छोरी पढाउन साइकल

लक्ष्मी साह

बारा — महागढीमाई नगरपालिकाले शिक्षाका लागि विद्यालयमा पहुँच बढाउन छात्रालाई ‘छोरी शिक्षा’ अन्तर्गत साइकल उपलब्ध गराएको छ । नगर क्षेत्रको विभिन्न विद्यालयमा कक्षा ९ मा अध्ययनरत २ सय १ छात्रालाई साइकल उपलब्ध गराएको हो ।

बाराको महागढीमाई नगरपालिकाले उपलब्ध गराएको साइकल । तस्बिर : लक्ष्मी

गरिबी, अशिक्षा र चेतना अभावलगायतले विद्यालय छाडेर घरमै कामकाज गर्नुपर्ने अवस्थाकी छात्रालाई पुन: विद्यालय आउजाउका लागि नगरपालिकाले साइकल उपलब्ध गराउने योजना बनाएको छ । शिक्षाका लागि विद्यालयमा पहुँच बढाउन छात्रालाई ‘छोरी शिक्षा’ अन्तर्गत साइकल वितरण गरिएको नगर प्रमुख उपेन्द्र यादवले बताए ।

‘प्रदेश सरकारको छोरी पढाउने अभियानलाई सघाउ पुर्‍याउन यस्तो योजना ल्याइएको छ,’ उनले भने, ‘यसले छात्रा र अभिभावकको शिक्षाप्रतिको मनोबल उच्च भएको छ ।’ ८ कक्षा पढेर छाडेकी छात्राहरूलाई पुन: विद्यालय पुर्‍याउन पनि साइकल वितरण गरिन उनले बताए । नगर प्रमुख यादवका अनुसार तल कक्षाबाट दु:ख गरेर अभिभावकले छोरीलाई पढाउँछन् । तर छोरीहरू नौ कक्षा पुग्दा नपुग्दै अभिभावकले पढाइ छुटाइदिन्छन् । यही दुर्भाग्यलाई हटाउन साइकल उपलब्ध गराउने छौं ।

Yamaha


‘पढाइमा इच्छा शक्ति हुने, तर साधनस्रोत अभाव र अभिभावकको नाकारात्मक भावनाले कतिपय छात्राहरू गृहिणीका रूपमा घरमा बसेको पाइन्छ,’ उनले भने, ‘त्यसैले यसलाई हटाउन छोरी शिक्षाअन्तर्गत साइकल वितरण योजना ल्याइएको छ ।’ साइकल वितरणले टाढाटाढाबाट विद्यालयमा पढ्न आउने छात्राहरूलाई आउजाउ सजिलोसँगै शिक्षाप्रति साहस र आकर्षण बढने उनले विश्वास व्यक्त गरे । नगरको शिक्षाको गुणस्तर बृद्धि नगर भरिका विद्यालयहरूमा कक्षा ६ देखि कम्प्युटर शिक्षा लागू गर्न नगरपालिकाले योजना बनाएको छ ।


विद्यालयहरूमा विषयगत शिक्षकहरूको अभाव रहेकोले चाँडै दरबन्दी मिलान गरी प्रत्येक विद्यालयहरूमा विषयगत शिक्षकको व्यवस्था गरिने नगरपालिकाका अधिकारीले जनायो । गढीमाई महेन्द्र प्राविधिक नमुना माध्यमिक विद्यालयका ७९ जना, भोला माविका ८७ र नेपाल राष्ट्रिय मावि बबुआइनका ३५ जना गरी २ सय १ छात्रालाई नगरपालिकाले साइकल वितरण गरेको हो ।


शिक्षामा लगानी
नगरपालिकाले गत आव ०७४/७५ मा नगरका अधिकांश विद्यालयमा शैक्षिक अवस्था सुधारका लागि लगानी गरेको छ । कम्प्युटर, फर्निचर, महिला तथा पुरुष शौचालय, शुद्ध पानी पिउन चापाकल, गर्मी छल्न पंखा तथा वाटर फिल्टर मेसिनलगायत भौतिक संरचना तयार गर्न बजेट उपलब्ध गराएको छ ।


विद्यालयमा शुद्ध खानेपानीको लागि चापाकल नगरपालिकाका अनुसार नेराप्रावि पिप्राविर्तामा पर्खाल निमार्णको ४ लाख, लालीगुराँस प्रावि कवहीजब्दीमा पर्खाल तथा गेट निमार्ण गर्न २ लाख, रामजानकी प्रावि बरियारपुरमा छत ढलान गर्न २ लाख ५० हजार, भोला मावि गंजभवानीपुरमा अधुरो भवन निमार्ण गर्न ४ लाख गराइएको छ ।

यसैगरी नेरामावि पिप्राढी बेनौलीमा पर्खाल निमार्ण गर्न ९ लाख, गडबडामाई विद्यालयमा फर्निचर खरिद गर्न २ लाख, नगरभरिका विभिन्न निमावि र माविमा ८ लाख ५० हजारको कम्प्युटर वितरण गरिएको छ ।

प्रकाशित : भाद्र २५, २०७५ ०९:३०
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

निष्क्रिय संघ–संस्था खारेजीको तयारी

कान्तिपुर संवाददाता

पर्सा — पछिल्लो केही वर्षयता गैरसरकारी संस्था खोल्ने तर निरन्तरता नदिने प्रवृत्तिलाई जिल्ला प्रशासनले अंकुश लगाउने तयारी गरेको छ ।

कार्यालयमा दर्ता भएर पनि निष्क्रिय रहेका तथा नवीकरणसमेत नगरिएका संघ–संस्थालाई जिल्ला प्रशासन कार्यालयले खारेजीको गृहकार्य गरिरहेको छ । कार्यालयका सूचना अधिकृत षड्कुमार पोखरेल संस्था दर्ता ऐन २०३४ अनुसार आव ०३७/३८ देखि कार्यालयमा संघसंस्था दर्ता हुन थालेका हुन् । यसरी हालसम्म कार्यालयमा २ हजार १ सय १४ संघसंस्था दर्ता रहेकामा तीमध्ये मुस्किलले २५ प्रतिशत मात्र सक्रिय रहेको अनुमान गरिएको छ ।


सक्रिय नरहेका संघ–संस्था खारेज नगरिए पनि केन्द्रले त्यसबारे चासो लिएकाले यस सम्बन्धमा आन्तरिक रूपमा आवश्यक गृहकार्य भने भइरहेको उनले बताए । ‘केन्द्रले हामीसँग जिल्लामा दर्ता रहेका संघसंस्था र तिनीहरू पछिल्लो समय नवीकरण भए नभएको जानकारी समेत मागेको छ,×’ उनले भने, ‘हामीले त्यसै अनुरूप केन्द्रलाई सम्पूर्ण जानकारी गराइसकेका छौं, अब केन्द्रको थप निर्देशनको प्रतीक्षा गरी रहेका छौं ।’


सामान्यत: ३ वर्षसम्म नवीकरण नगरी निष्क्रिय रहने गरेका संघसंस्था खारेज गर्ने गरिएको उनले बताए । जिल्लामा दर्ता रहेका संघसंस्थाहरूमध्ये धेरै सो महिला, विकास, वातावरण, खेलकुद क्षेत्रमा कार्य गर्ने उद्देश्यले गठन भएको पाइएको उनले बताए । जिल्लामा हाल कार्यरत गैरसरकारी संस्थाहरूमध्ये मुस्किलले १ सय हाराहारीमा मात्र सक्रिय रहेका छन् । बाँकी गैसस निष्क्रिय नै रहेका छन् । २०४६ सालको राजनीतिक परिवर्तनपछि गैरसरकारी संघसंस्था खोल्ने लहरनै चलेको हो । तर उत्साहले संघसंस्था खोल्ने मध्ये अधिकांश त्यसपछि आफंै निष्क्रिय हुने गरेका छन् ।

प्रकाशित : भाद्र २५, २०७५ ०९:२९
पूरा पढ्नुहोस्
प्रतिक्रिया
पठाउनुहोस्