जलेर २ बालिकाको मृत्यु

दिउँसो डेढ बजेतिर कोही नभएको बेला दीपक धमलाको गाईगोठमा आगो लागेको देखेपछि स्थानीय पुगेका थिए । गाईगोठ टाडमा दुई बालिका खेल्ने क्रममा आगो सल्किएको हुनसक्ने स्थानीयको अनुमान छ । आगलागीपछि दुई बालिका जलेको अवस्थामा गाउँलेले निकालेका थिए । धनगढीमाई नगरपालिका-१४ का वडाध्यक्ष ठरेन्द्र राईका अनुसार आगलागीमा गोठ जल्नुका साथै एउटा गाई समेत जलेको छ ।

जलेर मृत्यु भएकी दीक्षाका बुबा दीपक धमला जिरोमाइलस्थित अस्पतालमा हुँदा दिउँसो गोठमा आगलागीमा छोरीको मृत्यु खबर पाएपछि घर हिँडेका थिए । आगलागी घटना हुँदा दीपक बुबा भवनाथको उपचारका लागि जिरोमाइलस्थित अस्पतालमा थिए ।

'बुबालाई उपचार गराउन बिहान ९ बजेतिर जिरोमाइल पुगेँ,' दीपकले भने, 'दिउँसो यस्तो घटनाको खबर आयो ।' पूर्वपश्चिम राजमार्गको जिरोमाइलबाट १६ किलोमिटर उत्तर विकट चुरे क्षेत्रमा अमलीटार अवस्थित छ । आगलागी स्थलमा प्रहरी टोली पुगेर घटनाबारे जानकारी लिने काम भइरहेको सिरहा प्रहरीले जनाएको छ ।

वृद्धाको जलेर मृत्यु

यसैगरी सिरहाको कल्याणपुर नगरपालिका-७ का ६५ वर्षीया बनारसीदेवी सदाको घरमा सल्केको आगोमा शनिबार बिहान जलेर मृत्यु भएको छ । प्रहरीका अनुसार घरमा अचानक सल्केको आगोमा परी घरभित्रै सुतिरहेकी सदाको मृत्यु भएको हो । आगलागीबाट घर जलेर पूर्णरुपमा नष्ट भएको छ ।