‘जनकपुर भ्रमण मेरो लागि सांस्कृतिक यात्रा हो’ : योगी आदित्यनाथ

उत्तर प्रदेशका मुख्यमन्त्री विवहा–पञ्चमी महोत्सवका लागि जनकपुर आउने
सन्तोष सिंह

अयोध्या(भारत) — भारतीय राज्य उतर प्रदेशका मुख्यमन्त्री योगी आदित्यनाथले जनकपुरमा मंसिर २६ गते विवाह पञ्चमीको अवसरमा अयोजना हुने रामजानकी विवाह महोत्सवमा सांस्कृतिक दूतका रुपमा भ्रमण गर्ने बताएका छन् ।

‘जनकपुरको भ्रमण मेरो लागि सांस्कृतिक यात्रा हो,’ उनले भने, ‘राजनीति र धार्मिक यात्राभन्दा सांस्कृतिक यात्राले झनै महत्व राख्छ। सांस्कृतिक यात्राले दुई सहर जनकपुर र अयोध्यालाई जोड्ने छ।’

‘दुवै देशका सहमति भयो भने माता सिताको माइतीमा पुगेर श्रद्धा साथ पुजा गर्ने इच्छा छ,’ उनले थपे।

उतर प्रदेशको राजधानी लखनउ भ्रमणमा रहेका जनकपुरका पत्रकारहरुसँग भेटघाट गर्दै मुखयमन्त्री योगीले आफू विवाह पञ्चमीमा जनकपुरधाम जान लालायीत रहेको बताएका हुन्।

मुख्यमन्त्री योगीले माता जानकीको दर्शन गर्ने आफ्नो पुरानो इच्छा पुरा हुनेभएकाले खुसी व्यतm गर्दै डिसेम्बर १२ तारिखको प्रतिक्षामा रहेको बताएका थिए। जनकपुरमा मंसिर २७ गते अयोजना हुने विवाह पञ्चमीमा सहभागी हुने तयारी भइरहेको छ।

मुख्यमन्त्री योगीले भगवान श्री रामको जन्मभूमि अयोध्या नगर र माता जानकीको जन्मभूमि जनकपुरधामको विकासका लागि आफू, आफ्नो पार्टी र स्वयं प्रधामन्त्री समेत नेपाल सरकारसँग हातेमालो गर्न तयार रहेको उनले बताएका थिए।

दुवै सहरबीच सांस्कृतिक र धार्मिक सम्बन्धले बाँधिएकोले यसको विकासकै लागि भारत सरकार जनकपुरधाम–अयोध्या बस सेवा सञ्चालन गरेको र रेलसेवा शुभारम्भ भएपछि नेपाल भारतको सम्बन्धमा थप टेवा पुग्ने उनको धारणा थियो।

जनकपुरमा योगिको स्वागतकालागि जानकी मन्दिर र प्रदेश २ सरकार तयारीमा जुटेका छन्। मुख्यमन्त्री लालबाबु राउतले मंसिर २७ गते योगिकालागि भण्डाराको अयोजना गरेका छन्।

प्रकाशित : मंसिर १७, २०७५ ०९:३२
ADVERTISEMENT
प्रतिक्रिया
पठाउनुहोस्
ADVERTISEMENT

आर्मी स्ट्राइकरको धार 

फ्रेन्ड्स ३–० मछिन्द्र
आर्मी २–१ हिमालयन शेर्पा
ब्रिगेड ब्वाइज ०–१ जावलाखेल
कान्तिपुर संवाददाता

काठमाडौँ — त्रिभुवन आर्मी ‘ए’ डिभिजन लिगका दुई अपराजित टोलीमध्ये एक हो । पहिलो खेलमा एनआरटीसँग बराबरी खेलेको आर्मीले त्यसयताका चारै खेलमा निरन्तर जित निकालेको छ ।

आर्मीका भरत खवासलाई एयर बलमा चुनौती तेस्र्याउँदै हिमालयन शेर्पाका उलरिच सिडेव । तस्बिर : हेमन्त श्रेष्ठ/कान्तिपुर 

आर्मीमा राष्ट्रिय टिमका तीन स्ट्राइकर छन्, भरत खवास, नवयुग श्रेष्ठ र जर्जप्रिन्स कार्की । नवयुग चोटग्रस्त छन् भने जर्जप्रिन्स विभागीय प्रशिक्षणमा छन् । भरतको दुई गोल सहयोगमा आर्मीले आइतबार हिमालयन शेर्पालाई २–१ ले पराजित गर्‍यो ।

पछिल्लो चरणका खेलबाट मात्र आर्मीका स्ट्राइकरले गोल गर्न सके । पाँचौं चरणमा त्यसले निरन्तरता पायो । आर्मीको पाँच खेलबाट १३ अंक भएको छ र शीर्षस्थानमा मनाङसँगको दूरी २ अंकमा झारेको छ । शेर्पा भने समान खेलबाट १० अंकसहित छैटौं स्थानमा झरेको छ ।

फिनिसिङमा देखिएको केही कमजोरीलाई छाड्ने हो भने भरतले लिगमा पुनरागमन गरेका छन् । महत्त्वपूर्ण तीन अंक जोडेर शीर्षस्थानको मनाङमाथि दबाब कायम राख्न सकेकामा प्रशिक्षक नवीन न्यौपानेले राहतको महसुस गरे । ‘लिगका सुरुआती तीन खेलमा स्ट्राइकरबाट गोल निस्कन नसक्नु चिन्ताको विषय थियो । चौथो र पाँचौं चरणसम्म आउँदा भरतले गोल गर्न थालेका छन्, यो हाम्रा लागि सकारात्मक कुरा हो,’ प्रशिक्षक न्यौपानेले थपे, ‘तीन अंक हाम्रा लागि यसकारण पनि महत्त्वपूर्ण छ कि हामीले मनाङलाई पछ्याइरहनु छ र उसमाथि दबाब कायम राखिराख्नु छ ।’

शेर्पाविरुद्ध भरतले पहिलो हाफमा गोल गरे पनि बाँकी दुई अवसरमा चुकेका थिए । यद्यपि ३३ औं मिनेटमा सन्तोष तामाङको कर्नरमा पेनाल्टी एरियामा अनमार्क रहेका भरतले सानदार हेडिङ गोल गरे ।
पहिलो हाफ पूरै आर्मीले नियन्त्रणमा राखेको थियो । सन्तोषको पासमा टंक बस्नेतले आठौं र २४ औं मिनेटमा गोलको अवसर खेर फाले । शेर्पाले भने गोलको एउटा अवसर पाएको थियो । २१ औं मिनेटमा विश्वासको क्रसमा कर्ण लिम्बूले गोल लाइनबाट हेड बल टच गर्न सकेनन् ।

दोस्रो हाफमा आर्मी एकाएक रक्षात्मक देखियो । एक गोलको अग्रतामै सुरक्षित महसुस गरेको आर्मीले दबाब खेपे पनि शेर्पालाई सजिलै गोल गर्न दिएन । आर्मी दोस्रो हाफमा शेर्पाको आक्रमण रोक्दैमा व्यस्त देखियो । ८५ औं मिनेटमा भरतले व्यक्तिगत दोस्रो गोल गरे । दिनेशको क्रसमा किपर बिट भएपछि भरतले ट्यापिङ गरी सहज गोल गरे । त्यसको एक मिनेटपछि नै अलरिचले १८ यार्डबाट पहिलो बार च्यापेर गरेको प्रहार आर्मीका गोलरक्षक विकेशले जज गर्नै सकेनन् ।

‘समयमै गोल निस्कियो र आर्मी जोगियो । अन्यथा दोस्रो हाफमा लिएको रक्षात्मक रणनीति आर्मीका लागि प्रत्युत्पादक हुन सक्थ्यो । हामी दोस्रो हाफमा डिफेन्सिभ र काउन्टर एट्याकमा गोल निकाल्ने रणनीतिमा थियौं । त्यसैले हामी दबाबमा देखियौं,’ खेलपछि आर्मीका प्रशिक्षक न्यौपानेले भने ।

लिगमा पहिलो हार व्यहोरेको शेर्पाका प्रशिक्षक सुवास लिम्बूले अवसर सदुपयोग गर्न नसक्दा हार बेहोर्नुपरेको बताए । ‘हामीले उत्तिकै अवसर सृजना गरेका हौं, अघिल्ला चरणमा भन्दा राम्रो पनि भएको हो । तर, स्ट्राइकरले अवसर उपयोग गर्न सकेनन्,’ लिम्बूले थपे, ‘लिगमा हाम्रो लक्ष्य शीर्ष ६ भित्र पर्ने हो । पहिलो खेल हारेका मात्र हौं, बाहिरिएका छैनौं, अन्य खेलमा अझै राम्रो खेल्ने प्रयास गर्नेछौं ।’ सुवासले भने ।

आइतबारकै पहिलो खेलमा अन्तिम ३० मिनेटमा ३ गोल गरी फ्रेन्ड्स क्लबले जारी लिगमा पहिलो जित आत्मसात् गरेको छ । फोफाना ब्राहिमनले ६६ औं, संजोग महर्जनले ८४ औं र अनिल महर्जनले इन्ज्युरी समयको अन्तिम मिनेटमा गोल गरे ।

लिगमा जित निकाल्न असफल मछिन्द्रले अहिलेसम्म एक गोल पनि गर्न सकेको छैन । गोल गर्न नसक्ने मछिन्द्र एक्लो टिम हो । जितपछि फ्रेन्ड्सको चार अंक भएको छ र लिगको नवौं स्थानमा उक्लिएको छ । २ अंक भएको मछिन्द्र भने पुछारबाट दोस्रो स्थानमा छ ।

हल्चोक मैदानमा ललितपुरको अर्को टिम ग्रान्डमास्टर जावलाखेल युथ क्लबले पनि लिगमा पहिलो जित निकाल्ने क्रममा ब्रिगेड ब्वाइज क्लबलाई १–० ले हरायो । खेलको ८८ औं मिनेटमा पाएको पेनाल्टीमा अरुज सिंहले गोल गरे । जितले जावलाखेल दसौं स्थानमा उक्लँदा ब्रिगेड ब्वाइज बाह्रौं स्थानमा झरेको छ ।

प्रकाशित : मंसिर १७, २०७५ ०९:२५
पूरा पढ्नुहोस्
प्रतिक्रिया
पठाउनुहोस्
ADVERTISEMENT