हात्तीले सातामा ७ घर भत्कायो
उदयपुर — उदयपुरको चुरे जंगल तलका बस्तीमा जंगली हात्तीको समूहले एक सातामा ७ घर भत्काइदिएको छ ।
त्रियुगा र चौडण्डिगढी नगरपालिकामा घर भत्काएको हो । हात्तीको समूहले त्रियुगा नगरपालिका–३ स्थित ठाडीमा भवानी प्रसाद चौधरी, राजन चौधरी र रामेश्वर चौधरीको घर भत्काएको जिल्ला प्रहरी कार्यालय उदयपुरले जनाएको छ । उनीहरुको घरमा भएको क्षतिको विवरण संकलन भइरहेको प्रहरीले जनाएको छ ।
हात्तीको त्रासले भुल्के, ठाडी, चाँप, मोतिगडा, क्याम्पस डाँडाका बासिन्दा रातभरी जाग्राम बस्नु परेको स्थानीयले बताए ।
यसैगरी, त्रियुगा नगरपालिका–२ खैजनपुरमा दिपक सार्कीको घर भत्काउनुको साथै घरमा भएको अन्नपात नष्ट गरेको हो । चौदण्डीगढी नगरपालिका–१० हडियामा स्थानीय टिकाराम दाहाल र विक्रम दाहालको घरको भुईतला भत्काउनुको खाद्यान्न नष्ट गरेको प्रहरीले जनाएको छ ।
हिउँद सुरु भएपछि भारतबाट तराई हुँदै चुरे जंगल आउने जंगली हात्तीहरुले वर्षेनी क्षति पुर्याउँदै आएको स्थानीय बताउछन् ।
प्रकाशित : मंसिर २०, २०७५ १२:३२
