कुटपिटबाट सैनिकको मृत्यु पछि पुरुषले गाउँ छाडे

भरत जर्घामगर

सिरहा — गाउँलेको कुटपिटबाट बिदामा घर आएका सैनिक जवानको मृत्यु भएपछि सिरहाको बरियारपट्टी-४ स्थित तेनुवापट्टी गाउँ सुनसान भएको छ ।

तेनुवापट्टी गाउँमा भेटिएका बृद्धा र बालबालिका ।तस्बिर : भरत/कान्तिपुर

गाउँमा बालबालिका, वृद्धवृद्धा, महिला मात्र भेटिन्छन् । पक्राउ पर्ने डरले पुरुषहरू गाउँ छाडेर भागेको छन् । गाउँमा भएका महिला, वृद्धवृद्धा समेत त्रसित छन् । नयाँ मान्छे गाउँ प्रवेश गरेपछि टोलका महिला, वृद्धवृद्धा बोल्न समेत डराउँछन् ।

बरियारपट्टी-४ सोहपुरस्थित घर आएका सैनिक जवान २५ वर्षिीय अनिसकुमार सिंहलाई गत वैशाख २८ गने राति बिजुलीको पोलमा बाँधेर तेनुवापट्टीका स्थानीयले कुटपीट गरेका थिए ।

स्थानीयको कुटाइबाट घाइते उनको काठमाडौंको छाउनीस्थित वीरेन्द्र सैनिक अस्पतालमा उपचारका क्रममा जेठ १ मा मृत्यु भएको थियो । अनिस संखुवासभाको खाँदबारीस्थित बराहदल गुल्ममा कार्यरत थिए ।

तेनुवापट्टीका विलक्षण यादवको घरमा चोरी गर्न आएको भन्दै अनिसलाई पक्राउ गरेर गाउँलेले मिलेर बिजुलीको पोलमा बाँधेर राति १:३० बजे मरनासन्न हुनेगरी कुटपिट गरेका थिए । कुटपिटको भिडियो समेत सामाजिक सञ्जालमा भाइरल भएको थियो ।

पोलमा बाँधेको ठाउँबाट आफन्तले अनिसलाई बिहान ४ बजेमात्र प्रहरीको सहयोगमा उद्धार गरी उपचारका लागि लहानस्थित सप्तऋषि अस्पताल लगेका थिए । त्यहाँ उपचार सम्भव नभएपछि विराटनगरस्थित नोबेल अस्पताल लगिएको थियो ।

विराटनगरमा समेत उपचार हुन नसकेपछि वैशाख ३० मा अनिसलाई छाउनी लगिएको थियो ।
अनिसको मृत्युलगत्तै विलक्षणले घरमा ताला लगाएर गाउँ नै छाडेका छन् । सञ्चारकर्मी टोली गाउँ पुग्दा भेटिएका उनका छिमेकी ७५ वर्षीय श्याम साह र ७३ वर्षीय अशेश्वर साहले रातिको समयमा भएकाले हल्ला खल्ला भएपनि घटनाबारे आफूहरूलाई थाहा नभएको बताए ।

उनीहरूले घट्ना भएको भनिएको विलक्षणको घरमा ताला लगाएर उनीहरू अन्यत्रै गएको बताए । वस्तुभाउको हेरचाह आफन्तले गरिदिएको उनीहरूले सुनाए । ‘घटनापछि गाउँका पुरुषहरूले गाउँ नै छाडेका छन,’् रामायण पढिरहेका ती दुई वृद्धले भने, ‘पक्राउ पर्ने डरले उमेर पुगेका पुरुष गाउँमा छैनन्, बर्दी र सादा पोशाकमा आएर प्रहरीले सोधखोज गरेकाले पनि गाउँमा वृद्धवृद्धा र महिला, बालबच्चा मात्रै बसेका छन् ।’

घटनापछि मृतकका बुवा नरेन्द्रकुमार सिंहले प्रहरीमा किटानी जाहेरी दिएपछि प्रहरीले अनुसन्धानसँगै घटनामा संलग्नको विभिन्न टिम बनाएर खोजीलाई तिब्र बनाएको छ ।

चोरीको आरोप लगाएपनि मृतकका आफन्तले घरमै रहेको बेला गत वैशाख २८ गने राति अनिसलाई आँगनमा सुतिरहेको अवस्थामा १२ बजेपछि केही व्यक्तिहरूले अपहरण गरेर लगेको र डेढ किलोमिटर पश्चिमतिर पर्ने आधारभुत विद्यालय तेनुवापट्टीछेउ हातखुट्टा बाँधेर कुटपीट गरिएको दाबी गर्दै आएका छन् ।

लहानमा मृतकका काका मनोज सिंहले घरमा आयोजना गरेको अष्टजाममा सपरिवार गएको र घरमा ७० वर्षीय हजुरआमा ऐंजन देवी र अनिस मात्रै रहेको मौका छोपी अपहरण गरी मरणासन्न कुटपिट गरिएको परिवार पक्षले दाबी गरेका छन् ।

सिरहाका प्रहरी प्रमुख एसपी जीवनले श्रेष्ठले किटानी जाहेरी परेलगत्तै प्रहरीले घटनाको अनुसन्धान गरी संलग्नको खोजीलाई तीब्र पारिएको जनाए । ‘घटनास्थल गाउँका पुरुष सबै भागेकाले अनुसन्धानमा समस्या भएपनि विभिन्न टिम बनाएर खोजीसँगै, शंकास्पद स्थानमा खानतलासी, गाउँमा भेटिएकाहरूसँग सोधपुछ जारी राखेका छौं,’ एसपी श्रेष्ठले भने, ‘छिमेकी जिल्लासँग र भारतीय प्रहरीसँग समेत समन्वय गरी खोजी कार्यलाई तीब्रता दिएका छौं ।’ हरेक कोणबाट अनुसन्धान र खोजीकार्यलाई तीब्रता दिएकाले पक्राउ गर्नमात्रबाँकी रहेको उनले जानकारी दिए ।

प्रकाशित : जेष्ठ ७, २०७६ ११:२५
ADVERTISEMENT
प्रतिक्रिया
पठाउनुहोस्

पञ्चावती मन्दिरमा घुइँचो

वैशाख शुक्ल पूर्णिमाका दिन हरेक वर्ष लाग्ने मेला भर्न र विगतमा गरेको भाकल पूरा भएपछि मन्दिरमा पशुपक्षीको बलि दिन सिरहा, सप्तरी, उदयपुर, धनुषा, काठमाडौं, झापा, सुनसरी, महोतरीलगायत भारतको बिहारबाट समेत भक्तजन आउने गर्छन् ।
भरत जर्घामगर

सिरहा — सिरहाको लहान नगरपालिका १५ ढोढनास्थित राजदेवी पञ्चावती मन्दिरमा शनिबार मेलामा श्रद्धालुहरूको घुइँचो लागेको छ । वर्षेनी मेला भर्न आउने श्रद्धालुहरूको संख्या बढ्दो छ ।

सिरहाको ढोढनास्थित राजदेवी पञ्चावती मन्दिरमा शनिबार श्रद्धालुको घुइँचो । तस्बिर : भरत/कान्तिपुर

वैशाख शुक्ल पुर्णिमाका दिन हरेक वर्ष लाग्ने मेला भर्न र विगतमा गरेको भाकल पूरा भएपछि मन्दिरमा पशुपंक्षीको बलि दिन सिरहा, सप्तरी, उदयपुर, धनुषा, काठमाडौं, झापा, सुनसरी, महोतरीलगायत भारतको विहारबाट समेत भक्तजन आउने गर्छन् ।

राजदेवी मन्दिरमा पूजा गरेपछि निःसन्तानलाई सन्तान प्राप्ति, रोग विनाश, कार्यसफलता हुने विश्वासले भक्तजन भाकल गरेर आउने गर्छन् । लहानदेखि ९ किलोमिटर उतर चुरेजङ्गलको फेदीमा रहेको राजदेवी मन्दिरमा बोका, पाठी, हाास, परेवा रकुखुराको बलि दिने गरिएको छ ।

पुरुषले भाकल गर्दा बोका र महिलाले पाठी बलि दिन्छन् । वैशाखे पूर्णिमा अर्थात् चण्डी पूर्णिमाका दिन मात्र बलि दिइने मन्दिरमा भाकल पूरा भएपछि भक्तजनले पशुपंक्षी बली दिने गरेका हुन् । राजदेवी मातालाई चण्डी पूर्णिमाका दिन मात्र बलि चढाउने गरिएको छ ।

भाकल पूरा भएपछि मन्दिरमा बली चढाउन आउने भक्तजनको संख्या बर्सेनि बृद्धि हुने गरेको पूजा व्यावस्थापन समितिले जनाएको छ । गतवर्ष ३५ हजारभन्दा बढी बोका र पाठीको बलि दिइएको थियो । चुरेजंगलमा स्थापित मन्दिरमा परापूर्वकालदेखि नै बलिपूजा गर्ने प्रचलन रहेको स्थानीय बासिन्दाले बताए ।

गढिमाई मन्दिरपछि राजदेवी पञ्चावती मन्दिरमा अत्यधिक बलि दिने गरिएको मन्दिरका पुजारी डम्बरबहादुर भट्टले बताए । उनका अनुसार दश पुस्ताअघि त्यस क्षेत्रको वनमा जंगली जनावरले दुःख दिन थालेपछि धामीलाई देवीले सपनामा त्यसक्षेत्रमा मन्दिर स्थापना गरी पूर्णिमाको दिन बलि दिनु भनेअनुसार बलि दिने परम्परा शुरु भएका हो ।

मन्दिरको चारैतीर जंगलले घेरिएको र चरा चुरुंगी चिरबिर आवाजले देवस्थल रमणीय छ । मन्दिरको उतरपट्टि राजाजी, दिनाभद्री, कुवेर, पूर्वतिर लाटी बौकी र सलहेस, दक्षिणमा नागनागिना रउतरपश्चिमतर्फ बलि दिने स्थान छ ।
चर्को घामले एक श्रद्धालुको मृत्यु
चर्को घाम र अत्यधिक गर्मीका कारण मेला भर्न आएका सिरहा सुखीपुर २ चन्नरपट्टिका ४० वर्षीय बालगोपाल यादवको मृत्यु भएको छ । भीडभाड, चर्को घाम र गर्मीका कारण बेहोस भएका यादवको प्राथमिक उपचारका क्रममा मृत्यु भएको प्रहरीले जनाएको छ ।

उनी बेहोस भएपछि मेला समितिले तत्काल उपचारका लागि प्रयत्न गरे पनि सफल नसकेको समितिले जनाएको छ । चर्को घाम, गर्मी र अत्यधिक भीडका कारण १२ जना श्रद्धालु भक्तजन बेहोस भएको समितिले जनायो । प्राथमिक उपचारपछिउनीहरू घर फर्किएका छन् ।

प्रकाशित : जेष्ठ ५, २०७६ १२:१४
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT