पाइपलाइन परियोजनामा ‘ड्रिलिङ’

शंकर आचार्य

पर्सा — निर्माणाधीन अमलेखजन्ज–रक्सौल–मोतिहारी तेल पाइपलाइन परियोजनाअन्तर्गत बाराको जितपुरमा स्थानीयले जग्गा नदिए जमिन मुनिबाट पाइप लग्ने सम्भावना छ ।

मोतिहारी–रक्सौल–अमलेखगन्ज तेल पाइपलाइन परियोजनाअन्तर्गत बाराको जितपुर–परवानीपुर खण्डमा नालामुनि ड्रिलिङ गरेर पाइपलाइन गाड्ने काम गरिँदै । तस्बिर : शंकर

मोतिहारी–अमलेखगन्ज पेट्रोलियम पाइप लाइन प्रोजेक्टका इन्जिनियर शरदप्रसाद पौडयालका अनुसार जितपुरबाहेक अन्य क्षेत्रमा काम धमाधम भई रहे पनि जितपुरको समस्या समाधान भएकाले विकल्पको रूपमा ‘ड्रिलिङ’ गरेर भए पनि पाइपलाइन लान सकिने सम्भावना रहेको छ । ‘हालसम्म जितपुरको समस्या समाधान हुन सकेको छैन,’ उनले भने, ‘पाइपलाइनको बाटामा पर्ने नालामा हाल जारी ड्रिलिङ जस्तै जितपुरमा पनि स्थानीय सहमतिमा नआए ड्रिलिङ गरेर भए पनि पाइपलाइनको कामलाई निरन्तरता दिन सकिन्छ ।’


हाल जितपुरदेखि दक्षिण र परवानीपुरदेखि उत्तरतर्फ ८/१० स्थानमा यसरी नाला मुनिबाट पाइप ड्रिलिङ गर्ने काम भइरहेको उनले बताए । ‘यसरी ड्रिलिङ गर्न थोरै क्षेत्रमा मात्रै गरेर नपुग्ने रहेछ,’ उनले भने, ‘कम्तीमा एक सय मिटरजति पाइप जमिनमुनि छिराउनुपर्ने रहेछ ।’

Yamaha


जितपुर बजारमा १ हजार ८ सय मिटर पाइप ओछ्याउनुपर्नेमा त्यहाँ स्थानीयले पाइपलाइनका लागि जग्गा दिन ढिलाइ गरे अन्तत: यसरी नै पाइप ड्रिल गरेर जमिनमुनि ओछ्याइने उनले बताए । त्यसो भए यो परियोजनाकै सबैभन्दा ठूलो ड्रिलिङ गरिएको क्षेत्र हुनेछ ।


जितपुरको समस्या समाधान हुने सम्भावना अझै पनि रहेको र पर्सा राष्ट्रिय निकुञ्ज क्षेत्रमा पर्ने करिब ५ हजार रुख काट्ने अनुमति पनि पाउने सम्भावना नजिकिएकाले परियोजनाको कामले अब गति लिने सम्भावना रहेको उनले बताए ।


वर्षाकै बीच पनि परियोजनाको काम भने हाल जारी नै रहेको पौड्यालले बताए । हाल सिमरादेखि जितपुरको बीचमा परियोजनाको काम भइरहेको छ । हालसम्म नेपालतर्फ १७ किमिभन्दा केही बढी पाइप ओछ्याइसकिएको उनले जानकारी दिए । भारततर्फ नेपालभन्दा दु्रत गतिमा काम हँुदै गरेकाले त्यहाँ करिब २५ किमि पाइप ओछ्याइसकिएको छ ।


नेपालतर्फ वीरगन्जस्थित नेपाल भारत सीमादेखि अमलेखगन्जस्थित आयल निगमको डिपोसम्म गरी ३६ किमि पाइप ओछ्याउनुपर्नेछ । हालसम्म पथलैया काँटादेखि सिमरा हुँदै जितपुरसम्म, वीरगन्जको बाइपास क्षेत्रमा बढी काम भएको छ ।


वीरगन्जस्थित नेपाल भारत सीमा क्षेत्रमा १ किमि, जितपुर बजार, परवानीपुर बजार र पथलैया काँटादेखि उत्तर राष्ट्रिय वन र पर्सा राष्ट्रिय निकुञ्जको वन क्षेत्र हुँदै अमलेगखन्जसम्म पाइप लाइनको काम पूर्ण रूपले बाँकी छ । यो परियोजनाअन्तर्गत भारतको मोतिहारीदेखि रक्सौलसम्म ३३ दशमलव ७ सय किमि पाइप ओछ्याइँदै छ । यता रक्सौलदेखि अमलेखगन्जसम्म २६ दशमलव २ सय मिटर लामो पाइप लाइन ओछ्याइँदै छ ।


परियोजना लागत प्रतिकिमि भारु ४ देखि ५ करोड रुपैयाँ रहेकाले परियोजनाको कुल लागत झन्डै ३ सय ५० करोड भारु रहेको छ । यो परियोजनाअन्तर्गत फागुन २५ देखि पाइप लाइन ओछ्याउने काम सुरु गरिएको थियो । पाइप लाइन ओछ्याउने र वेल्डिङ गर्ने कामको ठेक्का भारत महाराष्ट्रको लिखित इन्फ्रास्टक्चर प्रालिले लिएको छ । परियोजनामा भारत महाराष्ट्रको सिमलेस लिमिटेडले उत्पादन गरेको स्टिल पाइप प्रयोग गरिँदै छ ।


इन्डियन आयल कर्पोरेसनको लगानीमा सञ्चालित यो परियोजनाका लागि नेपालले पाइप लाइन ओछ्याउने स्थान र वीरगन्जका केही स्थानमा नेपाल आयल निगमले मुआब्जा वितरणको कामबाहेक नेपाल सरकारको लगानी छैन ।


यसै परियोजनाअन्तर्गत अमलेखगन्जस्थित आयल निगम डिपोमा ४ वटा ट्यांकीको स्तरोन्नतिको काम पनि भइरहेको छ । भारत फरिदाबादको मोतिप्रभा इन्फ्राटेक प्रालिले यो काम गरिरहेको छ । पाइपबाट भारतबाट आउने इन्धन ती ओभरहेड ट्यांकीमा भण्डारण गरिनेछ । ३ हजार ९ सय किलोलिटर क्षमताका २ वटा, ४ हजार १ सय र १ हजार ५ सय केएलका १/१ वटा गरी ४ वटा ट्यांकी स्तरोन्तति गरिँदै छ जसमा कुल १३ हजार ४ सय केएल इन्धन भण्डारण हुनेछ ।

Esewa Pasal

प्रकाशित : भाद्र २८, २०७५ १०:०१
प्रतिक्रिया
पठाउनुहोस्
ADVERTISEMENT

बढ्यो अपराध

८ जिल्लामा चोरी, लुटपाट, हत्या, अपहरण र साना हतियारको चलखेल बढेको छ
सन्तोष सिंह

जनकपुर — सर्लाहीको ईश्वरपुर नगरपालिका–१३ महारानी बजारस्थित प्रहारी चौकी सँगै रहेको अनुपम आयल स्टोर्समा मंगलबार राति ३ लाख ६६ हजार ५ सय ८४ रुपैया नगद, एक थान कम्प्युटर मोबाइलसहित १० लाख मूल्य बराबरको चोरी भएको छ ।

सर्लाही सदरमुकाम मलंगवामा नगरपालिका–७ मुसैलीस्थित धान खेतको आलीमा आइतबार साँझ ४२ वर्षीया महिलाको शव फेला परेको हो । घाँस काटेर फर्किंदै गरेका स्थानीय महिलाले शव देखेपछि प्रहरीलाई खबर गरेका थिए । प्रारम्भिक अनुसन्धानबाट हेर्दा कतैबाट मारेर घिसारेर धान खेतको आलीमा फालिएको जिल्ला प्रहरी कार्यालयका प्रहरी नायब उपरीक्षक पुरषोत्तमप्रसाद पाण्डेले बताए ।


सर्लाहीको सीमावर्ती क्षेत्र बलरा नगरपालिका ३ का ६० वर्षीय जुगल प्रसादको साउन १७ गते हत्या भएको थियो । सर्लाहीमा दिनदिनै हत्या, चोरीका घटना बढ्दा स्थानीय त्रसित छन् । खुला सिमानाका कारण लुटपाट र चोरी घटना मौलाएको प्रहरी उपरीक्षक पोषराज पोखरेल स्विकार्छन् । व्यवसायी हत्याको अनुसन्धान भइरहेको उनले बताए ।


महोत्तरी, औरहीकी ९ महिने सोनाली चौधरीको भदौ १० गते अपहण गरेर हत्या भएको घटना सेलाउन नपाउँदै भंगहा नगरपालिका–६ भंगहा जमुनियामा भदौ २२ गते विस्फोट र गोली फायर गर्दै लाखौंको डकैती भयो । औरहीमा बालिका हत्या र भंगहामा लुटपाटको घटना अघि महोत्तरीको जाउखमा कन्चटमा पेस्तोल तेस्र्याएर असार ११ गते १६ लाख ५२ हजार नगद लुटिएको थियो ।


त्यसअघि गौशालाबाट बर्दिबास आउँदै गर्दा पेस्तोल देखाएर करिब ११ लाख लुटिएको थियो । बालिका हत्याको घटना सेलाउन नपाउँदै भंगहा नगरपालिका बम विस्फोट, गोली फायर गर्दै लुटपाट र हतियार देखाएर गौशाला र रजाउखमा भएको लुटपाटको घटनाले महोत्तरीमा त्रास छ ।


धनुषा, लक्ष्मिनिया बजारमा दुई साताअघि ३५ वर्षीय सञ्जय शर्मामाथि गोली प्रहार भयो । पेटमा गोली लागेका शर्मा काठमाडौंमा उपचार गराएर घर फर्केका छन् । जनकपुरबाट घरतर्फ जाँदै गर्दा शर्मामाथि गोली प्रहर भएको दुई दिनमा धनुषा प्रहरीले २ जनालाई हतियारसहित पक्राउ गरे ।


मिथिला नगरपालिका–१ बाट कटुवा पेस्तोलसहित गणेशमान चारनाथ नगरपालिका–२ का ३१ वर्षीय सन्तोष पासवान र जनकपुरको भानुचौकबाट महोत्तरीका सुनिल सहनिलाई हतियारसहित पक्राउ गरी प्रहरीले मुद्दा चलाएको छ । यसअघि एक महिनायता धनुषाको बटेश्वरमा गोली फायर गर्दै डकैती र मिथिला नगरपालिकामा पटक–पटक भएको चोरी घटनाले स्थानीय त्रसित छन् ।


जिल्ला प्रहरी कार्यालय धनुषाका प्रहरी नायब उपरीक्षक दीपेन्द्र साही आपराधिक घटनामा हतियारसहित पक्राउ गर्न सफल भएको दाबी गर्छन् । अपराधविहीन समाज त हुँदै हुँदैन, प्रहरी नायब उपरीक्षक साहीले भने, ‘हतियारसहित अपराधी पक्राउ गर्नु प्रहरीको सफलता हो ।’ दुई चार घटनालाई उनले समान्य रूपमा लिए ।


प्रदेश २ का ८ जिल्लामा चोरी, लुटपाट, हत्या, अपहरण र साना हतियारको चलखेल बढेको छ । चाडबाड नजिकिँदै जाँदा दिनहुँ हुने लुटपाटले स्थानीय त्रसित भएका छन् । प्रदेश २ को मुख्यालय जनकपुरमा नेपाल प्रहरीका डीआईजीकै नेतृत्वमा कमान्ड छ तर आसपासका जिल्लामा सुरक्षा अवस्था फितलो छ ।


दिनहुँ लुटपाट र हत्याका घटना बढे पनि प्रहरी अपराध नियन्त्रण गर्न असफल भएको छ । घरपरिवारका पुरुष वैदेशिक रोजगारमा भएका बेला गाउँटोलमा लुटपाट, चोरीडकैती बढेको छ ।

प्रकाशित : भाद्र २८, २०७५ ०९:५९
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT