गाउँपालिकाको बजेट बल्ल सार्वजनिक

पूर्वकार्यकारी अधिकृत हरिशंकर यादव गत आर्थिक वर्षको बिल, विजक तथा माइनुटसहितका आधिकारिक कागजपत्र हस्तान्तरण नै नगरी अन्त सरुवा गराएर गएका कारण बजेट ल्याउन ढिलो भएको अध्यक्ष मनोजकुमार यादवले बताए । मुखियापटी मुसरनिया गापाले चालु आर्थिक वर्षका लागि २५ करोड ९५ लाख ८१ हजार बजेट प्रस्ताव गरेको छ ।

सोमध्ये चालुतर्फ १८ करोड ३३ लाख ७० हजार तथा पुँजीगततर्फ ८ करोड ६२ लाख ११ हजार बजेट प्रस्ताव गरेको छ । कार्यकारी अधिकृत सत्यनारायण साहका अनुसार चालु आर्थिक वर्षको बजेटमा कृषि विद्युतीकरण,लामखुटे नियन्त्रण,बेटी बचाऊ अभियान, विद्यालय भर्ना तथा जेहेन्दार विद्यार्थीका लागि विशेष योजना प्रस्ताव गरेको छ ।

यसैगरी क्यान्सर लगायतका असाध्य बिरामी, बर्थिक सेन्टरमा प्रसूति गराउने महिलाहरूलाई विशेष भत्ता दिने प्रस्ताव पनि गरिएको छ । पूर्व,पश्चिम र दक्षिण गरी तीनतर्फबाट भारतले घेरिएको मुखियामटी मुसरनिया गाउँपालिकासँग भारतको मधुवनी र सीतामढी जिल्ला तथा नेपालको धनुषा र महोत्तरी जिल्लाको सिमाना पनि छोएको छ ।

जमुनी, विगही, घाघर र विगही–जमुनी नदीबाट चारैतिरबाट घेरिएको यो गापा नेपालकै होचोमा पर्छ । बाढीको उच्च जोखिममा रहेको यसलाई आदर्श गाउँपालिकाका रूपमा विकसित गर्ने प्रतिबद्धता वडाध्यक्षहरूले व्यक्त गरेका छन् ।

‘हाम्रो गाउँपालिका मुलुककै सबभन्दा होचो स्थान हो । नेपाल र भारतको सीमामा अवस्थित यस गापालाई भारतका दुई तथा नेपालका दुई जिल्लाले छोएको छ । हामी यस भौगोलिक विशेषतालाई अवसरका रूपमा सदुपयोग गर्न चाहन्छौं,’ अध्यक्ष यादवले भने ।

सरकारले असहयोग गरे

आर्थिक वर्ष २०७४/०७५ को बजेट परिचालन गरी यसको बिल,विजक तथा माइनुट पुस्तीका समेत बुझ बुझारथ नगरी सरुवा गराएर अन्त गएको पूर्वकार्यकारी अधिकृत हरिशंकर यादवमाथि कार्यवाही हुनुपर्ने माग गापाका पदाधिकारीहरूले गरेका छन् ।

पूर्व काका अधिकृत यादव गाउँपालिकाका अध्यक्षलाई जानकारी नै नदिई सिरहाको औरही गाउँपालिकामा सरुवा गराएका थिए । अन्त सरुवा भएपछि गापा मातहातको कागजपत्र तथा हर हिसाव हस्तान्तरण गर्नुपर्ने तथा रबवाना पत्र लिनुपर्ने प्रावधान भए पनि उनले बिनासूचना अन्त हाजिर भएको अध्यक्ष यादवले बताए ।

गाउँपालिकाको कागजपत्र बुझ बुझारत गर्न आफूले सिरहाको औरही गापा तथा सरोकारवाला मन्त्रालयलाई समेत पत्राचार गरेको अध्यक्ष यादवले जानकारी दिए । ‘मन लागेको कर्मचारीलाई पठाउने अनि सूचना नै नदिई सरुवा गर्ने प्रवृत्तिले स्थानीय तहमा काम गर्ने वातावरण बिथोलिएको छ । पालिकाको कागजपत्र बुझ बुझारथ नगर्ने अधिकृतमाथि कसले कारवाही गर्ने ?’ अध्यक्ष यादव भने ।