देउवा सिरहाका बाढी र डुबान पीडित क्षेत्रमा

भरत जर्घामगर

(सिरहा) — कांग्रेस सभापति एवं पूर्वप्रधानमन्त्री शेरबहादुर देउवाले सिरहाका बाढी र डुबान क्षेत्रको शुक्रबार अवलोकन गरेका छन् । पूर्वप्रधानमन्त्री देउवा, सिरहाका पार्टी सभापति रामचन्द्र यादव, सांसद चित्रलेखा यादवसहितको टोलीले जिल्लाको बन्दीपुर, कमलाको बाढीले बढी डुबान गरेको सिरहा नगरपालिका ६ स्थित बसबिट्टा, माडर र औरही गाउँपालिका २ तुल्सीपुर क्षेत्रको अवलोकन गरेको थियो ।

बसबिट्टास्थित बाँध भत्काएर कमला खोलाको बाढी पसेको स्थान र कमला खोलामैं पुगेर कमला नदीको उनले अवलोकन गरे । सिँचाइँका लागि कमला नदी नियन्त्रण योजना कार्यालय जनकपुरले निर्माण गरेको ३ वटा कल्भर्टमा ‘एन्टी लड सुलुस गेट’ अधुरै छोड्दा लगातारको वर्षाबाट कमला खोलाको बाढी गाउँमा पसेको थियो । लगातारको वर्षाबाट बाँध भत्काएर कमला खोलाको बाढी पसेपछि सिरहाको तटीय क्षेत्र सारस्वर, बसबिटा, मखनाहा, कठकोल्वा, गम्हरीया लगायत दर्जनौं गाउँ डुबानमा परेका थिए । बाढी र डुबानबाट सबैभन्दा बढी क्षति सिरहा नगरपालिकाका १२, ६, १७, ३, १३ वडा र कल्याणपुर नगरपालिकाको १२ वडा बढीपीडित छन् ।

जिल्ला प्रशासन कार्यालय सिरहाका अनुसार अविरल वर्षाका कारण सिरहामा ५ हजार २० घर पूर्णरुपमा क्षति पुगेको छ । त्यसैगरी ९ हजार ६२ घरमा आंशिक क्षति र २६ सय ३१ परिवार बाढी र डुबानबाट विस्थापित भएका छन् । बाढीमा सिरहामा ५ जनाको मृत्यु भएको थियो । सरकारका मन्त्रीहरु हेलिकप्टर चढेर आकाशबाटै अवलोकन गरेर फर्किएपछि गुनासो बढिरहेका बेला प्रदेश २ का बाढीपीडित जिल्लाका गाउँ गाउँमा पुगेका कांग्रेस सभापति देउवाले बाढीपीडित परिवारलाई यहाँका जनताका दुःख दर्द समेटेर संसद्‌मा सरकारसँग कडा माग राख्ने आश्वासन दिए ।

‘बाँध कटान र डुबानबाट धैरै नै क्षति, नोक्सान पुर्‍याएको छ’ अवलोकनका क्रममा पूर्वप्रधानमन्त्री देउवाले भने ‘यहाँका जनताका दुःख दर्द समेटेर घर नहुनेलाई घर, बास नहुनेलाई बासको व्यवस्थाका लागि सरकारसँग माग राख्छौं ।’

प्रदेश २ का दाजुभाइहरुले पनि यस्तो झरी पानी कहिल्यैं नदेखेको आफूलाई सुनाएको बताउँदै उनले सरकारका मन्त्रीहरुले भनेजस्तो यो मानव निर्मित गल्ती नभई बाढी पहिरो प्राकृतिक प्रकोप भएको बताए । ‘डुबान हुनुमा भारततर्फ ठाउँ ठाउँमा बाँध निर्माणले नोक्सान भएको सुनिन्छ’ पूर्वप्रधानमन्त्री देउवाले भने ‘बाँधका बारेमा भारतसँग कूटनीतिक वार्ता, सल्लाह गरेर अगाडि बढ्नुपर्छ ।’

प्रकाशित : श्रावण ३, २०७६ १९:१६
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

सिरहामा ६० प्रतिशत मुद्दा फर्छ्योट

भरत जर्घामगर

सिरहा — सिरहा जिल्ला अदालतले ०७५/७६ मा अदालतमा परेको मुद्दामध्ये ६० प्रतिशत मुद्दा फर्छ्योट गरेको छ । सिरहा जिल्ला अदालतद्वारा बुधबार आयोजित पत्रकार सम्मेलनमा जिल्ला न्यायाधीश सुदर्शनराज पाण्डेले मुद्दा फर्छ्यौटको सन्दर्भमा यो अहिलेसम्मकै बढी रहेको जानकारी दिए ।

उनका अनुसार उक्त आर्थिक वर्षमा अदालतमा दर्ता रहेको र अघिल्ला वर्षबाट मौज्दात रहेका गरी ५ हजार ५ सय ८८ मुद्दामध्ये ३ हजार ३ सय ८० मुद्दा फर्छ्यौट गरिएको हो । यो मुद्दा फर्छ्यौट दर ६० दशमलव ४८ प्रतिशत हो । अदालतमा बाँकी रहेका २ हजार २ सय ८ मुद्दा चालु वर्षमा फर्छ्यौट गर्न प्राथमिकतामा राखिएको छ ।

कैद सजायतर्फ ३ हजार ६ सय ९४ वर्ष ९ महिना १ दिनमध्ये ५ सय ७ वर्ष ११ महिना सात दिनको कैद फर्छ्यौट भई ३ हजार १ सय ८७ वर्ष ९ महिना २४ दिन बाँकी रहेको छ । नयाँ संहिताले लागू गरेको फैसला भएको ५० वर्षभन्दा माथिका १ हजार ३ सय २२ वर्ष ११ महिना ११ दिन कैद तथा १८ लाख ६६ हजार ६ सय २८ रुपैयाँ ३३ पैसाको लगत कट्टा गरिएको छ ।

यसैगरी जरिवानातर्फ १३ करोड ७३ लाख १ हजार ७ सय ७ मध्ये १ करोड ४० लाख ५ हजार ६ सय ५३ रुपैयाँमात्र असुल हुन सकेको पत्रकार सम्मेलनमा जानकारी दिइयो । जरिवानातर्फ १२ करोड ३२ लाख ९६ हजार ५४ रुपैयाँ फर्छ्यौट हुन बाँकी छ । न्यायाधीश पाण्डेले फर्छ्यौट गर्नुपर्ने ठूलो संख्याको कैद र जरिवाना कसुरदार फरार हुने र अदालतको फैसला नमान्ने प्रवृत्तिका कारण बढदै गएको बताए ।

‘फरारी कसुरदारलाई पक्रन हामीले नेपाल प्रहरीलाई खटाएका थियौं तर कसुरदारले प्रहरीलाई समेत टेर्न छोडेका छन्,’ उनले भने, ‘यस आर्थिक वर्षदेखि फरारीलाई पक्रन सशस्त्र प्रहरीलाई समेत परिचालन गर्ने तयारी भइरहेको छ ।’

सिरहामा न्यायिक क्षेत्रलाई सेवाग्राही मैत्री बनाउन न्यायाधीशहरूको अध्यक्षतामा विभिन्न समिति गठन गरिएको, हरेक महिना ‘मिट द जज’ कार्यक्रम सञ्चालन गरिएको, सदरमुकाम बाहिरका ग्रामीण भेगमा न्यायाधीश र सर्वसाधारणबीच न्यायिक गतिविधिको विकृतिबारे छलफल गर्न ‘न्यायमा बाहय पहुँच’ कार्यक्रम सञ्चालन गरिएको, स्थानीय तहमा रहेको न्यायिक समितिको निरीक्षण गरिएको र आवश्यकता अनुसार पटकपटक बार र बेञ्चबीच अन्तरक्रिया हुँदै आएको छ ।

प्रकाशित : श्रावण २, २०७६ ०९:५३
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT