ऋणीले धनीको जग्गा बेचेपछि...

अवधेशकुमार झा

राजविराज — जग्गा दृष्टिबन्धक राखी ऋण लिनेले नै धोखा दिएर धनीकै जग्गा आफ्नो नाममा राजिनामा पास गराउन खोजेपछि प्रहरीले एकजनालाई नियन्त्रणमा लिएको छ ।

सप्तरी जिल्लाको सुरुङगा नगरपालिका २ भेडियाकी अगहनीदेवी कोइरीको नाममा रहेको १६ कठा ८ धुर जग्गा धोखा दिएर अर्काको नाममा पास गराउन खोजेको आरोपमा स्थानीय लक्ष्मण साहलाई नियन्त्रणमा लिइएको हो ।

वैदेशिक रोजगारीमा रहेका छोराले पठाएको रकम ब्याजमा स्थानीय गेनालाल चौधरीलाई दिने क्रममा अगहनियादेवी कोइरी छिमेकी लक्ष्मणसँगै मालपोत कार्यालय सप्तरी पुगेकी थिइन् । उनले गेनालाललाई १ लाख रुपैयाँ ऋण दिनुपूर्व उनको नाममा रहेको जग्गा दृष्टिबन्धक गरी आफ्नो नाममा गर्नका लागि मालपोत पुगेकी उनलाई लक्ष्मणले धोखामा पारेको अगहनीकी बुहारी शिवदेवी महतोले बताइन् ।

‘मेरी सासुको नाममा दृष्टिबन्धक भई जग्गा आउनुपर्नेमा उल्टै मेरी सासुको नाममा रहेको १६ कठा ८ धुरा जग्गा लक्ष्मण साह सहितकाले सत्यनारायण चौधरीको नाममा राजिनामा पास गराइदिए,’ बुहारी शिवदेवीले भनिन्, ‘सासुआमालाई धोखा दिएर उनीहरूले किर्ते काम गर्न खोजेका थिए ।’

दुईदिन अघि मालपोतबाट घर गएकी अगहनीदेवीलाई स्थानीय मानिसले जग्गा कति रुपैयाँमा बेचेको भन्दै प्रश्न गर्न थालेपछि मंगलबार उनी फेरि मालपोत कार्यालय सप्तरी आएकी थिइन् । मालपोत पुगेपछि आफ्नो जग्गा अरूको नाममा पास भएको राजिनामा देखेपछि मात्र उनी र उनको परिवार ठगिएको थाहा पाएका थिए ।

आफ्नो जग्गा धोखा दिएर अरूको नाममा पास भएको थाहा पाएपछि अगहनी र उनका परिवारसहित स्थानीय वासिन्दाले लक्ष्मणलाई पक्राउ गरी प्रहरीको जिम्मा लगाएका थिए । जिल्ला प्रहरी कार्यालय सप्तरीका प्रवक्ता प्रहरी नायव उपरीक्षक भावेश रिमालले जग्गा सम्बन्धी विषयमा छानबिनका लागि लक्ष्मण साहलाई नियन्त्रणमा लिइएको र थप अनुसन्धानपछि मात्र सबै कुरा बताउन सकिने बताए ।

जिल्ला मालपोत कार्यालय सप्तरीका प्रमुख भिष्म भट्टराईले जग्गा राजिनामा पास भई अर्काको नाममा जानु अघि नै कुरा बाहिर आएकाले मालपोत कार्यालयका कर्मचारीको संलग्नता नरहेको दाबी गरे । ‘सही छाप सबै बाहिरबाटै गरेर ल्याएको हुन्छ, पास हुने बेलामा बिक्री गर्नेलाई कर्माचारीले रकम पाए नपाएको सोध्ने गरिन्छ,’ प्रमुख भट्टराईले भने, ‘पास हुने स्थानभन्दा पहिला नै अगहनीदेवी ठगिएको भन्दै आएपछि उक्त जग्गाको प्रक्रिया त्यही रोकियो ।’

प्रकाशित : असार १२, २०७६ १०:१९
ADVERTISEMENT
प्रतिक्रिया
पठाउनुहोस्

गर्मीले विद्यार्थी बेहोस

मध्य मधेसमा तापक्रम दैनिक रूपमा बढदै गएपछि विद्यार्थी बेहोस हुने, टाउको दुख्ने, तनावमा पर्ने जस्ता लक्षण देखिन थालेका छन्
अवधेशकुमार झा

राजविराज — विद्यालयमा छुटी हुने बेलामा गर्मीका कारण सोमबार राजविराजस्थित दुर्गा सेकेन्ड्री स्कुलका एक विद्यार्थी बेहोस भए । विद्यालय प्रशासनले तत्कालै उनलाई कक्षाबाट बाहिर ल्याई प्रारम्भिक उपचार गरे । केही बेरपछि उनी होसमा आए । दुर्गा स्कुलमा सोमबार भएको यो घटना पछिल्लो समय सप्तरीका धेरै विद्यालयका विद्यार्थीमा देखिन थालेको छ । 

तापक्रम दैनिक रूपमा बढदै गएपछि विद्यार्थी बेहोस हुने, टाउको दुख्ने, तनावमा पर्ने जस्ता लक्षण देखिन थालेका छन् । जिल्लाका धेरै विद्यालयमा टिनको छानो भएको घर तथा बिनापंखामा विद्यार्थी अध्ययन गर्नुपर्दा समस्या झनै थपिएको छ ।

गर्मी बढदै जाँदा केही स्थानीय तहले टिफिनसम्म मात्र पढाइ गर्ने गरिए पनि अझै पनि जिल्लाका सबै विद्यालयमा अत्यधिक गर्मीबीच अध्ययन अध्यापन भइरहेको छ । ‘अहिले गर्मी खपिनसक्नुभएको छ,’ राजविराजका अभिभावक कन्हैया मिश्राले भने, ‘यो मौसम विद्यार्थीका लागि पढ्ने खालको होइन, विद्यार्थी तनावमा गएर पढ्न सक्दैनन् ।’

विद्यालय सञ्चालन गर्नु बाध्यता भएको दुर्गा सेकेन्ड्रीका प्रिन्सिपल चन्द्रशेखर देवले बताए । ‘हाम्रोमा त टिनको छानो भएको कक्षाकोठा छैन,’ उनले भने, ‘सबै कक्षामा पंखासमेत छ जसका कारण केही हदसम्म विद्यार्थी जोगिएका छन् ।’ उनले असार १२ देखि परीक्षा लिएर मात्र बिदा दिन सकिने बाध्यता रहेको सुनाए ।

तिलाठी कोइलाडी गाउँपालिकाका अध्यक्ष सतिशकुमार सिंहले गर्मी अत्यधिक बढदै गएपछि आफ्नो गाउँपालिका क्षेत्रभित्रका सबै विद्यालयमा टिफिनसम्म मात्र अध्यापन गराउन निर्देशन दिइएको बताए । ‘पूरा समय बढाउन सक्ने खालको मौसम छैन,’ अध्यक्ष सिंहले भने, ‘मौसम यसैगरी प्रतिकूल भइरहे विद्यालय बिदा नै गर्नुपर्ने स्थिति छ ।’

पछिल्लो केही दिनदेखि गर्मी अत्यधिक रूपमा बढेपछि आइतबार र सोमबार भने ३९ डिग्रीमा तापक्रम पुगेको छ । राजविराज नगरपालिकाका मेयर शम्भुप्रसाद यादवले पनि प्रतिकूल मौसमका कारण विद्यार्थीलाई अध्ययन गर्न सक्ने अवस्था नरहेको स्विकारे । उनले गर्मी अत्यधिक बढेकाले सरोकारवालासित छलफल गरी विद्यालयमा बिदा दिने तयारी गरिएको बताए ।

लामो समयदेखि पर्याप्त वर्षा नहुँदा भूमिगत जलको स्तर निक्कै तल गएका कारण खानेपानीका ट्युबवेलमा पानी आउनेक्रम समेत कम भएको छ । ग्रामीण क्षेत्रमा रहेका पोखरी सुक्न थालेका छन् । धेरै स्थानमा ट्युबवेलमा पानी आउने छोडेको खानेपानी तथा सरसफाइ डिभिजन कार्यालय राजविराजका इन्जिनियर शैलेन्द्रकुमार झाले बताए । प्रमुख जिल्ला अधिकारी सुरेन्द्र पौडेलले गर्मीका कारण जिल्लाको जनजीवनमा प्रभाव परेको बताए ।

बिहान हुनेबित्तिकै चर्को घामसँगै तापक्रम अत्यधिक बढ्ने गरेको छ । सप्तरीसँगै प्रदेश २ का अन्य जिल्लामा पनि अत्यधिक गर्मीले असहज स्थिति उत्पन्न भएको हो । झाका अनुसार जिल्लाको उत्तरी र पश्चिमी क्षेत्रमा भूमिगत जलको स्तर निक्कै तल गएका कारण ट्युबवेलमा पानी आउन छोडेको हो । ‘रूपनगर र धर्मपुरलगायत उतरपूर्वी क्षेत्र तथा पातोलगायतका पश्चिमी क्षेत्रमा भूमिगत जलको स्तर निक्कै तल गएको छ,’ इन्जिनियर झाले भने, ‘ती क्षेत्रका धेरै ट्युबवेलमा पानी आउन छोडेको छ ।’

गर्मीका कारण अस्पतालमा बिरामीको चाप थेगिनसक्नुभएको छ । गजेन्द्रनारायण सिंह अस्पताल राजविराजका मेडिकल सुपरिटेन्डेन्ट डा. चुमनलाल दासमा अनुसार अत्यधिक गर्मीसँगै अस्पतालमा बिरामीको चाप अत्यधिक बढेको छ । अहिले ओपीडीमा दैनिक रूपमा डेढ सयदेखि दुई सयसम्म बिरामी आउने गरेको डा दासले जानकारी दिए । अहिले आउने बिरामीमा ज्वरोका बिरामी अत्यधिक रहेको उनले बताए । ‘महामारीकै रूपमा कुनै रोगका बिरामी आएका छैनन्,’ डा. दासले भने, ‘तर केही दिनअघिको तुलनामा अहिले गर्मी बढेसँगै बिरामीको चाप भने ह्वातै बढेको छ ।

उनका अनुसार गर्मी अत्यधिक बढदा खानपानमा सचेतना नहुँदा बिरामी भई अस्पताल पुग्नेको संख्या बढदै गएको हो । अस्पतालमा बालबालिका अत्यधिक आउने गरेको उनले सुनाए ।

दिउँसो तातो हावा, चर्को घाम र गर्मीका कारण बजार क्षेत्रमा सर्वसाधारणको चहलपहल कम देखिन्छ भने सरकारी कार्यालयमा पनि सेवाग्राहीको उपस्थिति पातलिने क्रममा छ । गर्मीकै कारण राजविराजलगायतका पूर्वका बजारमा दिउँसोका बेला सर्वसाधारणको चहलपहल कम हुने गरेको छ ।

खासगरी मजदुरी गर्ने, रिक्सा र ठेला चलाएर गुजारा गर्नेहरू गर्मीको मारमा परेका छन् । गर्मी बढदै गएपछि बजार क्षेत्रमा अहिले चिसो पेय पदार्थ, कागतीको रस, उखुको रसको बिक्री पनि हवात्तै बढेको छ । बजारमा अहिले फ्रिज, कुलर र पंखाको बिक्री अत्यधिक छ । ती विद्युतीय सामग्रीको अत्यधिक प्रयोगका कारण सर्वसाधारणको खर्चलाई समेत बढाएको छ ।

प्रकाशित : असार ११, २०७६ ०९:५९
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT