नेकपा जिल्ला समिति चयनमा विवाद

भरत जर्घामगर

(सिरहा) — नेकपा प्रदेश २ कार्यालयले चयन गरेको जिल्ला सदस्यको नामावली सार्वजनिक भएसँगै सिरहामा विवाद चुलिएको छ । असन्तुष्टि जनाउँदै साविक माओवादी केन्द्र पक्षधर सिरहाका असन्तुष्ट केन्द्रीय सदस्य, प्रदेश सभा सदस्यले पत्रकार सम्मेलन गरी सच्याउन माग गरेका छन् ।  

उनीहरूले सिरहाको मिर्चैयामा मंगलबार पत्रकार सम्मेलन गरी प्रदेश नेतृत्वले पदीय शक्तिलाई दुरुपयोग गरी स्वेच्छाचारी ढंगले जनयुद्धकालीन कार्यकर्तालाई पाखा लगाई आफ्ना नातागोता, आसेपासे र पार्टीको आन्तरिक गतिविधिमा क्रियाशील नरहेकालाई जिल्ला कमिटि सदस्य चयन गरेको आरोप लगाए । उनीहरूले प्रदेश समितिले जबरजस्ती निर्णय कार्यान्वयन गर्न खोजे त्यसको प्रतिबाद र प्रतिरोध गर्न बाध्य हुने चेतावनी दिए ।

साविक माओवादी केन्द्र र एमालेबीच पार्टी एकीकरण भएपछि बनेको नेकपा प्रदेश २ कार्यालयले सिरहा जिल्ला समितिका लागि एमालेबाट ८२ र माओवादी केन्द्रबाट ८१ गरी १ सय ६३ जना सदस्यको नामावली गत असार ११ मा सार्वजनिक गरिएको थियो । जिल्ला पदाधिकारी एवं केन्द्रीय सदस्यको परामर्शका आधारमा असार ९ मा बसेको प्रदेश कार्यालयको बैठकले जिल्ला सदस्यको नामावली चयन गरेको उल्लेख छ । सार्वजनिक जिल्ला सदस्यको नामावलीप्रति असन्तुष्टि जनाउँदै केन्द्रीय सदस्य महेन्द्र पासवान, केन्द्रिय सदस्य एवं प्रदेशसभा सदस्य जगत प्रसाद यादव, पार्टीको प्रदेश समिति सदस्य फुलगेन नायक, मिरचैया नगरपालिकाका प्रमुख श्रवण यादवलगायत ५३ जनाद्वारा हस्ताक्षरित विज्ञप्ति मंगलबार जारी गरेका छन् । यसमा विगतमा भएका छलफलको निष्कर्ष, केन्द्रिय सदस्यको परामर्श, सहमति र सुझावलाई बेवास्ता गरी माओवादी केन्द्रबाट प्रतिनिधित्व गरिरहेका प्रदेश पदाधिकारीले सर्वसहमतिबाट टुंगो लागेका नामहरू अन्तिम क्षणमा हटाएर स्वेच्छाचारी ढंगले पदीय शक्तिलाई दुरुपयोग गरिएको उल्लेख छ ।

पत्रकार सम्मेलनमा नेकपा केन्द्रीय सदस्यद्वय महेन्द्र पासवान र प्रदेशसभा सदस्यसमेत रहेका जगतप्रसाद यादवले प्रदेश पदाधीकारीले पदीय दुरुपयोग गरी नातागोता र आसेपासेलाई सदस्य चयन गरेकाले यसबाट पार्टी क्रान्तिकारी बन्न नसक्ने, बरु विघटनतर्फ लैजान्छ भन्दै निर्णय अविलम्व सच्याएर सहमतिको आधारमा जिल्ला सदस्यको छनौट गर्न माग गरे । ‘हामीले पार्टीको विरुद्धमा पत्रकार सम्मेलन गरेका होइनौं,’ केन्द्रीय सदस्यद्वय पासवान र यादवले भने, ‘पदीय दुरुपयोग गलत ढंगले गरेकाले त्यसको विरोध गरेका हौं, जनयुद्ध लडेका साथीलाई पाखा लगाउने काम गरिएको छ ।’

नेकपा प्रदेश २ कार्यालयका सहइन्चार्ज विश्वनाथ साहले गत जेठ १८ मा बर्दिबासमा पार्टीको विस्तारित बैठकको निर्णय र सम्बन्धित जिल्ला पदाधिकारी एवं केन्द्रिय सदस्यको परामर्शका आधारमा जिल्ला सदस्य चयन गरिएको र जिल्ला समितिको सीमित संख्या तर नाम धेरैको आएको कारण केही नाम छुट्न गएको बताए । उनले जनयुद्धकालीन साथीलाई पाखा लगाउने काम नभएको र नातागोता, आसेपासे राखेको आरोप पूर्वाग्राही, गलत, काल्पनिक भएको दाबी गरे ।

प्रकाशित : असार १८, २०७६ १०:१४
प्रतिक्रिया
पठाउनुहोस्

जिउँदोका हातमा मृत्यु प्रमाणपत्र

सानीआमा र आफ्नो नाममा मावली हजुरबुवाले दर्ता गरिदिएको जग्गा नक्कली मृत्यु दर्ता गरी नामसारी
भरत जर्घामगर

सिरहा — औरही गाउँपालिका ४ की ७१ वर्षीया जन्तीवति यादव जीवित छिन् । उनको हातमा मृत्यु भएको प्रमाण पत्र परेपछि भने झस्किइन् । अयोध्यानगर गाविस ९ बाट ०६० मंसिर १६ गते जारी प्रमाणमा ०४८ जेठ १४ मा उनको मृत्यु भएको उल्लेख छ । ०६२ चैत १४ मा प्रतिलिपि लिएको फोटोकपी उनको हात पारेको हो ।

‘म जीवितै छु, मरेको भन्ने प्रमाण देख्दा छक्क परें,’ उनले भनिन्, ‘छोरा अरुणले ल्याएर देखाए ।’ तर, मृत्यु दर्ता प्रमाण पत्रमा बुवा र पतिको नाम फरक छ । बुवा शिवधारी र पतिको नाममा बुद्धि यादव उल्लेख छ । जन्तीवतिको नागरिकतामा बुवा सुवध यादव र पति ठकाई यादव उल्लेख छ ।

जन्तीवतिका अनुसार साविक अयोध्यानगर गाविस ९ हाल धनगढीमाई नगरपालिका ८ मा बुवा सुवध यादवको ७ कठा १५ धुर जग्गा थियो । बुवाको घर दहिपौडी ७ (हाल सुखिपुर नगरपालिका) मा थियो ।

उनका अनुसार बुवा सुवधका दुई सन्तान दिदी पारोदेवी र म जन्तीवति मात्र थियौं । दिदी पारोदेवीको विवाह अयोध्यानगरमा बुद्धि यादवसँग भयो । ‘दिदी पारोको रामवली, मोतीराम र सुरज तीन भाइ छोरा छन्,’ आफ्नो नागरिकता प्रमाण पत्र देखाउँदै जन्तीवतिले भनिन्, ‘मेरो इटाटार ८ का ठकाईसँग विवाह भयो, मेरो छोरा अरुण मात्र हो ।’

उनका अनुसार पछि दिदीको मृत्यु भयो । दिदीको मृत्युपछि बुवा सुवध यादवले अयोध्यानगरको ७ कठा १५ धुर जग्गा दिदीको छोरा रामवली र जन्तीवति मेरो संयुक्त नाममा नामसारी गरिदिएको जन्तीवतिको दाबी छ । मृत्यु दर्ता प्रमाण पत्रदेखेपछि त्यही जग्गा हडप्न दिदीको छोराहरूले यसो गरेको होलान् भन्ने उनले चाल पाइन ।

‘अयोध्यानगर ९ (क) कित्ता नं. १७३ को ७ कठा १५ धुर जग्गा २०६० फागुन ११ मा मिसिल नम्बर ३१०/०६०–०६१ को नामसारी निर्णयअनुसार रामवलि, मोतिराम र सुरजको संयुक्त नाममा नामसारी भएको रेकर्ड भेटियो,’ जन्तीवतिका छोरा अरुणले भने, ‘जन्तीवतिको मृत्यु दर्ताको आधारमा जमिन नामसारी भएको देखिएपछि मृत्यु दर्ता प्रमाण पत्र बदरका लागि जिल्ला प्रशासन कार्यालयमा निवेदन दियौं ।’

तर, प्रशासन कार्यालयमा निवेदन दिए पनि कुनै सुनुवाई नभएको उनले सुनाए । उता, जग्गा नामसारी गरेकामध्ये सुरज यादवले आफ्नो आमाको नाममा भएको जग्गा छोराहरूको नाममा नामसारी गरेको बताए । आफूहरूले कसैको पनि नक्कली मृत्यु दर्ता नबनाएको दाबी गर्दै आमाको नामबाट जग्गा छोराहरूको नाममा नामसारी गर्न नपाइने नियम नभएको बताए ।

उनले आमा जन्तीवतिको नाममा भएको जग्गा आफूहरूले नामसारी गरेको र जग्गामा कसैले दाबी गर्दैमा नहुने र त्यसका लागि प्रमाण लिएर आउन भने । ‘कसैले भन्दैमा, दाबी गर्दैमा अरूको जग्गा मेरो हो भनेर हुँदैन,’ उनले टेलिफोन सम्पर्कमा भने, ‘त्यसका लागि प्रमाण लिएर आऊन् ।’

प्रकाशित : असार १७, २०७६ ०९:१२
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT