पर्सा — ‘१ महिनायता मेरो टोलका ५ किशोरीहरू बोक्सी लाग्यो भनेर संवाद कार्यक्रममा आउथेनन्, उनीहरू बेलाबेलामा आफैं रुन्थे, मैले बोक्सी भन्ने कुरो हँुदैन भनी सम्झाएर उनीहरूको मनबाट यो भय हटाएपछि अहिले संवाद कार्यक्रममा नियमित सहभागी हुन्छन् र आफ्ना समस्या बारे खुलेर बोल्छन् ।’
वीरगन्जमा मंगलबार आयोजित किशोरी सशक्तीकरणका लागि संवाद कार्यक्रमको एनिमेटर्स तालिममा सगरमाथा किशोरी समूहकी एनिमेटर वीरगन्ज ३१ बेल्वाकी सलमुन खातुनले आफ्नो अनुभव यसरी सुनाइन् ।
२ वटा समूहमा ५० किशोरीलाई उनले नियमित विद्यालयसँग जोड्ने मात्र नभई किशोरीहरूको व्यक्तिगत जीवनमा आइपरेका समस्याहरूको समाधानका लागि सक्रिय छिन् ।
बारा जीतपुरसिमरा उपमहानगरपालिका–१९ इनर्वासिरास्थित जागरुक ज्योती किशोरी समूहकी एनिमेटर रुखसाना खातुनले आफ्नो टोलमा संवाद कार्यक्रम चलाउँदा सुरुमा ५० किशोरी नियमित सहभागी थिए ।
तर जब महिनाबारीसम्बन्धी चर्चा संवाद कार्यक्रममा हुन थाल्यो किशोरीहरूको उपस्थिति घट्दै गयो । उनीहरूले लाजले संवादमा आउन छाडे ।
तर तीनैमध्येका ३ किशोरीलाई अनियमित महिनाबारीका कारण शारीरिक समस्या रहेको जानकारी पाएपछि रुखसानाले ती किशोरीहरूलाई अस्पताल लगेर उनीहरूको महिनावारी नियमित बनाउन उपचारमा सहयोग गरिन् । ‘अहिले तीनै किशोरीहरू संवाद कार्यक्रममा नियमित सहभागी हुन थालेका छन्,’ रुखसानाले अनुभव सुनाइन्, ‘अहिले उनीहरू आआफ्ना समस्याबारे खुलेर बोल्छन् ।’
कार्यक्रममा अन्य एनिमेटरहरूले पनि आआफ्नो अनुभव यसरी सुनाए । उनीहरू किशोरीको शिक्षा, स्वास्थ्य, लैंगिक हिंसा, बाल विवाह, दाइजोविरोधी अभियान जीवनोयोगी शिक्षा जस्ता विषयमा संवादसँगै वकालतको पाटोमा पनि सक्रिय छन् ।
संवादले किशोरीहरूको जीवनमा आमूल परिवर्तन आउँदै छ । कार्यक्रमकै कारण अभिभावकको बन्देज वा अन्य कारणले विद्यालय जान छाडेका बालबालिका तथा किशोरीहरू पुन: विद्यालय आउन थालेका छन् ।
यी किशोरीहरू महिला अधिकार र हिंसाका विरुद्ध मात्र नभई बालविवाह र दाइजो प्रथाविरुद्ध पनि कडा रूपमा बोल्न थालेका छन् । युरोपियन युनियनको सहयोगमा चाइल्ड नेपाल र संरक्षण नेपालको सहकार्यमा नेपाल ग्रामीण पुनर्निर्माण संस्थाको आयोजनामा वीरगन्ज महानगरका वडा नं २९, ३० र ३१ गरी ३ वडामा यस वर्षको मार्च महिनादेखि सञ्चालित कार्यक्रममा ४ सय किशोरी आबद्ध छन् ।
प्रकाशित : कार्तिक १४, २०७५ ०९:४३