सुख्खा बन्दरगाह: जग्गा अधिग्रहण गरिने

शंकर आचार्य

पर्सा — वीरगन्जस्थित सिर्सिया सुख्खा बन्दरगाह र एकीकृत सुरक्षाजाँच चौकी बीचको ६२ बिघा जग्गा अधिग्रहण प्रक्रिया तीव्र पारिने भएको छ । बिहीबार जिल्ला प्रशासन कार्यालयमा प्रमुख जिल्ला अधिकारी लोकनाथ पौड्यालको अध्यक्षतामा बसेको सरोकारवालाहरूको बैठकले यस्तो निर्णय गरेको हो ।

अधिग्रहण गर्न लागिएको सिर्सिया सुक्खा बन्दरगाह र आईसीपी बीचको जग्गा । तस्बिर : शंकर

सिर्सिया सुक्खा बन्दरगाह भन्सार कार्यालय प्रमुख सूर्य सेढाईका अनुसार बैठकले जग्गा प्राप्ति ऐन २०३४ अनुसार जग्गा, त्यसमा रहेका घर, रूख आदि सम्पूर्ण चल अचल सम्पत्तिको मूल्यांकन प्रक्रियालाई तीव्र रूपमा अघि बढाउने निर्णय गरेको छ । ‘बैठकले यो काममा अब एक दिन पनि खेर नजाने गरी अघि बढने निर्णय गरेको छ,’ सेढाईले भने, ‘सम्पत्तिको अविलम्ब मूल्यांकन गर्ने र त्यस अनुसार मुआब्जा वितरण अघि बढाउने निर्णय पनि बैठकले गरेको छ ।’

जग्गाको अवस्थितिका बारेमा यसअघि जिल्ला मालपोत र नापी कार्यालयसँग लिएको विवरण सार्वजनिक गर्ने निर्णय समेत बैठकले गरेको छ । ‘यसो गर्दा जग्गाको यकिन अवस्थितिबारे जानकारी हुन्छ,’ सेढाईले भने, ‘त्यसमा कुनै त्रुटि वा कसैको दाबी विरोध आदि केही हुन्छ भने त्यसबारे पनि जानकारी आउँछ, त्यसपछि मुआब्जा प्रक्रियामा जान सहज हुन्छ ।’

Yamaha

दुबै संरचनाका बीचमा २ सय ९७ जग्गाधनीको करिब १ हजार ४ सय कित्ता जग्गा छ । त्यहाँ २०२१ र २०५५/५६ मा गरी २ पटक जग्गा नापी गरिएको छ । सबै जग्गाको अवस्थाबारे अन्तिम यकिन भएपछि प्रमुख जिल्ला अधिकारी संयोजक रहने मुआब्जा समितिको निर्णयले मुआब्जा वितरणको काम सुरु गर्नेछ ।

जग्गा अधिग्रहण प्रयोजनको प्रारम्भिक कारवाही चलाएर सरकारी निर्णय कार्यान्वयनका लागि अर्थ विभागले वैशाख ८ को निर्णयबाट सेढाईलाई प्रारम्भिक अधिकारी चयन गरेको हो । मुलुककै यी दुई ठूला आयोजनाको बीचमा रहेको खल्वाटोला गाउँ र स्थानीयको खेत समेत सरकारले अधिग्रहण गर्न लागेको हो ।

नेपाल सरकारको २०७३ को पुस १७ निर्णयले यो अधिग्रहण प्रक्रिया अघि बढेको हो । करिब डेढ दशकअघिदेखि सञ्चालनमा आएको सिर्सिया सुख्खा बन्दरगाह र चैत मसान्तदेखि सञ्चालनमा आएको एकीकृत सुरक्षा जाँच चौकीको बीचमा खल्वाटोला गाउँ र स्थानीयको खेत पर्छ । यी दुई ठूला संरचनाबीच रहेको यो टोललाई अधिग्रहण गरेमा दुबै संरचना एक अर्कासँग जोडिनेछन् ।

हाल सञ्चालनमा रहेको सिर्सिया सुख्खा बन्दरगाह साँघुरो भएको छ । आईसीपी सञ्चालनमा आएपछि दुबै भन्सारबाट गरी हाल करिब १ हजार मालवाहक सवारीको आवागमन यस क्षेत्रमा भइरहेको छ । दुबै संरचना हाल र भविष्यमा साँघुरो भएर पूर्ण उपयोगमा ल्याउन समस्या हुने भएकाले सरकारले दुबै परियोजनाको बीचमा रहेको खाली जग्गालाई अधिग्रहण गर्ने योजना बनाएको हो ।

आईसीपी पूर्ण रूपमा सञ्चालनमा आएपछि मुलुकबाट आयात निर्यात हुने ८० प्रतिशत मालबस्तु यही नाकाबाट आयात निर्यात हुने सम्भावना छ । हाल निर्माणाधीन वीरगन्ज पथलैया ६ लेन सडक, सिमराको विशेष आर्थिक क्षेत्र, निजगढ–काठमाडांै द्रुत मार्ग र निजगढ अन्तर्राष्ट्रिय विमानस्थल समेत भविष्यमा निर्माण भएर सञ्चालनमा आएपछि सुख्खा बन्दरगाह र आईसीपीमा आयात निर्यात बढेर वीरगन्ज आर्थिक हबका रूपमा स्थापित हुने प्रवल सम्भावना छ ।

यही सम्भावना देखेर वीरगन्ज तथा आईसीपी भन्सार समेतको जिम्मेवारी सम्हाल्न केन्द्रले पठाएको सहसचिव श्याम भण्डारीले सोमबारबाट कार्यभार सम्हालिसकेका छन् । यसअघि वीरगन्ज भन्सारको जिम्मेवारी उपसचिव स्तरका कर्मचारीले सम्हाल्दै आएका थिए । अब सहसचिवमुनि २ उपसचिव रहनेछन् ।

तीमध्ये एक उपसचिव गोपाल खत्रीले पनि सोमबार बाटै जिम्मेवारी सम्हालेका छन् । अर्का उपसचिवको दरबन्दी पनि सृजना भइसकेको छ । तर भन्सार विभागले कसलाई यहा पठाउँदैछ भनी निर्णय भइसकेको छैन ।

Esewa Pasal

प्रकाशित : भाद्र २२, २०७५ ०९:५२
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT

पति र जेठाजुबाट नवविवाहिता बलात्कृत

कान्तिपुर संवाददाता

पर्सा — एक नवविवाहिता महिला आफ्नै पति र जेठाजुबाट सामूहिक बलात्कारमा परेको घटना सार्वजनिक भएको छ ।

प्रतिकात्मक तस्बिर

आफ्नै पत्नी र भाइ बुहारीलाई सामूहिक बलात्कार गरेको आरोपमा पति र जेठाजुलाई जिल्ला अदालतले पुर्पक्षका लाग जेल चलान गरेको छ ।

पर्सा जिल्ला अदालतका न्यायाधीश सूर्य प्रसाद अधिकारीको इजलासले पोखरिया नगरपालिका १ वनकटवाका २७ वर्षीय राजकपुर ठाकुर र उनका दाजु ४० वर्षीय सुरेन्द्रलाई बुधबार जेल चलान गरेको हो ।

राजकपुरकी २० वर्षीया पत्नीले पति र जेठाजु मिलेर आफूलाई पटकपटक जबर्जस्ती र सामूहिक बलात्कार गरेको जाहेरी साउन २२ गते जिल्ला प्रहरी कार्यालयमा दिएकी थिइन् । त्यसपछि प्रहरी सक्रिय भएर दुबै आरोपितलाई पक्राउ गरेको हो ।

उनी र राजकपुरबीच यसै वर्षको असार ७ गते परम्परागत मागी विवाह भएको हो । पतिको घरमा पुगेपछि जेठाजु सुरेन्द्र घरमा हावी भएको अनुभूति आफूले गरेको उनले जाहेरीमा उल्लेख गरेकी छन् ।

असार ११ गते राति करिब ११ बजेको समयमा आफू पति राजकपुरसँग घरको कोठामा रहेको बेला जेठाजु सुरेन्द्र पनि आफ्नो कोठामा प्रवेश गरेको उनले जाहेरीमा उल्लेख गरेकी छन् । ‘जेठाजुलाई मुख देखाउन नहुने, जिउ छुन नहुने परम्परा रहेकाले म कोठा बाहिर निस्कन खोज्दा पति राजकपुरले मेरो हात समातेर हामी दाजुभाइ एक हौं,’ जाहेरीमा लेखिएको छ, ‘हामीसँग संकोच मान्नु पर्दैन भन्दै मलाई सुत्ने पलंगमा बसाए र दाजु सुरेन्द्रलाई पनि पलंगमा आउन संकेत गरे ।’

जाहेरीमा लेखिएको छ, ‘यसरी दुवै दाजु भाइ मेरो पलंगमा बसी मलाई सुमसुम्याउन थालेपछि मैले विरोध गरें, मैले विरोध गर्ने बित्तिक्कै मलाई जेठाजु सुरेन्द्रले बलपूर्वक दुवै हात समाई पलंगमा पछारी ममाथि चढे ।’ आफ्नो संरक्षण गर्नुपर्ने दायित्व भएका पति राजकपुरले झन् आफ्नो लुगा खोली मुख थुनी दाजु सुरेन्द्रलाई जबर्जस्ती करणी गर्न सघाएको उनले जाहेरीमा दाबी गरेकी छन् ।

जेठाजु सुरेन्द्रले आफ्नो अस्मिता लुटेपछि पतिले पनि जबर्जस्ती गरेको उनले उल्लेख गरेकी छन् । आफूले यसको विरोध गर्दा धारिलो चक्कु देखाई कसैलाई भने वा केही बोले ज्यान मार्ने धम्की दिएको उनले जाहेरीमा उल्लेख गरेकी छन् । यसरी आफू पटकपटक बलात्कृत हुँदै आएको उनले दाबी गरेकी छन् ।

पति र जेठाजु दुबै काठमाडौंमा रोजगारी गर्ने र आफूलाई पनि काठमाडौं जान पटकपटक दबाब दिएकोमा आफूले माइतीमा आएर आमालाई बताएपछि प्रहरीलाई उजुरी गर्न आएको उनले जाहेरीमा उल्लेख गरेकी छन् ।

आरोपित राजकपुर र सुरेन्द्रले आफूहरू उपरको आरोप निराधार रहेको बयान अदालतमा दिएका छन् । न्यायाधीश अधिकारीले आरोपित ठाकुरद्वयलाई मुलुकी ऐन २०७४ को दफा ६७(१) को आधारमा थुनामा राखी मुद्दाको पुर्पक्ष गर्न ऐनको ८० नम्बर बमोजिमको थुनुवा पुर्जी दिई कारागार पठाउन आदेश दिएका छन् ।

थुनछेक प्रयोजनमा उनका तर्फबाट जिल्ला न्यायाधीवक्ता रुद्रप्रसाद सुवेदी, अधिवक्ताहरू रामनारायण कुर्मी, दीपनारायण उपाध्याय र अन्जन अधिकारीले बहस गरे । प्रतिवादीहरूका तर्फबाट अधिवक्ताद्वय सुधिरकुमार कर्ण र प्रमोद प्रसादले बहस पैरवी गरेका थिए ।

प्रकाशित : भाद्र २२, २०७५ ०९:५०
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT