अवैध करको विरोधमा चालक

भूषण यादब

वीरगन्ज — वीरगन्ज महानगरपालिकाको पटके सवारी करको ठेक्का लिएका ठेकेदारले मालवाहक सवारी साधनसँग अवैध रूपमा दोहोरो कर असुली रहेको पाइएको छ ।

अवैध कर असुलीको विरोधमा वीरगन्जको आईसीपी अगाडि चक्काजाम गरेका भारतीय ट्रक । तस्बिर : भूषण । कान्तिपुर

भन्सार भित्रिने क्रममा सडकमा रोकिएका ट्रकसँग पार्किङ शुल्क समेत असुलेका छन् । ठेकेदारले जबरजस्ती कर असुल्न थालेपछि ट्रक चालकहरूले बिहीबार बिहान करिब ३ घण्टा एकीकृत भन्सार चौकी (आईसीपी) मूल गेट अगाडि सडक जाम गरी विरोध जनाएका थिए ।

भन्सार प्रमुख सेवन्तक पोखरेलले अवैध असुलीबारे जिल्ला प्रहरी प्रमुखलाई अवगत गराएपछि प्रहरीले ठेकेदारका प्रतिनिधिलाई नियन्त्रणमा लिएका थिए । भन्सार प्रमुखले दोहोरो रकम तिरेका केही ट्रक चालकको रकम समेत फिर्ता गराएका थिए । चालकका अनुसार स्थानीय प्रहरी चौकीकै मिलेमतोमा ठेकेदारले अवैध रूपले भारतीय ट्रक चालकसँग रकम असुल्दै आएका छन् । ठेकेदारका युवाहरूले भारतीय ट्रक चालकसँग जबरजस्ती कर असुल्दा पनि त्यहाँ तैनाथ रहेका नेपाल प्रहरी र सशस्त्र प्रहरी मुकदर्शक बन्ने गरेको स्थानीयले आरोप लगाएका छन् ।

Yamaha

बुधबार भारतको जहानाबादबाट धान लिएर आएका धर्मेन्द्र कुमारले पटके सवारी करबापत २ सय ८५ रुपैयाँ तिरेका थिए । ‘धान अनलोड गरी हिजो साँझ फर्किंदा पनि थप २ सय ८५ रुपैयाँ लिए,’ कान्तिपुरसँग धर्मेन्द्रले भने, ‘मागे जति रकम नदिए कुटपिट समेत गर्छन् ।’ बुधबार राति आईसीपी भित्रिने सडकमा रोकिएका भारतीय ट्रक चालकसँग पार्किङको नाममा एक सय रुपैयाँदेखि ३ सय रुपैयाँ जबरजस्ती असुलिएको चालकहरूले जनाए । ‘अवैध पार्किङ कर नदिने अडान लिएका एक पन्जाबी चालकलाई ठेकेदारका युवाहरूले राति कुटपिट पनि गरे,’ राजस्थानका चालक नैनारामले भने, ‘यो नाकामा अवैध असुली बढ्दो छ ।’ सामान अनलोड गरी फर्किने क्रममा आईसीपी गेट अगाडि पनि प्रतिघण्टा ५० रुपैयाँको दरले पार्किङ लिने गरिएको उनले सुनाए ।

आईसीपी भन्सार प्रमुख सेवन्तक पोखरेलले नेपाल भित्रिने सवारीसँग एकपटक मात्र सवारी कर लिन पाइने जनाए । ‘नाकासँग जोडिएको महानगरपालिका, गाउँपालिकाले मात्र सवारी कर लिन पाउँछन्,’ उनले भने, ‘एउटा स्थानीय तहले कर लिइसकेपछि सोही शीर्षकमा अर्को स्थानीय तहले कर असुल्नु गैरकानुनी हो ।’

जीतपुरसिमरा उपमहानगरपालिकाका ठेकेदार सन्तोष कुशवाहाले वीरगन्जका ठेकेदारलाई पटके कर तिरिसकेका सवारीसँग पटके सवारी कर बापत एक सय रुपैयाँ असुलेका छन् । नगरपालिकाको बजेटमा निर्माण भएका सडकमा सवारी कर संकलन गर्न पाइने नियम भए पनि ठेकेदारले राजमार्गमै पटके कर असुल्ने गरेका छन् ।

वीरगन्ज महानगरपालिकाले सवारी करको ठेक्का मात्र लगाए पनि ठेकेदारले सवारी व्यवस्थापनको नाममा समेत कर असुल्दै आएका छन् । ‘पटके करको रसिदमा २ सय ८५ लेखिएको हुन्छ,’ जयपुर निवासी चालक मखनलाल उमठले भने, ‘तर, हामीसँग तीन सय २० नेपाली रुपैयाँ लिन्छन् ।’ वीरगन्ज महानगरपालिकाका मेयर विजय सरावगीले ठेकेदारलाई स्पष्टीकरण सोधिने जनाए । ‘दोहोरो कर असुलीको गुनासो आएको छ,’ मेयर सरावगीले भने, ‘ठेकेदारलाई पत्र काट्न भनिसकेको छु ।’ महानगर स्रोतका अनुसार चालू आर्थिक वर्षमा ठेकेदारले महँगो मूल्यमा ठेक्का सकार गरेकाले अवैध रूपले कर असुलिरहेका छन् ।

Esewa Pasal

प्रकाशित : भाद्र १, २०७५ ०९:०४
ADVERTISEMENT
प्रतिक्रिया
पठाउनुहोस्
ADVERTISEMENT

इन्टरमोडलको आम्दानी २ करोड ६० लाख

कान्तिपुर संवाददाता

पर्सा — वीरगन्जको एकीकृत सुरक्षा जाँच चौकी आईसीपी सञ्चालन गरेको इन्टर मोडल यातायात विकास समितिले गत आवमा २ करोड ६० लाख रुपैयाँभन्दा बढी आम्दानी गरेको छ ।

मुलुककै पहिलो यो आईसीपी समितिले ठेक्कामा नदिई आफैं सञ्चालन गरेको हो । समितिले वीरगन्जकै सिर्सिया सुक्खा बन्दरगाह भने ठेक्कामा दिएको छ । समिति वाणिज्य मन्त्रालयअन्तर्गतकै एक अंग हो ।

वीरगन्ज आईसीपीस्थित समिति कार्यालयका प्रमुख हेमेन्द्र मोहन शाहीले चैतको अन्तिम सातादेखि सञ्चालनमा आएको आईसीपीले गत आर्थिक वर्ष भरिमा गरी कुल २ करोड ६० लाख ८० हजार ८ सय २० रुपैयाँ ५ पैसा आम्दानी गरेको बताए ।

यस अवधिमा भारतीय आईसीपी हुँदै यो आईसीपीमा २९ हजार ८ सय ७ वटा मालवाहक तथा नयाँ सवारी साधन भित्रिएका छन् । जसमा ४० फुटे कन्टेनर ३ हजार ९ सय ७५, २० फुटे एट्रिकुलेटेड कन्टेनर ६५ वटा, ४० फुटे एट्री कुलेटेड कन्टेनर २ हजार २ सय ५०, २० फुटे कन्टेनर ट्रेलर १ हजार १ सय ८८ वटा, १ सय २१ कार, १ हजार ७ सय ४३ फिक्स कन्टेनर, ३२ जिप, ४० फुटे एलपी ग्यास बुलेट ३ हजार ९ सय ९५, २० फुटे एलपी ग्यास बुलेट १, अन टेस्ट टयाक्टर १६, ट्यांकर ८ हजार ४३, ट्यक्टर – टेलर १ सय ८२, ट्रक ८ हजार ५ सय ९४ थिए ।

ती सवारीको इन्ट्री फी बापत १ करोड १० लाख ५२ हजार ७ सय ७२ रुपैयाँ ४४ पैसा, पार्किङ शुल्क बापत ८२ लाख ३१ हजार ५ सय ३८ रुपैयाँ ९८ पैसा, तौल ब्रिज शुल्क २६ लाख १८ हजार ३ सय १५ रुपैयाँ १८ पैसा र गोदाम शुल्क बापत ११ लाख ४ हजार २३ रुपैयाँ ७७ पैसा आम्दानी भएको छ ।

त्यसैगरी, अन्य शुल्कबाट ७३ हजार ७ सय २१ रुपैयाँ ३६ पैसा आम्दानी भएको छ । सबै आम्दानीको कर ३० लाख ४ सय ४८ रुपैयाँ ३२ पैसा गरी कुल आम्दानी २ करोड ६० लाख ८० हजार ८ सय २० रुपैयाँ भएको हो । चैत अन्तिम साताबाट सञ्चालनमा आए पनि वैशाख अन्त्यसम्म यो नाकाबाट केवल इन्धन मात्र आयात भएको थियो ।

जेठको पहिलो सातादेखि आईसीपी पूर्ण क्षमतामा सञ्चालन आएको हो । त्यसपछि मासिक करिब पउने २ करोड रुपैयाँ आम्दानी हुन थालेको शाहीले बताए ।

प्रकाशित : भाद्र १, २०७५ ०९:०३
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT