किसानले सडकमै फाले तरकारी

कान्तिपुर संवाददाता

सर्लाही — तरकारी बजारमा बिक्री नभएपछि किसानले पूर्व–पश्चिम राजमार्गमा फालेर विरोध गरेका छन् । सर्लाहीको लालबन्दीका किसानले बिक्री नभएको तरकारी राजमार्गमै फाल्दा शनिबार झन्डै ४५ मिनेट सडक जाम भएको थियो ।

गाउँबाट संकलन गरिएको तरकारी सिरहाको मिर्चैया बजारमा बिचौलियाले खरिद गरेपछि राजविराजको सब्जी मन्डीमा बेच्न प्याक गर्दै (माथि) । थोक व्यापारीले तरकारी नकिनेपछि सडकमा फ्यालेर विरोध गर्दै सर्लाहीका किसान । तस्बिर : कान्तिपुर

किसानलाई सडकबाट हटाउन प्रहरीले लाठी चार्ज समेत गरेको थियो । तरकारीले मूल्य नपाएको भन्दै लालबन्दी बजारमा तरकारी लिएर आएका विभिन्न ठाउँका किसानले बिहीबार पनि राजमार्ग बन्द गराएका थिए ।

राजमार्ग छेउछाउका किसानले व्यावसायिक तरकारी खेती गर्दै आएका छन् । आम्दानीको मुख्य स्रोत तरकारी नै भएकाले घर ब्यवहार चलाउन समस्या भएको किसानको भनाई छ । दुई दिन अघिसम्म प्रतिकिलो १०/१२ रुपैयाँमा बिक्री भएको घिरौला शनिबार दुई रुपैयाँमा बिक्री गर्न तयार हुँदा समेत व्यापारीले खरिद नगरेको किसानको गुनासो छ । ‘एक–दुई रुपैयाँ जति दिनुहुन्छ, दिनुस् भन्दा पनि व्यापारीले किनेनन् ।’ स्थानीय किसान पुनित रायले भने, ‘दु:ख गरेर फलाएको तरकारी बिक्री नहुँदा घर व्यवहार चलाउन समस्या भएको छ ।’

व्यापारीको मिलेमतोका कारण तरकारीले उचित मूल्य नपाएको किसानको आरोप छ । तर व्यापारीहरूले भने अन्य ठाउँमा निकासी गर्दै आएको भन्दा बढी तरकारी बजार आएकाले किन्न नसकिएको बताएका छन् । ‘हामीले निकासी गर्ने भन्दा निकै बढी तरकारी आएको छ ।’ व्यापारी राकेश ढुंगेलले भने, ‘माग नै कम छ, यो अवस्थामा चाहिनेभन्दा बढी तरकारी किनेर हामीले पनि कता पठाउनु ?’ मागभन्दा उत्पादन बढी भएकाले घिरौला, झिंङनी, पर्वल, लौका, बोडी लगायतका तरकारीको भाउ सस्तो भएको व्यापारीको भनाइ छ ।

Yamaha

Esewa Pasal

प्रकाशित : भाद्र १०, २०७५ ०९:१२
ADVERTISEMENT
प्रतिक्रिया
पठाउनुहोस्
ADVERTISEMENT

दाइजोले सवारी दुर्घटनामा वृद्धि

रवीन्द्र उप्रेती

वर्दिवास (महोत्तरी) — सामाजिक विकृति र कानुनको बर्खिलाप मानिएको दाइजो प्रथा केही समयदेखि ‘दुर्घटनाको कारण’ समेत बन्दै गएको सुन्दा अचम्म लाग्न सक्छ ।

महोत्तरीको बर्दिवासस्थित पूर्वपश्चिम राजमार्गमा शनिबार सवारी जाँच गर्दै ट्राफिक प्रहरी । तस्बिर : रवीन्द्र

सडक र सवारी नियमनमा लामो अनुभव बटुलेका ट्राफिक प्रहरीको भनाइ मान्ने हो भने हालका दिनमा दाइजो प्रथा माइती पक्ष, कानुन र सभ्य समाजका लागि मात्र नभई ट्राफिकका लागि समेत समस्या बनेको छ ।

बर्दिवासस्थित जिल्ला ट्राफिक कार्यालयका अनुसार सडकको अवस्था, यान्त्रिक गडबडी, मौसम, लापरबाही जस्ता दुर्घटनाका विभिन्न कारण हुन्छन् । तर केही समययता दुर्घटनाको संख्या बढनुको नयाँ कारणमा दाइजो प्रथासमेत थपिएको घटनाक्रमले देखाएको छ । जिल्ला ट्राफिक प्रहरी प्रमुख डिल्ली मैनाली त दाइजोको नाममा लेनदेन बन्द हुने हो भने दुर्घटनमा उल्लेख्य कमी आउने तर्क गर्छन् ।

कार्यालयका अनुसार आव ०७४/७५ मा जिल्लामा ८७ सवारी दुर्घटना भए । दुर्घटनामा परेका सवारीमा मोटरसाइकलको संख्या ५० थियो । त्यसमध्ये अधिकांश मोटरसाइकल दाइजोमा परेको देखिन्थे ।

सवारी नियम उल्लंघन गर्ने र दुर्घटनामा पर्ने मोटरसाइकल दाइजोकै भएको कुनै आधिकारिक प्रमाण पाइँदैन । तर घटनाक्रम र सोधपुछबाट यस्तो रहस्य खुलेको ट्राफिकले जनाएको छ । कानुनी प्रक्रियाका लागि दुर्घटनास्थल पुगेका ट्राफिक प्रहरीका अनुसार सोधपुछ गर्दा दुर्घटनामा परेका अधिकांश मोटरसाइकल दाइजोमा पाएको चालकले सहजै स्वीकार्छन् ।

ससुरालीले दिएपछि बेहुला आफैं तथा उनका आफन्त जानि नजानी मोटरसाइकल हुँइक्याउन थाल्छन् । उनीहरूमा न चलाउने दक्षता हुन्छ न सवारी नियमको जानकारी । चालक अनुमति पत्र (लाइसेन्स) हुने त कुरै भएन । ‘ससुरालीले दाइजो पो (मोटरसाइकल) दिन्छ लाइसेन्स दिन सक्दैन,’ ट्राफिक प्रमुख मैनालीले थपे, ‘अनि जथाभावी कुदाउने, ठोकाउने, न लडनुपर्ने ठाउँमा पनि लडेर दुर्घटना गराउनेमा यस्तै मोटरसाइकल बढी पाइएको छ ।’

जिल्ला ट्राफिक प्रहरी सागर दयालीका अनुसार सवारी नियम उल्लंघन गर्नेमा पनि यस्तै मोटरसाइकलको संख्या बढी देखिन्छ । उनका अनुसार आव ०७४/७५ मा ८ हजरा २ सय ६१ मोटरसाइकल कारबाहीमा परेका थिए । यी मोटरसाइकलबाट ५६ लाख ६० हजार जरिवाना असुल भएको थियो । सोधपुछका क्रममा अधिकांशले ससुरालीबाट पाएको बताएका थिए । यसरी कारबाहीमा परेका कतिपयले जरिवाना तिर्न पनि श्रीमतीमार्फत ससुरालीमा दबाब दिएको जनाइएको छ ।

कारबाहीमा परेका मोटरसाइकलले दुईभन्दा बढी चढनु र चढाउनु उनीहरूका लागि सामान्य हो । ‘हेलमेट पनि लगाएका हुँदैनन्,’ ट्राफिक हवल्दार गणेश यादवले सवारी नियमनमा दाइजोले पारेको विकृति सुनाए ‘किन नलगाएको ? भन्दा ससुरालीले मोटरसाइकल मात्र दियो हेलमेट दिए पो लगाउनु भनी ओठे जवाफ फर्काउँछन् ।’

ट्राफिक प्रमुख मैनालीका अनुसार आव ०७४/७५ मा दुर्घटना बढने कारण सवारी संख्या बढनु पनि हो । आव ०७३/७४ मा महोत्तरीमा ७४ दुर्घटनामा २९ को मृत्यु भएको थियो । त्यो बढेर आव ०७४/७५ मा ८७ दुर्घटनामा ४४ जनाको ज्यान गुमाए ।‘कारण बर्सेनि लगनका बेला सवारी संख्या हवात्तै बढने गरेको छ,’ मैनालीले भने, ‘दाइजो रोक्न सके अस्वाभाविक रूपमा सवारी संख्या बढने थिएन र दुर्घटना र सवारी नियम उल्लंघनका घटना पनि बढने थिएनन् ।’

जिल्लाका मोटारसाइकल सोरुमले विवाह लगनको महिनामा बढी मोटरसाइकल बिक्री हुने गरेको जनाएको छ । सदरमुकाम जलेश्वरमा विभिन्न उत्पादन कम्पनीका आधादर्जनभन्दा बढी सोरुम छन् । ती सोरुमबाट लगनको समयमा हजारभन्दा बढी मोटरसाइकल बिक्री भएको जनाइएको छ । बजाज सोरुमका सुनिल राउतका अनुसार उनको सोरुमाबाट वैशाख र असारको लगनमा २ सय ५० जति मोटरसाइलक बिक्री भएको थियो ।

प्रकाशित : भाद्र १०, २०७५ ०९:११
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT