ज्युँदो सहिदलाई जीवनयापनकै समस्या

शंकर आचार्य

पर्सा — तेस्रो मधेस आन्दोलनका ज्युँदा सहिद मुन्सी राउत खुट्टाले नहिडेको ४ वर्ष पुग्न लाग्यो । वीरगन्ज २८ बगहीका ३२ वर्षीय राउतका लागि घरको आँगनमा बनाइएको बाँसको मचान र हिलचियर सहारा बनेको छ । २०७२ असोज ३ गते मुलुकले पहिलो गणतान्त्रिक संविधान पाएको ऐतिहासिक दिनमै उनलाई वीरगन्जमा गोली लागेको थियो ।

त्यस दिन तत्कालीन मधेसी मोर्चाको आह्वानमा संविधानको विरोध गर्दै मधेस आन्दोलनमा उनी होमिएका थिए । वीरगन्जको गीता मन्दिर रोडमा प्रहरीले चलाएको गोली उनको मेरुदण्डमा लाग्यो । अचेत अवस्थामा उनलाई आधा घन्टा भित्रै हेलिकप्टरबाट राजधानी लगियो । सुरुमा वीर अस्पताल अनि जनगालको अर्थोपेडिक अस्पताल र त्यसपछि सुषमा कोइराला मेमोरियल अस्पताल गरी उनको ६ महिना उपचार भयो । मधेसी मोर्चाले उनको उपचारमा करिब १ लाख ५० हजार रुपैयाँ खर्च गर्‍यो ।

सँगै गोली लागेका शत्रुधन पटेलको ज्यान गयो । मुन्सी आधा शरीर नचल्ने स्पाइनल कर्ड इन्जुरीको उपचारै नहुने पीडा भोगेर बाँचिरहेका छन् । उनको कम्मर मुनिको शरीरको भाग चल्दैन । दिसापिसाब चुहिएको भेउ पाउँदैनन् । कम्मर छेउ ४ वर्षअघि लगाइएको पिसाब जम्मा हुने प्लाष्टिकको थैलीले साथ छोडेको छैन । १२/१२ दिनमा यो थैली फेर्नुपर्छ । हिलचियर उनको जीवनसाथी बनेको छ । ओछ्यानबाट ह्विलचेयरमा बसाउन कम्तीमा २ जना बलिया मानिस चाहिन्छ । आफ्नै हातको भरले मुस्किलले घर वरपर ह्विलचियर चलाउँछन् । परसम्म जान ज्यानमा ताकत छैन ।


मुन्सी र शान्ति दम्पती सन्तानविहीन छन् । उनका ३ दाजुभाइ छुट्टभिन्न भइसकेका छन् । ७६ वर्षीय वृद्ध बुवा रामचन्द्र र ७१ वर्षीया आमाको जिम्मेवारी मुन्सी दम्पतीलाई छ । मुन्सीकी पत्नी शान्ति कुमारीले १ वर्षअघि स्थानीय स्वास्थ्य चौकीमा करारमा कार्यालय सहयोगीको जागिर पाएकी छन् । गोली लाग्नुअघि मुन्सी पर्सा बारा औद्योगिक करिडोरको सनराइज प्लास्टिक उद्योगमा सामान्य मजदुरी गर्थे ।

हातमुख जोर्न र मेरो सेवा टहल गर्ने वृद्ध बुवाआमाको गुजाराका लागि सरकारले मासिक १०/१५ हजार रुपैया“को अपांग भत्ताको व्यवस्था गरिदिए बाकी जीवन काट्न सहज हुने उनको भनाइ छ । पत्नी शान्ति कुमारीले पति, सासुससुराको सेवा टहलदेखि घर चलाउने रकम पनि आफ्नै जागिरको भरले गर्नु परेकाले घर चलाउन गाह्रो भएको बताइन् । ‘मेरो सानोतिनो अस्थायी जागिरको भर छ,’ उनले भनिन्, ‘त्यतिले मलाई घर खर्च चलाउन अत्यन्त कठिन भएको छ ।’


गोली लागेको ६ महिनापछि वीरगन्ज फर्के लगत्तै मधेस रिलिफ फन्डको सौजन्यमा मुन्सीको दिल्लीस्थित इन्डियिन स्पाइनल कर्ड इन्जुरी सेन्टर र दिल्लीकै एम्स अस्पतालमा पनि उपचार भएको थियो । त्यहा“ पनि उनको उपचार सम्भव नभएपछि घर फर्काइएको हो ।


चुनाव आउँदा नेताहरू आफूलाई भेट्न घर आउने गरे तापनि चुनावपछि आफ्नो फोन समेत नउठाउने मुन्सीको गुनासो छ । उनले भने, ‘मुख्यमन्त्री लालबाबु राउतसँग हिजो कुरो भएको थियो, उहाँले केही समय कुर्न आश्वासन दिनुभएको छ, हेरौं के हुन्छ ।’

प्रकाशित : वैशाख ११, २०७६ ११:३७
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

नेकपामा असन्तुष्टि चुलियो

कान्तिपुर संवाददाता

सर्लाही — नेकपाको जिल्ला तहको नेतृत्व चयनप्रति असन्तुष्टि जनाउँदै जिल्ला सचिव डाचाराज वाग्लेले राजीनामा दिने घोषणा गरेका छन्  । उनले नेतृत्व चयन प्रक्रियामा गम्भिर त्रुटि भएको भन्दै निर्णय नसच्याए समानान्तर कमिटी बनाउने चेतावनी दिए  ।

वागमतीको सीता प्यालेसमा सोमबार पत्रकार सम्मेलन गरी वाग्लेले स्थायी कमिटीको मनोयनप्रति असन्तुष्टि जनाएका हुन् । पार्टी केन्द्रीय सदस्य भइसकेको आफूलाई प्रदेश कमिटी मातहतमा जिल्लाकोे सचिवमा मनोनयन गरेर उपहास नै हुनेगरी राखिएको गुनासो गरे ।


उनले आफ्नो साविकको पद उपहास गरिएको भन्दै जिल्ला सचिवबाट राजीनामा दिने घोषणा गरेका छन् । प्रदेश कमिटीका नेता रेवती पन्तलाई अध्यक्षको जिम्मेवारी र केन्द्रीय सदस्य भइसकेको आफूलाई सचिवमा मनोयन गरेको भन्दै उनले असन्तुष्टि जनाएका हुन् । ‘पार्टीले सार्वजनिक गरेको सूचीअनुसार मलाई सचिवको जिम्मेवारी दिइएको छ, पार्टीको केन्द्रीय सदस्य भइसकेको व्यक्ति जिल्ला सचिवमा कसरी बस्नु, यो केन्द्रीय कमिटीकै उपहास हो, उनले भने, ‘यसैकारण मैले सचिव पद अस्वीकार गर्ने निर्णय लिएको छु ।’


केन्द्रीय सदस्यबाट जिल्ला सचिवमा घटुवा भएपछि वाग्ले निकटका नेता कार्यकर्ताले व्यापक असन्तुष्टि जनाएका छन् । पार्टीले एकदम गलत निर्णय गरेको भन्दै उनीहरू निर्णय सच्याउन नेतृत्वसँग माग गरेका छन् ।


पत्रकार सम्मेलनमा तत्कालीन एनेकपा माओवादी स्थायी कमिटी सदस्यसमेत रहेका वाग्लेसहित तत्कालीन एमालेबाट निर्वाचित प्रदेश सांसदद्वय डिल्लीप्रसाद उप्रेती र बेची लुंगेली तथा नेतहरू हरि उप्रेती, सुरेन्द्र लामा, उत्तरकुमार मैनाली तथा तत्कालीन माओवादीबाट निर्वाचित बागमती नगरपालिका प्रमुख भरतकुमार थापा, जिल्ला अध्यक्ष कमल बुढाथोकीलगायत उपस्थिति थिए । नेतृत्वले तत्काल निर्णय नसच्याए नेकपाको समानान्तर कमिटी गठन गर्ने उनीहरूको चेतावनी छ ।


नेकपा केन्द्रीय नेतृत्व तहले सोमबारमात्र सर्लाहीको अध्यक्षमा रेवती पन्त र सचिवमा डाचाराज वाग्लेलाई चयन गरेको छ । सचिवको असन्तुष्टि र समानान्तर कमिटी घोषणाको हल्लाले जिल्लाभित्र नेकपा राजनीति एकाएक तातिन पुगेको छ ।

प्रकाशित : वैशाख ११, २०७६ ११:३६
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT