सडक अतिक्रमण गरी गोठ

शिव पुरी

रौतहट — गौर–चन्द्रनिगाहपुर सडक खण्डको पडोरिया क्षेत्रमा सडककै आडमा स्थानीयले पशु गोठ बनाएका छन् । पहिला त्यतिकै बाँधेर राख्थे । अहिले छाप्रो हालेर गोठ नै निर्माण गरेका छन् ।

रौतहटको चन्द्रनिगाहपुर–गौर सडक खण्डको पडोरिया चोकमा सडक अतिक्रमण गरी बनाइएका पशु बाँध्ने गोठ । यो मार्गको सडक अतिक्रमणको चपेटामा परेको छ । तस्बिर : शिव/कान्तिपुर 

चन्द्रपुर १० को पडोरिया राजमार्गको सडक पेटीमै स्थानीयले पशु बाँध्न गोठ बनाएका हुन् । उनीहरूले त्यही पशुलाई बाँधेर घाँस खुवाउँछन् । केहीले परालको टाली राखेका छन् । स्थानीय झगरु चौधरीले पशु बाँध्ने गोठ बनाएका हुन् । उनको घर सडक छेउमा छ । घर अगाडि सडकको आडमा उनले निर्वाध रूपमा गोठ बनाएका हुन् । यसले सवारी आवागमनलाई समस्या हुँदै आएको छ ।

Citizen

लामो समयदेखि गौर खण्डको सडक अतिक्रमण बढेको छ । यो खण्डको दुबैतर्फ स्थानीयले पशु बाँध्ने, परालका टाल राख्ने र पसलका सामान राख्ने गरेका छन् । यसले दुर्घटना निम्त्याउने भन्दै स्थानीय प्रशासनले २ वर्षअघि हटाएको थियो । उनीहरू निर्वाध रूपमा सडक पेटी प्रयोग गर्छन् । डिभिजन सडकका कर्मचारी आएको थाहा पाएपछि घर पछाडि लगेर पशु बाँध्छन् । गाउँघरमा अझै पनि चेतनाको विकास हुन नसकेको डिभिजन सडक कार्यालय चन्द्रनिगाहपुरका प्रमुख दरोगा प्रसादले बताए ।

‘अब जागरुक कार्यक्रम ल्याउनुपर्छ,’ उनले भने, ‘जानाजानी गल्ती गर्नेलाई के भन्न सकिन्छ । स्थानीयले सडक पेटी निजी प्रयोग गर्न हुन्छ हुँदैन भन्ने ज्ञान नभएको हो वा जबरजस्ती गरेको हो ।’ सडकका कर्मचारी अनुगमनमा जाँदा हतारमा घर पछाडि पशु लैजाने गरेको उनले सुनाए । सडकको दायाँबायाँ अतिक्रमण हटाउने तत्काल कुनै योजना नरहेको प्रमुख दरोगाले जानकारी दिए ।

चन्द्रनिगाहपुरदेखि ४२ किमि गौरसम्मका दायाँबायाँ सडककै केही स्थानका पोखरी खनिएका छन् । कतै चिम्नि उद्योगले माटो खनेर इँटा उत्पादन गरिरहेको छ । केही स्थानमा मोटरसाइकलका ग्यारेज राखिएको छ । एउटा सवारी आउँदा र जाँदा साइड दिन समेत ठाउँ पुग्दैन ।

यो मार्गमा सबैभन्दा बढी बालचनपुर पडोरिया क्षेत्रमा अतिक्रमण भएको छ । यहाँ सडकमै पशु बाँध्ने गरिन्छ । पशुलाई खुवाउन परालका टालहरू सडककै छेउमा राखिएका छन् । राष्ट्रिय राजमार्गमा २५ र सहायक मार्गमा १५ मिटर छाड्नुपर्छ । सडक क्षेत्र छाडेर मात्र व्यक्तिगत उपभोग गर्न पाइन्छ ।

नियम मिचेर कतिपय सडक छेउमा घर टहरा बनाइएको छ । चन्द्रनिगाहपुर चोकदेखि दक्षिण भेगका अधिकांश बजार गाउँका घरटहरा सडककै जमिनमा बनाइएको पाइएको छ । तत्कालीन प्रमुख जिल्ला अधिकारी मदन भुजेलको पहलमा दुई वर्षअघि दुबै राजमार्गका अतिक्रमण हटाइएको थियो । पछिल्लो एक वर्षयता फेरि सुरु गरेका छन् । अहिले झनै अतिक्रमण बढेको पाइएको छ । अतिक्रमणबारे नगरपालिकाले बेवास्ता गरेको पाइएको छ ।

सडकमै पसल
पूर्वपश्चिम राजमार्गस्थित चन्द्रनिगाहपुरको मुख्य चोकको दुबै साइडमा फलफूल व्यापारीले सडकमै पसल थापेका छन् । केही समयअघि ठेलामा फलफूल राखेर बेच्थे । स्थानीय प्रहरीले हटाएपछि अहिले सडकमै थापेका छन् । यस्तो पसल हटाउन चन्द्रपुर नगरपालिकाले सरोकारवालालाई बोलाएर निर्णय गरेको थियो ।

निर्णय कार्यान्वयन नगरेको सरोकारवालाले आरोप लगाए । नगरप्रमुख रामचन्द्र चौधरीले सडक अतिक्रमण गरी राखिएका पसलहरू हटाइने बताउँदै आएका छन् । दुबै मार्गमा नगरपालिका, जिल्ला ट्राफिक, प्रहरी र दलहरू मिलेर पटकपटक अतिक्रमण हटाउने प्रयास गरिए पनि असफल हुँदै आएको छ ।सडक विभागले समेत अतिक्रमण हटाउन सकेको छैन ।

प्रकाशित : पुस २८, २०७५ ०८:५९
प्रतिक्रिया
पठाउनुहोस्

बचत सिक्दै बालबालिका

बाल बचत खुत्रुके योजनाअन्तर्गत सहकारीले यस क्षेत्रका ३ सय अभिभावकलाई खुत्रुके प्रदान
कान्तिपुर संवाददाता

रौतहट — दस वर्षीया यी बालिका विद्यालयबाट घर आउनासाथ खुत्रुकेमा पैसा जम्मा गरेको छ/छैन सोध्छन् । छैन भने बुवालाई सम्झाउँछिन् । बचत गर्न लगाउँछिन् । यही बानीले १० वर्षीया निकिशा पुलामी नियमित बचतकर्ताका रूपमा सम्मानित भइन् ।

रौतहटको चन्द्रपुर २ स्थित जुडिबेलाकी १० वर्षीया निकिशा पुलामी चन्द्रोदय बचत तथा ऋण सहकारी संस्था लिमिटेडको दसौं साधारणसभामा सम्मानित हुँदै । तस्बिर : शिव/कान्तिपुर 

चन्द्रपुर २ जुडिबेलाकी पुलामीले दुई वर्षदेखि नियमित खुत्रुकेमा बचत गरिरहेकी छन् । बुवा छविले खाजा र अन्य कामका लागि दिने खर्च बचाएर उनले बचत गर्दै आएकी हुन् । उनी स्थानीय चन्द्रोदय बोर्डिङ स्कुलको कक्षा २ मा अध्ययनरत छन् । अहिले उनको खुत्रुकेमा ३५ हजार बढी जम्मा भइसकेको छ । यो रकम उनकै नामको बचत खातामा जम्मागरिएको छ ।

चन्द्रनिगाहपुरमा रहेको चन्द्रोदय बचत तथा ऋण सहकारी संस्थाले प्रदान गरेको बाल बचत खुत्रुके योजनाअन्तर्गत निकिसाले रकम जम्मा गर्न थालेकी हुन् । दसैं तिहार पर्वमा उनले अभिभावकबाट पाएको ३ सय रुपैयाँ पनि खुत्रुकेमै हालिन् । ‘छोरीको बचत गर्ने शैली देखेर अचम्म लाग्छ,’ बुवा छवि भन्छन्, ‘सानैदेखि बचत गर्ने बानी बसेको छ । यसले अभिभावकलाई प्रेरणा मिलेको छ ।’

बाल बचत खुत्रुके योजनाअन्तर्गत सहकारीले यस क्षेत्रका ३ सय अभिभावकलाई खुत्रुके प्रदान गरेको छ । तीमध्ये उत्कृष्ट बचतकर्ताका रूपमा निकिशा सम्मानित भएकी हुन् । सहकारी संस्थाको दसौं वार्षिक साधारणसभामा निकिशालाई सम्मान गरिएको हो । बालिका सम्मानित भएको देखेर कार्यक्रममा सबै चकित भए । सानै उमेरमा बचत गर्ने शैलीको सबैले प्रशंसा गरे ।

उनका बुवा छविले दिनको ५० रुपैयाँका दरले छोरीलाई पैसा दिन्छन् । त्यही पैसा निकिशाले खुत्रुकेमा बचत गर्छिन् । यसको अलावा खाजा र अन्य खर्चका लागि दिइने रकम समेत उनले खुत्रुकेमा हाल्छिन् । संस्थाले प्रत्येक महिनाको अन्तिम दिन खुत्रुके मगाएर अभिभावककै रोहबरमा फुटाउँछन् । त्यही रकम खातामा जम्मा गरिदिन्छन् ।

दस हजार पुगेपछि बचतकर्तालाई उपहार स्वरूप जन्मदिनमा केक वा अन्य सामान दिने गरेको संहकारी संस्थाका उपाध्यक्ष बसन्त आचार्यले बताए । ‘बचत गर्ने बानीले धेरै परिवर्तन ल्याएको छ,’ उनले भने, ‘बालबालीकाहरूमा फाजुल खर्च कम गराई बचत गर्ने बानी हुँदै गएको छ । यसलाई सकारात्मक रूपमा लिनुपर्छ ।’

प्रकाशित : पुस २८, २०७५ ०८:५८
पूरा पढ्नुहोस्
प्रतिक्रिया
पठाउनुहोस्