सिम्रौनगढ क्षेत्रमा खानेपानी हाहाकार

पवन यादव

सिमरा — बाराको सिम्रौनगढ नगरपालिका ७ झवानीकी ६० वर्षीया देवपतिदेवी रामले नुहाएको एक साता बढी भइसक्यो । मैलो कपडा सफा गर्न र गाईभैंसी, खसीबाख्रालाई पानी खुवाउन पनि निकै सास्ती भोग्नु परेको उनले बताइन् ।

बाराको सिम्रौनगढ नगरपालिका ७ झवानी टोलमा चापाकलबाट पानी निकाल्ने प्रयास गर्दै स्थानीय महिला ।  तस्बिर : पवन/कान्तिपुर  

खाना पकाउन र पिउनका लागि खेतमा सिँचाइ गर्न गाडिएको बोरिङको पानी ल्याएर काम
चलाउनुपरेको उनले सुनाइन् ।

शुद्ध पानी पिउनका लागि उनको घरको आँगनमा एक सय ५० फिट गहिरो चापाकलको पाइप गाडिएको छ । फागुनअघिसम्म चापाकलमा खुबै पानी आउथ्यो । एक पल्ट चापाकलको
ह्यान्डिल दबाउँदा लोटा भरिन्थ्यो । तर फागुन यता उक्त चापाकलबाट कम पानी आउँछ ।

चैतको दोस्रो सातादेखि त जति पेले पनि चापाकलमा पानी नै आउँदैन । एकैछिनमा लोटा भरिने चापाकललाई बेस्सरी पेल्दा ५/१० मिनेटमा पनि लोटा भरिँदैन । लेयर सुकेर चापाकलबाट अहिले पानी नै आउन छाडेको उनले जानकारी दिइन् ।

‘गाउँमा ३÷४ वटा चापाकलबाहेक सबै सुकेका छन्,’ उनले भनिन्, ‘जत्ति पेले पनि चापाकलबाट पानी आउँदैन ।’ उनले सुकेको चापाकल पेलेर देखाइन् । जति पेल्दा पनि पानी आएन । डेढ सय भन्दा बढी घर परिवारको बसोबास रहेको झवानी टोलको प्राय: सबै घरमा चापाकल गाडिएका छन् । राम्रो पानीका लागि डेढ सय फिटभन्दा बढी गहिरो गाडिएको प्राय: सबै चापाकलले पानी दिन छाडेका छन् । त्योभन्दा कम गाडिएको चापाकललेचाही पानी दिने गरेको स्थानीयले बताए ।
गाउँमा पानी खानका लागि सबै चापाकल डेढ सय वा सोभन्दा बढी गहिरो गाडिएको स्थानीय कोशिलादेवी रामले बताइन् । ‘पहिला यसरी चापाकल सुक्दैनथ्यो,’ उनले भनिन्, ‘विगत ३ वर्षदेखि नै गर्मीको बेलामा चापाकल सुक्ने क्रम सुरु भएको छ ।’

उमेरले ६० काटिसकेकी वृद्धा कोशिलाले चापाकल सुकेर यसपालि गाउँमै पानीको हाहाकार भएको बताइन् । चापाकलको पानी सुकेपछि सिँचाइका लागि ४०/५० फिटसम्म गहिरो गाडिएको बोरिङको अशुद्ध पानी खान बाध्य हुनुपरेको उनले बताइन् ।

गाउँभरिकै चापाकल सुकेपछि तत्कालै पानीको वैकल्पिक व्यवस्था गर्न स्थानीय बासिन्दाले सम्बन्धित सरोकारवाला निकाय र सरकारसँग माग गरेका छन् । घरबाटै कहिलै ननिस्कने बुहारीहरू पानीका लागि अहिले टाढाटाढा जानुपर्ने बाध्यता आइपरेको पीडितले बताए ।
घरबाट झन्डै एक÷डेढ किलोमिटरसम्म खेतमा चलेको मोटरबाट पानी भर्नु पर्ने अवस्था आएको स्थानीयले जनाए ।

चापाकलको पानी खाने चलन बढ्दै गएपछि गाउँमा खनिएका डेढ/दुई सय फिट गहिरो इनार प्रयोगविहीन भएका छन् । पानीको श्रोतका रूपमा रहेका इनार ठप्प भएका कारण स्थानीयलाई पानीको समस्या बढेको हो । यस क्षेत्रमा पानीको मुख्य श्रोतका रूपमा रहेको इनार र चापाकल दुबै ठप्प भएपछि गाउँमा पानीको हाहाकार भएको पीडितहरूले बताए ।

झवानी गाउँमा मात्र होइन । यस क्षेत्रका टेटा गाउँमा पनि ६० वटाभन्दा बढी चापाकल सुकेको सिम्रौनगढ नगरपालिका १० टेटाका अकलु दास तत्माले बताए । ‘एक साताअघिसम्म थोरै-थोरै पानी दिँदै आएको चापाकल अहिले पुरै सुकेको छ,’ उनले भने, ‘जति चलाए पनिचापाकलबाट पानी निस्कँदैन ।’

गाईगोरुलाई पानी खुवाउन गोठमा गाडिएको चापाकलको पानीबाट काम चलाउनुपरेको उनले जानकारी दिए । अझै बर्खा नभए अहिले सुक्न बाँकी रहेको चापाकलसमेत पानी दिन छाड्ने उनको ठम्याइ छ ।

पानी अभावको समस्यालाई समाधान गर्न सम्बन्धित निकायले ध्यान दिनुपर्नेमा उनको जोड छ । सिम्रौनगढ नगरपालिकाको वडा नं. ८ र ९ कचोर्वा, वडा नं. १० टेटा, वडा नं. १ बैरिया, वडा नं. ७ झवानी गाउँमा अहिले खानेपानीको हाहाकार भएको सिम्रौनगढ नगरपालिकाका प्रमुख मेयरविजयशंकर यादवले बताए ।

‘नगर क्षेत्रको गाउँ टोलमा गाडिएको चापाकलले पानी दिन छाडेको खबर आएपछि त्यस क्षेत्रमा खाने पानी पु¥याउन नगरपालिकाले पहल कदमी थालेको छ,’ उनले भने, ‘सिम्रौनगढ बजारमा रहेको खानेपानी ट्यांकीको पानी गाउँसम्म पु¥याउन खानेपानीको पाइप बिछ्याउन तयारी सुरु गरिएको छ ।’

एक साता सम्ममा पाइप बिछ्याएर झवानीमा पानी पु¥याउने तयारी नगरपालिकाले थालेको उनले जानकारी दिए । चापाकल सुकेर नगर क्षेत्रको विभिन्न टोलका गरी १२ हजारभन्दा बढी परिवार प्रभावित भएको उनले जानकारी दिए ।

नगरवासीलाई शुद्ध पानीको व्यवस्थापन गर्न आफु तयारीमा जुटेको उनले बनाएकाछन् । सिम्रौनगढसँगै जिल्लाको बेल्दारी,पिपरपाती, बैनौली लगायत गाउमा पनिअहिले चापाकल सुक्ने क्रम बढेको स्थानीयले जानकारी दिए ।

प्रकाशित : जेष्ठ ७, २०७६ ११:२३
ADVERTISEMENT
प्रतिक्रिया
पठाउनुहोस्
ADVERTISEMENT

ठोरीवासीद्वारा भारतीय बजार बहिष्कार

शंकर आचार्य

पर्सा — पर्साको सुदूरपश्चिम ठोरी गाउँपालिका बासिन्दाले सोमबार देखि सीमावर्ती भारतीय बजार भिखनाठोरीमा किनमेल गर्न बन्द गरेका छन् ।

किनमेल गर्न भारतीय बजारमा गएका ठोरीबासीलाई विहीबार कुटपिट गर्ने भारतीय युवकलाईपारिका प्रहरीले हालसम्म पक्राउ नगरेको गुनासो गर्दै बजार बहिष्कार गरेका हुन् ।

नेपालीलाई कुटपिट गर्ने भारतीय युवकलाई पक्राउ गरी कारवाही नगरेसम्म ठोरीबासी आक्रोशित हुँदै सीमावर्ती बजारलाई बहिष्कार गरेको स्थानीय रामशरण लामिछानेले बताए । बिहीबार साँझ भिखनाठोरीमा छ जनाजति ठोरीबासीलाई भारतीयले कुटपिट गरेका थिए ।

ठोरी १ टाउनका विष्णु बिष्टलाई निर्घात कुटपिट गरी घाइते बनाएपछि उनलाई शुक्रबार उपचारार्थ नारायणघाट पठाइएको छ । भारतीयले ठोरी इच्छानगरका १२/१३ बर्ष उमेर समूहका ३ बालिका, सुन्दरवस्तीका अन्य २ जनालाई समेत कुटपिट गरेका थिए ।

‘नेपालतर्फ ठोरीको वनशक्ति मन्दिर नजिक झंैझगडा गरी भारत पसेका भारतीय युवक रवि साहले बदलाको भावना राखी अन्य भारतीय समेत भई जो नेपाली भेट्टायो कुटपिट गरी हाल्ने गरेका थिए,’ लामिछाने भने, ‘उक्त घटनालगत्तै ठोरीका भद्र भलादमी, नेपाल प्रहरी, सशस्त्र प्रहरी समेतका अधिकारीहरू भारत पुगेर त्यहाँका सुरक्षा अधिकारीलाई भेटेर लिखित उजुरी समेत दर्ता गरेका छन् । तर नेपाली कुट्ने भारतीय नागरिकलाई कुनै कारबाही नगरेपछि ठोरीबासीले भारतीय बजार नै बहिष्कार गर्नु परेको हो ।’

स्थानीय प्रकाश खनालले बिहीबार भारतीय बजार भिखना ठोरीमा हाट बजार लाग्ने गरेको र त्यसदिन धेरै नेपाली किनमेलका लागि त्यहा पुग्ने गरेकाले धेरै नेपाली कुटिएको बताए । ‘एक जना भारतीयले निजी झगडाको कारण सम्पूर्ण नेपालीमाथि नै कुटपिट गर्दासमेत भारतीय प्रहरीले उसलाई पक्राउ नगर्दा नेपालीको चित्त दुखेको हो,’ उनले भने ।

इलाका प्रहरी कार्यालय ठोरीका प्रहरी निरीक्षक केदार पन्तले बिहीबार भारतीय नागरिक रवि साहले ठोरीको वनशक्ति मन्दिर नजिक आएर स्थानीय एक वृद्धा महिलालाई अपशब्द प्रयोग गरी जबर्जस्ती उनको बारीको बाटो भएर केही भारतीयलाई नजिकको झोलु¨े पुलतर्फ पठाउन खोजेपछि विवाद भएको बताए ।

मादक पदार्थ सेवन गरेका रवीले जग्गा धनी ती वृद्धालाई तथानाम भनेर हप्कीदप्की गरिरहेको देखेका चितवन माडी बसन्तपुर-३ का युवा सूर्य भन्ने ३३ बर्षिय ओम बहादुर गुरुङले साहलाई दुई थप्पड हिर्काएका थिए ।

सुभद्रा थानाका सव इन्सपेक्टर धनन्जय कुमारले साहलाई अविलम्ब पक्राउ गरेर कारबाही गर्ने प्रतिबद्धता जनाएका थिए । सोमबार नेपालीले भारतीय बजार बहिष्कार गरेको कुरोको जानकारी आफूले सोमबार नै भिखना ठोरीका भारतीय सुरक्षा फौज एसएसबीका प्रमुख मनभिन्दर सिंहलाई समेत जानकारी गराइसकेको प्रनि पन्तले बताए ।

प्रकाशित : जेष्ठ ७, २०७६ ११:२१
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT