प्रदेशसभा बैठक स्थगन

बैठक सुरु भएपछि काङ्ग्रेस सचेतक उपेन्द्र कुशवाहाले टेबल ठोक्दै बोल्ने समय मागेपछि उनलाई बोल्न सभामुख सरोजकुमार यादवले समय उपलब्ध गराए । वीरगन्जमा बीपी उद्यानका लागि निर्धारित जग्गामा प्रदेश सरकारले जबर्जस्ती सहिद पार्क बनाउन लागेको विरोध गर्दै काङ्ग्रेसले बैठकमा अवरोध गरेको हो । सचेतक कुशवाहाले भने, ‘एक सरकारले गरेको निर्णय अर्को सरकारले उल्टाउँदै जाने हो भने कुनै पनि योजना पूरा हुन सक्दैन, त्यसैले प्रदेश सरकारको सहिद पार्क बनाउने कार्यक्रम फिर्ता लिनुपर्छ ।’

सचेतकको विरोधपछि काङ्ग्रेसका सबै सांसदले उभिएर सदन अवरुद्ध गरेका थिए । सभामुख यादवले यस विषयमा सरकारले उचित जवाफ दिने आश्वासन दिए पनि काङ्ग्रेस सांसदले अवरोध जारी राखेपछि प्रदेशसभा बैठक फागुन १५ गतेसम्मका लागि स्थगन गरिएको हो ।