहा, काठमाडौं, पोखराजस्ता पर्यटकीय सहरै पुग्छन् । वीरगन्ज र आसपास क्षेत्रमा पर्सा निकुञ्ज, गढीमाई मन्दिर, सिम्रौनगढ, घडिअर्वा पोखरी जस्ता पर्यटकीय संरचना छन् । यिनबारे पर्याप्त प्रचारप्रसार नहुँदा पनि पर्यटक यहाँ अडिँदैनन् ।

यो नाकामा भेटिने पर्यटकमध्ये आधाजसो भारतको प्रसिद्ध बौद्ध धार्मिक स्थल बोधगया आउजाउ गर्नेहरू हुन्छन् । यहाँबाट बोधगया पुग्न सहज छ । तर, फोहोर र अव्यवस्थाकै कारण उनीहरूलाई वीरगन्जले भने तान्न सक्दैन । पर्यटक लोभ्याउन यहाँका पर्यटन तथा होटल व्यवसायीले पनि कुनै गृहकार्य गरेका छैनन् ।

यहाँका विकास पूर्वाधारलाई ऐतिहासिक तथा पर्यटकीय स्थलमा विकास गरेर पर्यटक तान्न सकिने प्रशस्त सम्भावना रहेको होटल व्यवसायी हरि पन्त बताउँछन् । ‘पर्यटकलाई बास बसाउन आकर्षक वातावरण पनि त हुनुपर्छ,’ उनले भने, ‘अन्य केही नभए मधेसी, थारू, आदिवासी–जनजातिको सांस्कृतिक पहिचान झल्किने झाँकी, नृत्यले मनोरन्जन दिन सकिन्छ, पर्सा राष्ट्रिय निकुञ्ज सफारी गराउन सकिन्छ ।’ तर, यसका लागि नाकालाई व्यवस्थित, आकर्षक, स्वच्छ, हराभरा बनाउन आवश्यक रहेको उनले बताए ।

Yamaha

Esewa Pasal

प्रकाशित : श्रावण २८, २०७५ ०९:५४
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

कच्चा तेलको आयात बढ्यो

शंकर आचार्य

पर्सा — वीरगन्जका २ वटा भन्सार नाकाबाट भटमास र सूर्यमुखी कच्चा तेलको आयात उल्लेख्य रूपमा बढेको छ ।

वीरगन्ज भन्सार कार्यालय र सिर्सिया सुक्खा बन्दरगाह भन्सार कार्यालयको तथ्यांकले अघिल्लो आर्थिक वर्षको तुलनामा गत आर्थिक वर्षमा यी वस्तुको आयात बढेको देखाएको छ ।

भटमासको कच्चा तेल अर्जेन्टिना र ब्राजिलबाट भित्र्याइन्छ । सूर्यमुखीको कच्चा तेल भने टर्की, मलेसिया र सिंगापुरबाट आयात हुने गरेको छ ।

यी दुई वस्तु उत्पादनका लागि सुहाउँदो हावापानी र माटो नेपालमा भए पनि अन्य मुलुकबाटै ल्याउने गरिएको छ । अझ पछिल्लो समय यी दुई वस्तुको आयात बढेको तथ्यांकले देखाएको छ ।

तथ्यांकअनुसार गत आवमा यो नाकाबाट १० अर्ब ८१ करोड रुपैयाँ बराबरको ११ करोड ७९ लाख ८९ हजार ९ सय ४५ किलो भटमासको कच्चा तेल आयात भएको छ ।

अघिल्लो आवमा ९ अर्ब १९ करोड रुपैयाँ बराबरको ९ करोड ९४ लाख किलो आयात भएको थियो । गत आवमा यो नाकाबाट आयात मूल्यको आधारमा आयात भएका मुख्य वस्तुको छैटौं नम्बरमा यो वस्तु परेको छ ।

त्यसैगरी यो नाकाबाट गत आवमा २ अर्ब २१ करोड ५५ लाख रुपैयाँ बराबरको २ करोड ४४ लाख ५० हजार ९ सय १९ किलो सूर्यमुखीको कच्चा तेल आयात भएको छ । अघिल्लो आर्थिक वर्षमा ३२ करोड ५३ लाख रुपैयाँ बराबरको ३५ लाख किलो यो वस्तुको आयात भएको थियो ।

तुलनात्मक रूपमा हेर्दा अघिल्लो आवभन्दा गत आवमा यसको आयात ६ गुनाभन्दा पनि बढेको छ । यो नाकाबाट गत आवमा आयात वृद्धि भएका वस्तुको सूचीमा सूर्यमुखीको कच्चा तेल ११ औं नम्बरमा रहेको छ ।

वीरगन्ज भन्सार कार्यालयका सूचना अधिकृत सन्तोष यादवले भटमासको कच्चा तेलको आयात अर्जेन्टिना र ब्राजिलबाट हुने गरेको बताए । यसको आयातमा १० प्रतिशत भन्सार शुल्क र १३ प्रतिशत मूल्य अभिवृद्धि कर लाग्छ ।

सिर्सिया सुक्खा बन्दरगाहको तथ्यांकअनुसार गत आवमा यो नाकाबाट १ अर्ब ६३ करोड रुपैयाँ बराबरको १ करोड ७७ लाख ४८ हजार ४ सय ५९ किलो सूर्यमुखीको कच्चा तेल आयात भएको छ । यो नाकाबाट अघिल्लो आवमा ११ करोड ३१ लख रुपैयाँ बराबरको १२ लाख १६ हजार किलो भटमासको कच्चा तेल आयात भएको थियो ।

गत आवमा भने यो नाकाबाट यो वस्तुको आयात नै भएन । आयातकर्ताले नाका परिवर्तन गरी वीरगन्ज भन्सार नाकाबाट यसको आयात गरेको अनुमान गरिएको छ ।

सुक्खा बन्दरगाह भन्सार कार्यालयका सूचना अधिकृत धनबहादुर सूर्यमुखीको कच्चा तेल टर्की, मलेसिया र सिंगापुरबाट आयात हुने गरेको बताउँछन् । यसको आयातमा १५ प्रतिशत भन्सार शुल्क र १३ प्रतिशत मूल्य अभिवृद्धि कर लाग्छ ।

पछिल्लो समय नेपालीको भान्सामा तोरीको तेलको विकल्प बन्दै गएको सूर्यमुखी र भटमासको तेलको खपत वृद्धिसँगै माग पनि उच्च हुँदै गएको हुन सक्ने उनको ठम्याइ छ । स्वदेशी तेल उद्योगहरूले यस्ता कच्चा तेललाई प्रशोधन गरी बजारमा बिक्री वितरण गर्छन् ।

वीरगन्जस्थित वीरगन्ज भन्सार नाका । यो नाकाबाट गत आर्थिक वर्षमा भटमास र सूर्यमुखीको कच्चा तेलको आयात उल्लेख्य रूपमा बढेको छ । तस्बिर : शंकर आचार्य/ कान्तिपुर

प्रकाशित : श्रावण १५, २०७५ २०:२९
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT