मन्दिर परिसर खाली नहुँदा ढिलाइ

कान्तिपुर संवाददाता

जनकपुर — जानकी मन्दिरका महन्त रामतपेश्वर दास र उनका उत्तराधिकारी रामरोशन दासले मन्दिर परिसरमा रहेको पूजा सामग्रीको पसल हटाउन नमान्दा मन्दिर परिषर पुनर्निर्माण योजनामा ढिलाइ भइरहेको निर्माण कम्पनीले आरोप लगाएको छ । 

यसअघि मन्दिरका उत्तराधिकारी महन्त रामरोशन दासले ठेकेदारको कारणले मन्दिर सौन्दर्यीकरण आयोजनामा ढिलाई भएको आरोप लगाएका थिए । मन्दिर परिसरमा यत्र तत्र राखिएका निर्माण सामग्रीका कारण मन्दिर फोहरको ढुंगुर बनेको तथा श्रद्धालुलाई आउजाउ गर्न कठिन भएको आरोप दासको छ ।

मंसिर तेश्रो साता प्रदेश २ का मुख्यमन्त्री लालबाबु राउत ‘ मुख्य मन्त्री स्वच्छता अभियान ’ को आरम्भ जानकी मन्दिर सौन्दर्यीकरण आयोजनाबाटै गरेका थिए । ८ करोडको उक्त आयोजना अन्तर्गत जानकी मन्दिरमा मार्बल र ग्रेनाईट जडान, तीन मुख्यद्वार पुनर्निर्माण तथा ढलनिकास आदिको निर्माण भई रहेको छ ।

मन्दिर परिसरमा वालुवा, ह्युमपाईप, गिटीलगायतका निर्माण सामग्रीहरू यत्रतत्र थुपारिएको तथा पुराना संरचनाहरू भत्काईएकाले मन्दिर परिसर सांगुरो भएको आरोप स्थानीयवासीको छ । यसका साथै मन्दिर परिसरमै फूलमाला, पर्सादी लगायतको पसल समेत थापिएकाले श्रद्धालुलाई सास्ती भएको छ । फूलमाला, प्रसादी चूराको पसलथाप्नेसंग मन्दिर व्यवस्थापनले दैनिक तथा मासिक भाडा लिन्छ ।

ठेकेदार ठाकुरले भने,‘मन्दिर परिसरमा लगाइएको पसल हटाउन हामीले पटक पटक महन्तजीसंग आग्रह गर्यौ । स्थानीय प्रहरी प्रशासनलाई पनि भन्यौ तर हटाईएन । परिसर खाली नभएसम्म निर्माण कार्यलाई कसरी निरन्तरता दिने ?’ यसका साथै मन्दिर भित्र रहेको आधा दर्जन अधिक सौचालयमध्ये एककोमात्र सेफ्टी टैंक भएको तथा बाकीका मलमूत्र अव्यवस्थित रहेको जानकारी पनि ठेकेदार ठाकुरले दिए । ठाकुरका अनुसार – सौचालयहरूको मलमूत्र व्यवस्थापन ठुलो समस्या बनेको छ ।

प्रकाशित : असार २, २०७६ १०:४५
प्रतिक्रिया
पठाउनुहोस्

विद्यालयमा स्वास्थ्य बिमा

ओमप्रकाश ठाकुर

सर्लाही — जिल्लाको उत्तरी क्षेत्रमा पर्ने लालबन्दी नगरपालिकास्थित एक सामुदायिक विद्यालयमा स्वास्थ्य बिमा लागु गरिएको छ । वडा कार्यालयको पहलमा लक्षित वर्गका लागि छुट्याइएको रकमबाट बालबालिकाको स्वास्थ्य बिमा गरिएको हो ।

नगरपालिकाको प्रेम ज्योति प्राथमिक विद्यालयमा अध्यनरत्त सम्पूर्ण विद्यार्थीको वडा कार्यालयको पहलमा स्वास्थ्य बिमा गरिएको हो । आई एम इ जेनरल इन्सोरेन्ससँगको समन्वयमा विद्यालयमा अध्यनरत १ सय २६ जना विद्यार्थीको पहिलो पटक एकैसाथ स्वास्थ्य बिमा गरिएको वडाध्यक्ष उज्वल कार्कीले जानकारी दिए ।

विद्यालयमा अध्यन गर्ने अधिकांश बालबालिकाका अभिभावक ज्याला मजदुरी गरेर गुजारा टार्ने निम्न वर्गीय परिवारका भएकाले वडा कार्यालयबाट लक्षित वर्गका लागि विनियोजित १ लाख रुपैयाँको बजेटबाट विद्यालय आफैंले अभिभावकत्व ग्रहण गर्ने गरी स्वास्थ्य बिमा गरिएको वडाध्यक्ष कार्कीले बताए ।

‘वडा भित्रका विद्यार्थीको स्वास्थ्यमा बर्सेनि अभिभावकले लाखौं रुपैयाँ खर्च गरिरहेका छन्, निम्न आयश्रोत भएकाले स्वास्थ्यमै बढी रकम खर्च भएपछि विद्यार्थी पनि विद्यालय नियमित आउन सकेका थिएनन्, कतिपयले पढाइनै छाड्नु पर्ने अवस्था आएको थियो,’ उनले भने, ‘स्वास्थ्य बिमा भएपछि अभिभावकको पनि लाखौ रुपैयाँ जोगिने र विद्यार्थी पनि नियमित हुने उद्देश्यका साथ विद्यालयमा स्वास्थ्य बिमा सुरु गरेका छौं ।’

स्वास्थ्यमा लाखौं खर्च जोगाउन वडाबासीलाई विमा गराउनु पर्छ भन्ने सन्देष दिनका लागि पनि बालबालिकाको स्वास्थ्य बिमा सुरु गरिएको वडाध्यक्ष कार्कीको भनाई छ । अघिल्लो वर्षको बिमाको प्रिमियम तिर्न सजिलो होस् भन्ने उद्देश्यका साथ खुत्रुके बचत योजना पनि विद्यालयले सुरु गरेको छ ।

विद्यालयले प्रत्येक विद्यार्थीलाई खुत्रुके दिएर रकम सानो सानो रकम जम्मा गर्न भनेको छ । नगरभित्रका ४८ सामुदायिक विद्यालय मध्ये पहिलो पटक शुक्रबार प्रेम ज्योती प्राथमिक विद्यालयमा विद्यार्थी स्वास्थ्य विमा उदघाटन गर्दै नगर प्रमुख मान बहादुर खडाले विमा कार्यक्रम क्रमैसँग नगर भित्रका सबै विद्यालयमा लागु गरिने बताए । बिमा कार्यक्रमलाई नियमित र प्रभावकारी बनाउन केही रकम अभिभावकबाट समेत लिने ब्यवस्था गरेर भएपनि कार्यक्रम लागु गरिने नगर प्रमुख खड्काले बताए ।

नौ सय ७१ रुपैयाँ प्रत्येक वर्ष प्रिमियम तिर्ने गरि विद्यालयमा अध्यनरत्त १ सय २६ विद्यार्थीको विमा गरिएको हो । विमित विद्यार्थीको दुर्घटनामा परी मृत्यु भएमा १ लाख रुपैयाँ बिमा कम्पनिले तिर्नेछ । यस्तै दुर्घटनामा परि पुर्णरुपमा अशक्त भएमा ३ लाख रुपैयाँ र आसिंक रूपमा अशक्त भए एक लाख रुपैयाँ बिमा कम्पनीले बेहोर्ने छ ।

बिमित विद्यार्थी दुर्घटनामा परी घाइते भएमा २५ हजार सम्मको औषधी उपचार सेवा तथा विद्यार्थी बिरामी भएर अस्पताल भर्ना भए ५० हजार सम्मको औषधि उपचार सुविधा पाउने छन् । विद्यार्थीको अभिभावकको दुर्घटनामा परी मृत्यु भएमा बिमा अवधिभर ५ लाख रुपैयाँ र घाइते भएर पूर्णरूपमा अशक्त भएमा ५ लाख र आसिंक अशक्त भए २ लाख ५० हजार रुपैयाँ बिमालेतिर्ने कम्पनीले जनाएको छ ।

प्रकाशित : असार २, २०७६ १०:४४
पूरा पढ्नुहोस्
प्रतिक्रिया
पठाउनुहोस्