कार्यालय सहयोगीले जाँच्छन् बिरामी

औषधि सेवन गरेको ४/५ घण्टामा समेत समुन्द्रीको स्वास्थ्यमा सुधार नभएपछि आयुर्वेद औषधालयबाटै पनि महतोले औषधि दिए । आयुर्वेद औषधालय यदुकहामा चिकित्सक छैन । तर, ओपीडी सेवा सञ्चालन भएको छ । कार्यालय सहयोगी चिकित्सको काम गरेको पाइयो । सहिद नगरपालिका वडा नं.६ का वडा अध्यक्ष रामेकवाल मण्डलको रक्तचाप पनि कार्यलय सहयोगी महतोले जाँचे । औषधालयमा चिकित्सक नबसेको बारे जानकारी नभएको वडा अध्यक्ष मण्डलले बताए ।

कार्यालय प्रमुख कबिराज रामछविला यादव काजमा स्वास्थ्य मन्त्रलाय गएपछि आयुर्वेद औषधालयमा कार्यालय सहयोगीले विरामीको उपचार गरेको पाइएको छ । आयुर्वेद औषधालय यदुकहामा कार्यरत कविराज रामछविला यादव मधेसी स्वास्थ्यकर्मी फोरमका केन्द्रीय उपाध्यक्ष हुन् ।

स्वास्थ्यकर्मी संगठनमा लागेको हुनाले साउनयता यादव काजमा स्वास्थ्य मन्त्रलायमा हाजरी गरेर सहिद नगरपालिकाबाट तलब बुझ्दै छन् । आयुर्वेद औषधालयबाट तलब बुझ्ने यादव स्वास्थ्य राज्यमन्क्री सुरेन्द्र यादवको निर्वाचन क्षेत्रको गतिविधिमा त्रियाशील छन् । मन्त्रीको निर्वाचन क्षेत्र महोत्तरीको सोनमामा बिरामीको तथ्याङ्क संकलन गर्न खटेका कारण जनकपुरमै बस्दै आएको यादवले बताए ।

सहिद नगरपालिकाका मेयर उदय बरबरीयाले आयुर्वेद औषधालयका प्रमुख यादवलाई फिर्ता पठाउन पत्रचार गरे पनि फिर्ता नआउँदा उपचारमा समस्या भएको बताए । अस्पतालको यदुकहामै नगरपालिका कार्यालय रहे पनि आयुर्वेद औषधालयको बेथितिबारे मेयर बरबरिया अनविज्ञता जनाए ।

आयुर्वेद औषधालयमा चिकित्सक छैनन् । तीन जना कार्यालय सहयोगी मात्रै छन् । स्वास्थ्य मन्त्रालयले चिकित्सक नै नभएको आयुर्वेद औषधालयमा नयाँ कार्यालय सहयोगीक रैजना रायलाई नियुक्त गरेका छन् । यसअघि यहाँ फेकु महतो र बमशंकर ठाकुर कार्यालय सहयोगी कार्यरत थिए । औषधालयमा औषधि, चिकित्सकको अभाव छ ।

यदुकाहा जस्तै जनकपुरस्थित अञ्चल आयुर्वेद औषधालयको अवस्था छ । जनकपुरको मुजेलियास्थित रहेको औषधि अभाव छ । प्रचारप्रसार अभावमा आयुर्वेद औषधलयमा बिरामी पुग्न सकेको छैन । कार्यालय स्थपना गरी चिकित्सक खटाएर नियमित बजेट आए पनि आयुर्वेद औषधालय प्रयोगविहीनको अवस्थामा पुगेको छ ।