२२० दिन पढाउन पत्राचार

कान्तिपुर संवाददाता

राजविराज — प्रदेश २ सरकारले सामुदायिक विद्यालयमा न्यूनतम २ सय २० दिन पठनपाठन गर्न सुनिश्चितताका लागि स्थानीय तहलाई पत्राचार गरेको छ । विद्यालय भर्ना अभियानलाई प्रभावकारी बनाउन सामाजिक विकास मन्त्रालयअन्तर्गत शिक्षा विकास निर्देशनालयले प्रदेश २ का सबै स्थानीय तहलाई पत्राचार गरेको हो । 

प्रदेश सरकारले स्थानीय बिदा पाँच दिनभन्दा बढी नराख्ने गरी शैक्षिक क्यालेन्डर तयार गरी प्रकाशन गर्न निर्देशनालयले आग्रह गरेको छ । गतवर्ष केही स्थानीय तह अधिकांशले शैक्षिक क्यालेन्डर प्रकाशन गरेनन् ।

प्रदेशभर एउटै शैक्षिक क्यालेन्डरअनुसार विद्यालय खुल्ने, पठनपाठन हुन्, बन्द हुने समय एकरुपता ल्याउनुपर्ने निर्देशनालयका निर्देशक रामाकान्त शर्माले बताए । उनले शैक्षिक क्यालेन्डर निर्माण गर्दा विद्यालय खुल्ने, पढाइ हुने दिन, वर्षे, हिउँदे बिदा र स्थानीय विदा, अभिभावक भेला, छात्रवृत्ति वितरण, सामाजिक परीक्षण हुने दिन र विशेष शैक्षिक कार्यक्रम हुने दिन समेत खुलाउनुपर्ने बताए । यसवर्ष सामाजिक विकास मन्त्रालयले शैक्षिक सत्र २०७६ सुरु भएपछि बैशाख महिनाभित्र विद्यालय उमेरका सवै वालवालिकालाई विद्यालय भर्ना गर्न आह्वान गरेको छ ।

सामाजिक विकासमन्त्री नवलकिसोर साहको अध्यक्षतामा भएको भर्ना अभियानसम्बन्धी बैठकले विद्यालय बाहिर रहेका विद्यालय उमेरका सबै बालबालिकालाई विद्यालय भर्ना गरी नियमित पठनपाठन गराउनुपर्ने निष्कर्ष निकालेको छ । गुणस्तरीय शिक्षा प्रवाह गर्नु प्रदेश सरकारको प्राथमिकतामा रहेकाले विद्यार्थी भर्ना अभियानलाई प्रभावकारी बनाउनुपर्ने निर्णय गरेको छ ।

प्रकाशित : वैशाख २, २०७६ ०९:२७
ADVERTISEMENT
प्रतिक्रिया
पठाउनुहोस्
ADVERTISEMENT

रूपाकोट भरिभराउ

हिमशृंखला, जडिबुटी, वन्यजन्तु र चराचुरुंगी देख्न पाइने भएकाले पर्यटकको घुइँचो
डम्बरसिं राई

खोटाङ — वरिपरि हरियाली । गुराँस फुलेर ढकमक । रूख र ढुंगाका पहराहरूमा सुनाखरी लगायतका फूलहरू उस्तै । लहरै हिमालको दृश्यले झनै रमाइलो । यसैको मजा लिँदै युवा–युवतीदेखि पाकासम्मले भरिभराउ थियो रूपाकोट । नयाँ वर्षका अवसरमा आइतबार बिहानैदेखि पर्यापर्यटकीय रूपाकोट क्षेत्रमा रमाउनेहरू निक्कै नै उत्साहित देखिन्थे ।

खोटाङको पर्यापर्यटकीय रूपाकोटमा रमाइलो गर्दै पर्यटक । तस्बिर : डम्बरसिं/कान्तिपुर

विभिन्न हिमशृङखला, विभिन्न ठाउँको दृश्यावलोकन, जडिबुटी, वन्यजन्तु तथा विभिन्न पन्छी देख्न पाइने भएपछि यहाँ आन्तरिक पर्यटकको घुइँचो लाग्न थालेको छ ।

पर्यटकीयस्थल रूपाकोट क्षेत्रलाई पर्यावरणीय तथा धार्मिक केन्द्रबिन्दुका रूपमा चिनिन्छ । रूपाकोट मझुवागढी नगरपालिकामा पर्ने यो रमणीय रूपाकोटमा रमाइलो गर्न तन्नेरीहरू झुम्मिने गरेका छन् । प्राकृतिक मनोरम, जैविक विविधता, विभिन्न प्रजातिका चराचुरुङ्गी, लोपोन्मुख वन्यजन्तुका साथै महत्त्वपूर्ण जडिबुटी पाइने भएकाले यसक्षेत्रमा पर्यटक आउने गरेको स्थानीय सप्तमणि राईले बताए ।

सर्वोच्च शिखर सगरमाथाको चुचुरो तथा अन्य हिमालहरूको लस्कर देखिने सुखद् दृश्यले जो कोहीलाई लोभ्याउने रूपाकोट पुगेका पूर्वसांसद टंक राईले बताए । ‘यहाँबाट विभिन्न ठाउँको दृश्यावलोकन गर्नका साथै सयौं प्रजातिका चरा, वन्यजन्तु, जडिबुटी पाइन्छन् ।’ राईले थपे, ‘त्यसैले पनि रूपाकोट अति सुन्दर मनमोहक ठाउँ हो ।’

रूपाकोट पर्यापर्यटनको सुन्दर भविष्य बोकेको पर्यटकीय क्षेत्र भएकाले यसको प्रवर्द्धन गर्नुपर्ने दिक्तेल रूपाकोट मझुवागढी नगरपालिका वडा नं १२ का वडा अध्यक्ष विकास राईले बताए । दिक्तेल रूपाकोट मझुवागढी नगरपालिकाका प्रमुख दीपनारायण रिजालले भने रूपाकोट क्षेत्र पर्यापर्यटन विकासका लागि नगरपालिकाले योजनाबद्ध ढंगले काम सुरु गरेको बताए । यसका लागि पहिलो चरणमा भ्युटावर निर्माण सुरु गरिएको छ । उक्त भ्युटावरका लागि २७ लाख बजेट विनियोजन गरेर काम थालनी गरिएको हो ।

रूपाकोट जिल्लाकै पानीको स्रोत भएकाले पनि यसको संरक्षण समेत सुरु गरिएको छ । गत दुई वर्षदेखि विभिन्न ठाउँमा पोखरी निर्माण थालिएको छ । रूपाकोट क्षेत्रमा तत्कालीन जिल्ला वन कार्यालयले विभिनन पोखरी समेत निर्माण गरेको हो । पोखरीमा जमिने पानीले मुहान सुक्न नदिनुका साथै कालान्तरमा पानीको मुहान फुट्न भएकाले पोखरी निर्माण गरिएको हो ।

प्राकृतिक सौन्दर्यसँगै रूपाकोट क्षेत्रमै पर्ने सिद्धबाबाले बास गरेको गुफाको दर्शनका लागि उत्तिकै प्रशिद्ध मानिन्छ । मनोकांक्षा पूरा हुने विश्वासमा सिद्धबाबाको पूजा आराधना गर्ने चलन छ । घर–परिवारमा भव्य–तव्य नपरोस्, सुखशान्ति मिलोस, खेतीबाली सप्रियोस् तथा गाउँ समाज र पशुचौपाय दैविक प्रकोपमा नपरोस् भन्ने कामनासाथ सिद्ध बाबाको पूजाआराधना गर्ने चलन रहेको मुढेका बिचारी तामाङले बताए ।

यहाँ सिद्ध बाबाले तपस्या गरेको क्षेत्र भएकाले रूपाकोट क्षेत्र अत्यन्तै पवित्रा मानिन्छ । रूपाकोटको सिद्धथानमाथिको भ्युप्वाइन्टबाट हिमाललाई हेरेर मायालुलाई सम्झिए चिताएको पूरा हुने विश्वास गरिन्छ ।

स्थानीयका अनुसार रूपाकोटबाट देखिने हिमालहरूमध्ये नुम्बुर र कारेलुङ हिमालको बीचमा रहेको हिमालको नाम नभएकाले
आफ्नो प्रियतमको नामबाट नामाङकन गरे अटल र अमर माया रहन्छ भन्ने जनविश्वास रहेको पूर्वसांसद टंक राईले सुनाए । ‘रूपाकोट घुम्न आउने हरेक जोडीले आफ्नो प्रियतमको नाममा उक्त हिमालको नाम राखिन्छ ।’ राईले भने, ‘यसो गर्दा प्रियजन बीचको नाता र मायाँ अटल र अमर हुन्छ भन्ने चलन छ ।

प्रकाशित : वैशाख २, २०७६ ०९:२५
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT