अस्पताल तोडफोडपछि बन्द

कान्तिपुर संवाददाता

सर्लाही — सर्पले डसेर उपचारका लागि अस्पताल भर्ना भएकी एक बालिकाको मृत्यु भएपछि मृतकका आफन्तले सर्लाहीको नवलपुरस्थित सर्पदंश उपचार केन्द्रमा सोमबार राति तोडफोड गरेका छन् । तोडफोडपछि केन्द्रको सेवा ठप्प छ । 

हरिवन नगरपालिका–९ का पुष्कर बुढाथोकीकी अढाई वर्षीया छोरी सम्पदालाई सर्पले डसेपछि अस्पताल भर्ना गरिएको थियो । अस्पताल भर्ना भएर उपचार सुरु भएको केही घण्टापछि सम्पदाको मुत्यु भएपछि आक्रोशित आफन्तले अस्पताल तोडफोडमा उत्रेका थिए । तोडफोडबाट अस्पतालको आईसीयू, भेन्टिलेटरलगायतका उपकरणसहित झ्याल र ढोकामा समेत क्षति पुगेको छ ।
अस्पतालमा कार्यरत चिकित्सकले सुरक्षाको प्रत्याभूति नभएसम्म काममा नफर्कने जनाएका छन् । चिकित्सकको लापरबाहीले बालिकाको मृत्यु भएको भन्दै मृतकका आफन्त तोडफोडमा लागेपछि अस्पताल परिसर तनावग्रस्त बनेको थियो । बालिकाका आफन्तलाई जनप्रतिनिधि र सुरक्षा अधिकारीले सम्झाइ बुझाइ गरेपछि मात्र मृतकको शव आफन्तले बुझेका थिए ।

उपचार केन्द्रका व्यवस्थापक बोधराज काफ्लेले बालिकाको उपचारमा कुनै किसिमको लापारबाही नभएको दाबी गरे । उनले बालिकालाई हरसम्भव प्रयास गर्दा पनि बचाउन नसकिएको जानकारी दिए । व्यवस्थापक काफ्लेले राति बालिकाको आफन्तबाट गरिएको तोडफोडबाट अधिकांश उपकरणमा क्षति पुगेको हुनाले तत्काल सेवा सुचारु गर्न सक्ने अवस्था नरहेको बताए । ‘बालिकालाई दुई ठाउँमा गोमन सर्पले टोकेको थियो, चिकित्सकलाई बालिकाको नसा पत्ता लगाउनै गार्‍हो पर्‍यो, जसका कारण बालिकाको ज्यान गयो,’ उनले भने ।

सर्पदंशका बिरामी बढिरहेका बेला उपचारकेन्द्र बन्द भएपछि उत्तरी क्षेत्रका नागरिक मारमा परेका छन् । सर्पको बिगबिगी हुने बेलामाउपचार केन्द्र बन्द भएपछि बिरामीलाई उपचार गराउन समस्या हुने स्थानीय सुदर्शन रिजालले बताए । ‘गर्मी बढेसँगै विषालु सर्पको बिगबिगीछ, नजिक उपचार केन्द्र हुँदा बिरामीलाई जोगाउन सजिलो थियो, सर्पदंशको मुख्य समयमा तोडफोड भएर उपचार केन्द्र बन्द भएपछि हामी मारमा परेका छौं ।’

नवलपुरबाहेकका जिल्लाको पश्चिम क्षेत्रमापर्ने बरहथवा प्राथमिक स्वस्थ्य केन्द्र रजिल्ला अस्पताल मलंगवामा सर्पदंशका बिरामीको उपचार हुँदै आएको छ । गर्मी बढेसँगैजिल्लामा सर्पको टोकाइबाट चार जनाको मृत्यु भइसकेको छ ।

प्रकाशित : असार २५, २०७६ १०:५९
प्रतिक्रिया
पठाउनुहोस्

तालिम खोज्दै न्यायिक समिति प्रमुख

कान्तिपुर संवाददाता

पर्सा — जिल्लाका न्यायिक समितिका प्रमुखले आफूलाई तालिमको खाँचो रहेको बताएका छन् । विगतमा न्यायिक क्षेत्रको कुनै अनुभव नरहेकोमा अचानक आइपरेको जिम्मेवारी सम्हाल्दा थुप्रै व्यावहारिक समस्या भोग्नुपरेको उनीहरू सुनाउँछन् । 

उषा चौधरी जिराभवानी गाउँपालिकाकी उपाध्यक्ष हुन् । उपाध्यक्षले न्यायिक समितिको प्रमुखको जिम्मेवारी सम्हाल्नुपर्ने भएकाले उनलाई न्यायीक ज्ञानको खाँचो परेको छ । चुनौतीलाई अवसरकै रूपमा स्विकारेकी उषालाई विगतमा न्यायिक क्षेत्रको कुनै अनुभव नहुँदाको पीडा छ । समितिमा पर्ने गरेको मुद्दाको छिनोफानो गरे पनि मुद्दा मामिलाको रेकर्ड राख्नेदेखि नयाँ ऐन कानुन निर्माण भएपछि त्यसमा गरिएका व्यवस्था, कानुनी प्रावधान तथा कानुनको व्याख्या आदि विषयबारे समस्या हुने गरेको उनको अनुभव छ । ‘यसो भन्दा हामी आफ्नो जिम्मेवारी वहन गर्न अक्षम छौं भन्न खोजेको होइन,’ उनले भनिन्, ‘तर नयाँ नयाँ नियम कानुन र तिनमा भएका प्रावधान बुझ्न तथा कानुनसम्बन्धी प्रशासनिक कार्यविधिबारे जानकारीका लागि हामीलाई समय समयमा तालिमको आवश्यकता टड्कारो रूपमा देखिएको छ ।’

समितिमा हालसम्म १ सय ३० मुद्दा दर्ता भएकामा ७० वटाको छिनोफानो गरिएको उनले बताइन् । २ वटा मुद्दा सिफारिस गरेर अदालत पठाइएको छ । फूलमती चौधरी सखुवाप्रसौनी गाउँपालिकाकी उपाध्यक्ष हुन् । न्यायिक समितिकी प्रमुख उनले पनि छिमेकी गाउँपालिकाकी उपप्रमुख उषा चौधरीजस्तै समस्या आफूले पनि अनुभव गरेको बताइन् । न्यायिक क्षेत्रका कतिपय विषयवस्तु हाम्रा लागि नौला छन्,’ उनले भनिन्, ‘त्यस कारण हामी समितिका पदाधिकारीलाई समय समयमा तालिमको आवश्यकता महसुस हुन्छ ।’

समितिमा हालसम्म २ सय मुद्दा परेकामा १ सय ५० को छिनोफानो भएको उनले बताइन् । समितिमा बढी लेनदेन, जग्गा किचलो, बस्तुभाउले बालीनाली खाएको, पति–पत्नीको सम्बन्धविच्छेद आदि मुद्दा पर्ने गरेको उनले बताइन् । दुवैले समितिलाइ जिल्ला अदालत वा उच्च अदालतका न्यायाधीशहरूबाट बेला बेलामा तालिम पाए सहज हुने बताएका छन् । समितिले स्थानीय सरकार सञ्चालन ऐन २०७४ को दफा ४७ को उपदफा १ र २ मा उल्लेख भएका मुद्दाको मात्र सुनुवाइ गर्दै छ । जसमा आलीधुर, बाँध–पैनी, कुलो वा पानीघाटको बाँडफाँड तथा उपयोगजस्ता विवादमा समितिले मेलमिलापको माध्यमबाट मात्र न्याय निरुपण गर्न सक्छ ।

प्रकाशित : असार २५, २०७६ १०:५७
पूरा पढ्नुहोस्
प्रतिक्रिया
पठाउनुहोस्