नगरपालिकामा ताला, मेयरको वैकल्पिक कार्यालय

कान्तिपुर संवाददाता

सर्लाही — दक्षिणी क्षेत्रमा पर्ने बलरा नगरपालिकामा जनप्रतिनिधिबीचको विवाद बढिरहेको छ । उपमेयर, वडाध्यक्षसहित नगरका बोर्ड सदस्यले नगरपालिका प्रमुखले मनोमानी तरिकाले चलाएको भन्दै ताला लगाएपछि प्रमुख अभयकुमार सिंहले आफ्नै गाउँमा वैकल्पिक कार्यालय सुरु गरेका छन् । 

नगर प्रमुख सिंहले कार्यालयमा लगाइएको ताला खुलाउनुको साटो वैकल्पिक कार्यालयको स्थापना गरेपछि विवाद झन् चर्केको छ । नगर प्रमुख सिंहले आइतबार दिउँसो एक कार्यक्रमको आयोजना गरी वैकल्पिक कार्यालय खोलेका हुन् । वैकल्पिक कार्यालयको उद्घाटन समन्वय समितिका सभापति मैथुर चौधरीले गरेका थिए । समन्वय समितिले स्थानीय तहमा बढेको विवादलाई सुल्झाउन समन्वयकारी भूमिका निभाउनुपर्नेमा वैकल्पिक कार्यालयको उद्घाटन गरिएको हो ।

तालाबन्दीपछि नगरपालिकाको अवरुद्ध सेवालाई निरन्तरता दिने भन्दै नगर प्रमुख सिंहले बलरा नगरपालिका–१, हथियौलमा वैकल्पिक कार्यालय खोलेको बताए । मेयर सिंहले मनोमानी ढंगले नगरपालिका चलाएको भन्दै नगरकी उपमेयर रामसखी देवीसहित ८ वडाध्यक्षहरूले असार ४ गते नगरपालिका कार्यालयमा तालाबन्दी गरेका थिए ।

आर्थिक वर्षको अन्त्यमा नगरपालिकामा तालाबन्दी भएपछि आगामी आर्थिक वर्षका लागि योजना छनोट तथा चालु आर्थिक वर्षमा पूरा गर्नुपर्ने योजनाको भुक्तानी र नयाँ योजनाको सम्झौता गर्न समस्या हुने भएपछि वैकल्पिक कार्यालय स्थापना गर्नुपरेको नगर प्रमुख सिंहको भनाइ छ । ‘आर्थिक वर्षको अन्त्य आइसक्यो, यहीबेला उहाँहरूले तालाबन्दी गर्नुभएको छ, जसले आगामी आर्थिक वर्षको योजना छनोट र यस वर्षको भुक्तानीलगायतको काम गर्न कठिन भयो,’ मेयर सिंहले भने, ‘बेलैमा काम सक्नुपर्ने भएकाले वैकल्पिक कार्यालय मात्र खोलेका छौं ।’

सिंहको कार्यशैलीविरुद्ध केही समय अघिमात्रै उपमेयर र वडाध्यक्षहरूले झन्डै तीन महिना नगरपालिकामा तालाबन्दी गरेका थिए । सो समयमा मेयर सिंहले कार्यालय खुलाउनका लागि आफै धर्नामा बसेका थिए । यस पटकको तालाबन्दीमा भने उनले वैकल्पिक कार्यालय खोलेका हुन् ।

मेयर सिंहले वैकल्पिक कार्यालय खोलेपछि उपमेयर रामसखीसहित वडाध्यक्षहरूले मेयरको एकलौटीको पराकाष्ठा नाघेको प्रतिक्रिया दिएका छन् । ‘यो उनको एकलौटी नगर चलाउने योजना हो,’ बलरा नगरपालिका–५ का वडाध्यक्ष मनोज मोहनकुमार सिंहले भने, ‘नगरमा भइरहेको विवाद मेयरले मिलाउनुको साटो झन् चर्काउन खोजेका छन् ।’ उनीहरूले विगतमा भएको सहमति पनि पालना नभएको गुनासो गरे ।

बलरा नगरपालिकामा पुनः तालाबन्दी भएपछि नगरवासी भने निराश छन् । नजिकको स्थानीय तहमा धमाधम विकास भइरहँदा आफूहरूको नगरमा भने मेयर, उपमेयर र वडाध्यक्ष आन्तरिक कलहमा रुमल्लिँदा नगरवासी चिन्तित बनेका हुन् । ‘जनप्रतिनिधिको आन्तरिक कलहका कारण हाम्रो नगर विकास निर्माणमा पछि परेको छ, यो आर्थिक वर्षमा मात्र दुई पटक तालाबन्दी भइसक्यो,’ स्थानीय अनिलकुमार सिंहले भने, ‘हाम्रा जनप्रतिनिधिमा नेतृत्व गर्ने क्षमताको कमी महसुस भएको छ ।’

प्रकाशित : असार ११, २०७६ ०९:५८
प्रतिक्रिया
पठाउनुहोस्

घाइतेको उपचारमा प्रदेश सरकारको सहयोग

कान्तिपुर संवाददाता

पर्सा — मधेस आन्दोलनका घाइते वीरगन्ज– २८ बगहीका ३३ वर्षीय मुन्सी राउतको थप उपचारका लागि प्रदेश–२ सरकारले ५० हजार रुपैया सहयोग गरेको छ । जिल्ला समन्वय समितिको कार्यालयमा मंगलबार सहयोग रकमको चेक राउतकी पत्नी शान्ति देवीलाई हस्तान्तरण गरियो । 

प्रदेशसभा सदस्यद्वय प्रल्हाद गिरी, जन्नत अन्सारी, जिसस पर्साका सभापति नेकमहम्मद अन्सारीले संयुक्त रूपमा चेक हस्तान्तरण गरेका थिए । मुख्यमन्त्रीका स्वकीय सचिव दीपक यादव, समाजवादी पार्टी नेपालका नेता रामनरेश यादव, सुन्दर कुर्मी, सामाजिक अभियन्ता प्रकाश थारुसमेतको सहभागिता थियो । शान्तिले सहयोगबाट राजधानीको ट्रमा सेन्टरमा उपचारार्थ पतिको उपचारमा ठूलो मद्दत मिल्ने बताइन् । बिहीबार राउतलाई थप उपचारका लागि वीरगन्जबाट राजधानी लगिएको हो ।

मुख्यमन्त्रीका स्वकीय सचिव यादवले राउतलाई थप उपचारका लागि आर्थिक सहयोग गर्ने निर्णय प्रदेश सरकारको मन्त्रिपरिषदको बैठकले गरेको र त्यसै अनुसार रकम परिवारलाई उपलब्ध गराइएको बताए । सोमबार राजधानीको ट्रमा सेन्टरमा पुगेर मुख्यमन्त्री लालबाबु राउतले स्वास्थ्य अवस्थाबारे जानकारी लिएको उनले बताए ।

शान्तिले हाल राउतको स्वास्थ्य सुधारोन्मुख रहे पनि घाउ भने अझै निको भइनसकेको बताइन् । मलद्वार नजिक पुठ्ठामा भएको घाउ बल्झिएर सिकिस्त भएपछि राउतलाई उपचारार्थ जेठ २६ मा वीरगन्जको एड्भान्स अस्पतालमा भर्ना गरिएको थियो । त्यहाँबाट जेठ २८ मा थप उपचारका लागि नारायणी अस्पतालमा भर्ना गरिएको थियो । अस्पतालमा लामो समय भर्ना गरी उपचार गर्दा पनि घाउ निको नभएपछि उनलाई राजधानीको ट्रमा सेन्टरमा उपचारार्थ पठाइएको हो ।

२०७२ असोज ३ मा मुलुकले पहिलो गणतान्त्रिक संविधान पाएको ऐतिहासिक दिनमै राउतलाई वीरगन्जमा गोली लागेको थियो । त्यस दिन तत्कालिन मधेसी मोर्चाको आह्वानमा संविधानको विरोध गर्दै मधेस आन्दोलनमा उनी होमिएका थिए । वीरगन्जको गीता मन्दिर रोडमा प्रहरीले चलाएको गोली उनको मेरुदण्डमा लागेको थियो ।

राजधानीमा सुरुमा वीर अनि जनगालको अर्थोपेडिक अस्पताल र त्यसपछि सुष्मा कोइराला मेमोरियल अस्पतालमा गरी त्यहा उनको ६ महिना उपचार भएको थियो । मधेसी मोर्चाले उनको उपचारमा करीब १ लाख ५० हजार रुपैयाँ मात्रै खर्च गर्‍यो । उनी हाल आधा शरिर नचल्ने स्पाइनल कर्ड इन्जुरीको पीडा भोगेर बाँचिरहेका छन् । उनको कम्मरमुनिको भाग चल्दैन । दिसापिसाब चुहिएको भेउ पाउँदैनन् । हात चल्छ तर खुट्टा चल्दैन ।

प्रकाशित : असार ११, २०७६ ०९:५८
पूरा पढ्नुहोस्
प्रतिक्रिया
पठाउनुहोस्