३ दिनदेखि उठेन फोहोर

स्रोतसाधन र सुविधाको वृद्धिका लागि कर्मचारी धर्नामा
धर्नामा बसेका कर्मचारी पक्राउ
‘जनप्रतिनिधि आउनुभन्दा अघि कर्मचारीले सफासुग्घर राखेका थिए’
लक्ष्मी साह

बारा — कलैया उपमहानगरपालिकाका सरसफाइकर्मी (स्विपर) विभिन्न माग राख्दै हडतालमा उत्रेपछि तीन दिनदेखि नगरको फोहोर उठेको छैन ।

यसले बजार क्षेत्रमा दुर्गन्ध फैलिएको छ । फोहोरको गर्मीको मौसम त्यसमाथि दुर्गन्धले नगरवासी पीडित बनेका छन् । ९६ जना सरसफाइकर्मी कलैयाको भरत चोकमा विभिन्न माग राखी बुधबारदेखि धर्नामा बसेका छन् ।

नगरपालिकाले स्रोतसाधन र सुविधा नबढाएको विरोधमा उनीहरू धर्नामा बसेका हुन् । ‘२६ वर्षदेखि कार्यरत छु । नगरपालिकाले स्रोतसाधन र सुविधा बढाएकै छैन,’ सरसफाइकर्मी सुधीर राउतले भने ।

Yamaha

तलब बढाउनुपर्ने, नियुक्ति पाउनुपर्ने, दसैं खर्च दिनुपर्ने, स्थायी प्रक्रियाअघि बढानुपर्ने र फोहोर उठाउँदा प्रयोग गरिने गेम्बु जुत्ता, पोसाक, पन्जा, मास्क उपलब्ध गराउनुपर्ने माग राख्दै हडतालमा उत्रेका कर्मचारीलाई शुक्रबार प्रहरीले पक्राउ गरेको छ । ‘३ दिनदेखि फाहोर घरमै कुहिएको छ,’ कलैया उपमहानगरपालिका ४ का रामस्वरूप पण्डितले भने, ‘फाहोर घरबाहिर सडकमा फ्याँकु भने सर्वसाधारणलाई दु:ख हुन्छ । घरमा राखौं भने आफैं पीडित बन्नुपरेको छ ।’

फोहोरको दुर्गन्धले पसलमा बसिनसक्नु भएको कलैया बजारका व्यापारी वीजय स्वर्णकारले गुनासो गरे । ‘३ दिनदेखिको फोहोरको थुप्रो उठेको छैन,’ उनले भने, ‘पसल अगाडि नै थुप्रोले बस्नै नसक्ने भएको छ ।’

सदुपयोग भएन आम्दानी
उपमहानगरपालिकाले नगरको बजार क्षेत्रबाट वार्षिक ८५ लाख आम्दानी गर्दै आएको छ । तरकारी, बाख्रा तथा कृषि बजार, पटके सवारी र शौचालयको ठेक्कापट्टाबाट हुने आम्दानीको तुलनामा नगरपालिका नगरवासीका लागि सुविधा दिन चुकेको छ ।

उसले बर्सेनि १ करोड ३० लाख सरसफाइका लागि जनशक्ति, स्रोतसाधन र बजारको व्यवस्थापनमा खर्चिने गरेको छ । यसपालि २ करोड खर्चिने योजना बनाएको छ । तर बजार क्षेत्रको अवस्था भने अव्यवस्थित सेकुवा पसलको धुँवा, जताततै फालिएको फोहोरैफोहोर र मुख्य बजारमा खाल्डाखुल्डीमा जमेको पानीले नगरवासी अस्तव्यस्त छन् ।

फोहोर र खाल्डाखुल्डीमा जमेको पानीले नगरअन्तर्गतको मुख्य चोक, बजार क्षेत्र र गल्ली पनि प्रभावित छ । तरकारी बजारमा झनै फाहोर छ । ‘नियमित सरसफाइका लागि लगातार गुनासो गर्दा र दबाब दिँदा सफाइ गरिँदैन । मनलागे सफाइ गर्ने मन नलागे नगर्ने अवस्था छ,’ फलफूल तथा तरकारी व्यवसायी समितिका अध्यक्ष दीपलाल साह तेलीले भने, ‘हाकिम र मेयर सबैलाई गुनासो सुनाएका छौं । तर सुन्नुहुन्न । र अनुगमन गर्न पनि आउनुहुन्न ।’ भरत चोक र मुख्य बजारमा रहेका २ वटा चर्पीको दुर्गन्ध सेवाग्राहीले थामिनसक्नु छ ।

ट्याङकी फुटेर छतबाट पानी चुहिने क्रम रोकिएको छैन । चर्पीसँगै रहेको चापाकलको पानी दुर्गन्धले सर्वसाधारण पिउन रुचाउँदैनन् । नगरको तरकारी र माछामासु बजार क्षेत्र फोहरै फोहोरले भरेको देखिन्छ ।

मुख्य सडकमै बनाइने सेकुवाको धुँवाले आगन्तुक तथा नगरवासी पीडित छन् । यी समस्याले पीडित बनिरहँदा नगरपालिका कार्यालयले त्यसको ठोस व्यवस्थापन गर्न स्रोतसाधन र जनशक्ति जुटाउन नसकेपछि पीडित बन्नु परेको सरकोकारवाला बताउँछन् । ‘नगरपालिकाले कर लिन्छ, सुविधा दिँदैन । फोहोरले माछामासु पनि हामीलाई बिक्री गर्न चित्त बुझदैन्,’ माछामासु व्यवसायी संघका अध्यक्ष भोला मियाँले भने, ‘कीटनाशक औषधि पनि छर्दैनन् ।

जनप्रतिनिधिभन्दा बढी बरु कर्मचारीले पहिला सफासुग्घर राख्ने गरेका थिए ।’ बजार क्षेत्रभरि नै खाल्डाखुल्डीमा नाला र बर्खाको पानी जमेकाले यात्रुलाई समेत सास्ती हुने गरेको छ । बेलाबखतमा धार्मिक स्थल सिद्धेश्वर र राम मन्दिरमा फोहोर भएपछि सेना, प्रहरी र स्थानीय युवाले कहिलेकाहीँ सरसफाइ गर्दै आएका छन् । ‘नगरपालिकाले सफाइका लागि दीर्घकालीन योजना बनाउन सकेको छैन,’ स्थानीय युवा नेता मुकेश साहले भने, ‘नगरको सबै प्राय: नालाहरूमा फोहोर थुनिएको छ ।’

Esewa Pasal

प्रकाशित : भाद्र २३, २०७५ ०९:३०
ADVERTISEMENT
प्रतिक्रिया
पठाउनुहोस्
ADVERTISEMENT

कर वृद्धिको विरोधमा धर्ना

भरत जर्घामगर

सिरहा — कर वृद्धिको विरोधमा मिर्चैयामा व्यवसायी, पूर्व जनप्रतिनिधिसहित नगरवासी नगरपालिकाको वडा नम्बर १२ कार्यालयमा धर्ना बसेका छन् ।

सिरहाको मिर्चैया नगरपालिकाले कर वृद्धि गरेको विरोधमा वडा नम्बर १२ कार्यालयमा धर्नामा बसेका नगरबासी । तस्बिर : भरत

व्यवसायी, पूर्वजनप्रतिनिधिसहित नगरवासीद्वारा गठित संयुक्त संघर्ष समितिले विरोध र्‍याली गरी मिर्चैया नगरपालिकाका विभिन्न वडा कार्यालयमा धर्ना दिएका छन् ।

मिर्चैया नगरपालिकाले मालपोत, घरजग्गा, एकीकृत सम्पत्ति करदेखि परेवा, हाँस र कुखुरा लगायत राष्ट्रिय राजमार्गको घरधुरीमा समेत व्यापक कर निर्धारण गरेको भन्दै व्यवसायी, पूर्वजनप्रतिनिधि सहित नगरवासीद्वार गठित संयुक्त संघर्ष समति चरणबद्ध रूपमा विरोधमा उत्रिएका हुन् ।

‘वृद्धि गरेको कर फिर्ता गर, भ्रष्टाचार बन्द गर, स्थानीय सरकार मुर्दावाद’ भन्दै उनीहरू चौथो दिन शुक्रबार पनि धर्नामा बसेका छन् । आव ०७५/७६ मा निर्धारण गरेको कर सर्वसाधारणको आर्थिक हैसियतभन्दा माथि रहेको भन्दै संयुक्त संघर्ष समितिले विरोध जनाउँदै जनताको ढाड सेक्ने गरी निर्धारण गरेको भन्दै कर स्थगन गरी सर्वपक्षीय सहमतिबाट निर्धारण गर्न माग गर्दै मेयर श्रवण यादवलाई गत साउन २९ गते ज्ञापनपत्र बुझाएका थिए ।

ज्ञापनपत्रमा संयुक्त संघर्ष समितिले नगरपालिकाले लिइरहेको नयाँ कर, शुल्क र राजस्व पूर्ण रूपमा स्थगित हुनुपर्ने, पुरानो कर पनि संशोधनपश्चात मात्र लागू गर्नुपर्ने लगायत ८ बुँदे माग पेश गरेका थिए ।

ज्ञापनपत्र बुझदै मेयर यादवले भदौ १५ गतेभित्र माग सम्बोधन गर्ने आश्वासन दिए पनि कुनै सुनुवाइ नभएपछि चरणबद्ध विरोधमा उत्रन बाध्य भएको मिर्चैया उद्योग वाणिज्य संघका बरिष्ठ उपाध्यक्ष अरुण सिंहले बताए ।

आव ०७४/७५ को वडा र नगरस्तरीय योजनाको लागत इस्टिमेटसहित मूल्यांकन विवरण उपलब्ध गराउनुपर्ने, विभिन्न निकायबाट नगरपालिकामा दाखिला भएको आम्दानीको विवरण उपलब्ध गराउनुपर्ने, कोटेसन र सडक बोर्डको कार्यको विवरण उपलब्ध गराउनुपर्ने, आन्तरिक कोषबाट नियुक्ति गरिएका कर्मचारीको विवरण उपलब्ध गराउनुपर्ने माग संघर्ष समितिले
राख्दै आएको छ ।

त्यसैगरी घटना दर्ता, मृत्यु दर्ता, विवाह दर्ता, बसाइँसराइ नि:शुल्क हुनुपर्ने र विभिन्न शीर्षकमा वडा र नपामा खरिद भएका सामग्रीको भुक्तानीको विवरण उपलब्ध गराउनुपर्ने माग राख्दै नगर प्रमुखलाई ज्ञापनपत्र बुझाएका थिए ।

प्रकाशित : भाद्र २३, २०७५ ०९:२९
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT