शिक्षक सरुवा विवाद: उपमेयरलाई दुर्व्यवहार

पवन यादव

सिमरा — शिक्षक सरुवा विवादका कारण असन्तुष्ट विद्यार्थीले बिहीबार बरियारपुरमा महागढीमाई नगरपालिकाका उपमेयरलाई दुव्र्यवहार गरेका छन् । विवाद समाधान गर्न वार्तामा बस्नका लागि विद्यार्थीलाई सम्झाउने क्रममा उपमेयर तारा देवी कानुलाई दुर्व्यवहार भएको हो ।

गणित शिक्षक अर्को विद्यालयमा सरुवा भएपछि आन्दोलनमा उत्रिएका गढीमाई महेन्द्र प्राविधिक नमुना माविका विद्यार्थी । तस्बिर : पवन

गणित विषयको शिक्षकको नगर क्षेत्रकै अर्को विद्यालयमा सरुवा भएपछि स्थानीय गढीमाई महेन्द्र प्राविधिक नमुना माध्यमिक विद्यालयका विद्यार्थीहरू आन्दोलनमा उत्रिएका छन् । शिक्षक सरुवा समस्यालाई समाधान गर्न छलफलमा बस्नुपर्ने आग्रह गर्ने क्रममा आन्दोलनरत विद्यार्थीहरूको हुलबाट उपमेयरमाथि पानीले भरिएको बोतल प्रहर भएको प्रत्यक्षदर्शीले बताए ।


‘तपाईंहरू शान्त भई दिनुस्, वार्ताबाट हामी समस्या समाधान गर्न सक्छौं,’ उपमेयरले भन्दै थिइन्, ‘वार्ताबाटै समस्या समाधान हुन्छ, विश्वास गर्नुस् ।’ त्यही क्रममा उनीमाथि बोतल प्रहार भएको प्रत्यक्षदर्शीले बताए । उपमेयर कानुमाथि विद्यार्थीहरूको आडमा केही व्यक्तिहरूले गढीमाई मन्दिर नजिक बोतल प्रहार भएको स्थानीयले बताए ।

Yamaha


विद्यालयको कक्षा १० मा अध्ययनरत विद्यार्थीहरूले काज सरुवा भएको शिक्षक मनोज साह गोंढलाई फिर्ता गर्न माग गर्दै गएको मंगलबारदेखि चरणबद्ध आन्दोलनमा उत्रेका छन् । महागढीमाई नगरपालिकाका मेयर उपेन्द्र यादवसँग भएको कुराकानीमा उपमेयरमाथि हातपात भएको सुनिएको तर हातपात भएको हो होइन भने आधिकारिक जानकारी नआएको बाराका प्रमुख जिल्ला अधिकारी गणेश भट्टराईले बताए ।


‘हातपात भएको अधिकारिक जानकारी वा निवेदन हामी कहाँ आएको छैन,’ उनले भने, ‘हातपात हुने आशंका लागेपछि स्थानीय प्रशासनले सुरक्षाको प्रबन्ध मिलाएको छ ।’ यदी हातपात गरेको व्यक्तिको पहिचान खुलेमा कानुनी कारवाही गरिन्छ । महागढीमाई नगरपालिका क्षेत्रमा शान्ति सुरक्षा कायम गर्न आवश्यकताअनुसार सुरक्षाकर्मी परिचालन गरिएको उनले बताए । आन्दोलनमा उत्रिएका विद्यार्थीहरूले यसअघि विद्यालयमा आगजनी र तोडफोड समेत गरेका थिए ।


गढीमाई मन्दिर नजिक विद्यार्थीहरूले टायर बालेर प्रदर्शन गरिरहेका बेला वार्ता समिति बस्दा समेत विद्यार्थीहरू नआएपछि विद्यार्थीलाई वार्तामा बस्नका लागि उपमेयर कानुले आग्रह गर्न जांदा विद्यार्थीसँगै रहेका केही व्यक्तिले हातपात गर्दै दुव्र्यवहार गरेको महागढीमाई नगरपालिकाले दाबी गरेको छ ।


विद्यार्थीहरू आन्दोलनमा उत्रेपछि नगरपालिकाले वडा नं. १ का वडा अध्यक्ष सुदामा साह कानुको अध्यक्षतामा १७ सदस्यीय छानबिन तथा समन्वय समिति गठन गरेको छ । आन्दोलित विद्यार्थी र विद्यार्थीसँग रहेका केही व्यक्तिले बरियारपुर बजार, इनर्वा बजार बन्द गराएका छन् ।


छानबिन समितिले दिएको प्रतिवेदनअनुसार माग पूरा गर्ने सार्वजनिक रूपमै पटकपटक प्रतिबद्धता दिएको महागढीमाई नगरपालिकाका नगर प्रमुख उपेन्द्रप्रसाद यादवले बताए । ‘कक्षा १० का एक सय ८ जना विद्यार्थी र तिनका अभिभावकलाई विद्यालयबाट पत्राचार गरी छलफलका लागि बोलाएका थियौं,’ मेयर यादवले भने, ‘विद्यार्थीहरू आन्दोलित भएपछि आफूले आन्दोलनको दिनदेखि नै विद्यार्थीको माँग पूरा गर्ने आश्वासन दिँदै आएको छु ।’

Esewa Pasal

प्रकाशित : भाद्र २९, २०७५ १०:११
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT

एउटै एनजीओको कार्यक्रममा ८ मन्त्री

सरकारले प्रदेश सभालाई विजनेस नसकेर लामो समयदेखि बैठक बस्न सकेको छैन
श्यामसुन्दर शशि, शाहीमान राई

जनकपुर — एउटा गैरसरकारी संस्थाको कार्यक्रममा प्रमुख अतिथि, विशिष्ट अतिथि वा अतिथि कति जना मन्त्री चाहिन्छ ? सङ्घीय सरकारका मन्त्री, प्रदेश सरकारका मुख्यमन्त्री, मन्त्री तथा सांसद सबैको उपस्थिति जरुरी छ ? उतर होला एक जना भए पुग्छ ।

जनकपुरमा बिहीबार एक गैरसरकारी संस्थाद्वारा होटल मसला कटेजमा आयोजित सामुदायिक विकास कार्यक्रमको प्रगति समिक्षा कार्यक्रममा उपस्थित प्रदेश २ का मुख्यमन्त्री लालबाबु राउत गद्दीलगायत मन्त्रीहरू । तस्बिर : कान्तिपुर

तर प्रदेश नं २ का मुख्यमन्त्री, मन्त्री तथा सांसदहरू एनजीओको कार्यक्रममा ताँती नै लाग्ने गरेका छन् ।


जनकपुरमा बिहीबार ग्रामीण पुनर्निर्माण नेपाल नामक गैरसरकारी संस्थाद्वारा यहाँको सुविधा सम्पन्न होटल मसला कटेजमा आयोजित प्रगति समीक्षा कार्यक्रममा मन्त्रीको ताँती नै लागेको हो । त्यसमा प्रदेश २ का मुख्यमन्त्री लालबाबु राउत गद्दी, भौतिक पूर्वाधार मन्त्री जितेन्द्र सोनल, सामाजिक विकास मन्त्री नवलकिशोर साह, आन्तरिक मामिला तथा कानुन मन्त्री ज्ञानेन्द्रकुमार यादव, राज्यमन्त्रीहरू सरोज सिंह कुसवाह, डिम्पलकुमारी झा, अभिराम शर्मा र योगेन्द्र यादवसहित ८ मन्त्री सहभागी थिए ।


बेलायत सरकारको आर्थिक सहयोगमा ग्रामिण पुनर्निर्माण नेपालद्वारा सञ्चालित सामुदायिक विकास कार्यक्रमको प्रगति समीक्षा कार्यक्रममा मुख्यमन्त्री राउत लगायत मन्त्रीहरू सहभागी भएका हुन् ।


प्रदेश २ को विभिन्न जिल्लामा कार्यरत गैरसरकरी संस्थाहरूले जुनसुकै कार्यक्रम आयोजना गर्दा सकेसम्म केन्द्र सरकारका मन्त्री, त्यसपछि मुख्यमन्त्री, मन्त्री र सांसदलाई कार्यक्रममा बोलाउने गर्छन् । गैरसरकारी संस्थाले बोलाएको कार्यक्रममा मन्त्रीहरू सजिलै जान्छन्, भोज खान्छन्, भाषण गर्छन् र फर्किन्छन् ।


बिहीबार एउटै कार्यक्रममा यतिका मन्त्रीको उपस्थिति देखेर एकछिन मानौं मन्त्रिपरिषदको वैठक नै यही नै हो कि भन्ने अनुभूति भएको थियो । प्रदेश सरकार गठन भएको ६ महिना वितिसक्दा पनि प्रदेशको नामकरण, सरकारी कामकाजको भाषा र स्थायी राजधानी जस्ता महत्वपूर्ण विषयमाथि गम्भिर छलफल समेत हुन नसकेको अवस्थामा मन्त्रीहरू राष्ट्रिय तथा अन्तर्राष्ट्रिय गैरसरकारी संस्थाहरूको कार्यक्रममा सहभागी हुन आम नागरिक मात्र होइन कि सत्ता साझेदार दलका शीर्ष नेताहरू समेत असन्तुष्ट छन् ।


सङ्घीय समाजवादी फोरम प्रदेश २ का मुख्यसचिव शम्भु झाले गैर सरकारी संस्थाको कार्यक्रममा मन्त्रीहरूको ‘जमघट’ बाट आम जनतामा नराम्रो सन्देश गएको बताए । उनले भने, ‘मन्त्रीमण्डलको प्रमुखको नाताले मुख्यमन्त्रीले यस्ता विषयलाई नियन्त्रण गर्न जरुरी छ ।’ झाले आफू पनि यसविषयमा कुरा गर्ने बताए ।


राष्ट्रिय जनता पार्टीका केन्द्रीय उपाध्यक्ष तथा राष्ट्रिय सभा सदस्य बृषेशचन्द्र लाल यद्यपि यस विषयमा औपचारिक प्रतिक्रिया दिन मानेनन् । उनले यतिमात्रै भने, ‘प्रदेशमा धेरै काम गर्न बाँकी छन्, मन्त्रीजीहरू समय बर्बाद गर्नुभन्दा पनि काममा केन्द्रित हुँदा राम्रो होला ।’


मुख्यमन्त्रीसहित मन्त्रीहरूको गैरसरकारी संस्थाको कार्यक्रममा जमघटको प्रदेश सरकारका उद्योग वन तथा वातावरण राज्यमन्त्री सुरेश मण्डलले समेत असहमति जनाउँदै आफ्नो फेसबुक स्टाटसमा लेखेका छन्, ‘एउटा एनजीओले कार्यक्रम गर्छ, मुख्यमन्त्री, मन्त्री र राज्यमन्त्रीसम्म १३ जनालाई नै निम्तो गर्छन्, हामी सजिलै उपस्थित हुने गर्छाैं, निमन्त्रण गर्ने र स्वीकार्ने हामी दुवैले सोंच्नुपर्ने होइन र ?’ प्रश्न गर्दै उनले लेखेका छन्, ‘एउटा सानो कार्यक्रममा पूरा सरकारको उपस्थिति किन चाहियो ?


सम्बन्धित मन्त्री र राज्यमन्त्री पुगे भइहाल्यो वा निकै महत्वपूर्ण कार्यक्रम छ भने मुख्यमन्त्री उपस्थित भए राम्रो हुन्छ, हामीले समय र सिमा बारे सोच्ने कि ?’ त्यसपछि कान्तिपुरसित कुरा गर्दै राज्यमन्त्री मण्डलले उक्त कार्यक्रममा आफूलाई पनि निम्तो दिइएपनि मन्त्रीहरूको नामावली सुनेर नगएको प्रतिक्रिया दिए । सरकारले प्रदेश सभालाई विजनेस नसकेर लामो समयदेखि बैठक बस्न सकेको छैन ।


मुख्यमन्त्रीसहित ८ जना मन्त्री उपस्थित कार्यक्रममा मन्तव्य भने मुख्यमन्त्री लालबाबु राउतले मात्र दिएका थिए । मुख्यमन्त्री राउतले मन्तव्यमा प्रदेश नं २ विकास निर्माणमा पछि परेकोले दातृनिकाय, राष्ट्रिय तथा अन्तर्राष्ट्रिय संस्थाहरूसित भौतिक पूर्वाधार निर्माणमा लगानी गरिदिन आग्रह गरे । ठूलठूला होटलमा तालिम, गोष्ठी, भ्रमण लगायत गरिब, विपन्न वर्गको उत्थान गरेको प्रतिवेदन दातृनिकायलाई बुझाएर ठग्ने एनजीओहरूलाई प्रदेश २ मा सहमति नदिने चेतावनी मुख्यमन्त्री राउतले दिए ।


गैरसरकारी संस्थाले तालिम, गोष्ठी र भ्रमणको बिल बुझाएर दातृ निकायलाई ठग्ने र गरिब विपन्न वर्गको उत्थान कागजमा हुने गरेकाले आगामी दिनमा प्रदेश सरकारसित समन्वय सहकार्य गरेर कार्यक्रम सञ्चालन गर्न आग्रह गरेका छन् । गैरसरकारी संस्थाले प्रदेश २ का गरिब जनताको उत्थान र भौतिक पूर्वाधार निर्माण गर्न परिणाममुखी र प्रभावकारी कार्यक्रम सञ्चालन गर्न आग्रह गरे ।

प्रकाशित : भाद्र २९, २०७५ १०:०९
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT
ADVERTISEMENT