राति सुत्दैन मोर बस्ती

कान्तिपुर संवाददाता

पर्सा — चिन्ता देवीलाई २ वर्षअघि भलुवाई खोलाको बाढीले गाउँलाई तहसनहस बनाएको सम्झना छँदैछ । मेघ गर्जिएपछि उनको बेचैनी बढ्छ । ०७४ भदौ २७ गते गाउँ पूर्वको भलुवाई खोला उर्लिएर आफूहरूको घरबार र बालीनाली सोत्तर बनाएको दृश्य उनी झल्झली सम्झन्छिन् । 

वर्षायाम लागेदेखि अर्की स्थानीय देव कुमारीलाई राति निन्द्रा लाग्दैन । घरमा परिवारका सदस्य सुते पनि उनी जाग्राम बस्छिन् । कतै भलुवाइको भेल फेरि उर्लिएर ताण्डव मच्चाउँछ कि भन्ने चिन्ता उनलाई छ ।

भलुवाइको भेल जुनसुकै बेला गाउँ पस्न सक्ने भएकाले घरमा सुतेका महिला तथा बालबालिकालाई गाउँका सबै घरका पुरुषहरू पालैपालो जाग्राम बस्छन् । देवकुमारी एकल महिला हुन् । छोरा रोजगारीका लागि नारायणघाट भएकाले बुहारी र नातिनातिको सुरक्षार्थ उनी रातभर जाग्राम बस्छिन् । ‘डर र चिन्ताले मलाई रातभरि निन्द्रा लाग्दैन,’ उनले भनिन्, ‘आफू निदाऔं भने बाढी आएर घरबार मात्र नभई बुहारी र नातिनातिना समेत बगाउला भन्ने चिन्ता छ ।’

मोरबासीलाई बाढीको मात्र नभई बाघको पनि त्रास उस्तै छ । २ महिना यता गाउँ छिर्न थालेका २ वटा बाघ कत्ति खेर कसको घर र खोरमा छिर्ने हो पत्तै हुँदैन । चन्द्रिका मुखिया, रोजा मुखिया र मन्चन मुखियाका बाख्रा बाघले एक सातायता खोरबाटै थुतेर लगिसकेको छ । बाघको डरले आफूहरू संसाँझै घर पस्ने गरेको देव कुमारी बताउँछिन् ।

दुई वर्षअघिको बाढी थिल्थिलो भएको पटेर्वासुगौली ४ का विपन्न गाउँबासीले साविक झै घर ठड्याउन सकेका छैनन् । छानाबाट तपतप चुहिने पानी छलेर महिला र बालबालिका सुत्ने गर्छन् ।

अन्जु पन्त फाउन्डेसनले गत वर्ष मोरमा एकीकृत बस्ती निर्माणको घोषणा गरिसकेको छ । शुक्रबार मोर टोल पुगेकी फाउन्डेसनकी अध्यक्ष गायिका पन्तले आफू बस्ती निर्माणका लागि विदेशमा क्रमशः कन्सर्ट गरेर अर्थ संकलन गरिरहेको बताइन् ।

प्रकाशित : श्रावण २८, २०७६ १०:३८
प्रतिक्रिया
पठाउनुहोस्
ADVERTISEMENT
ADVERTISEMENT

बल्झिँदै आपराधिक घटना

अवधेशकुमार झा

राजविराज — एक वृद्ध दम्पतीलाई हत्या गरी घरमै जलाएको ५ महिना बित्दा पनि प्रहरीले अभियुक्तको पहिचान गर्न सकेको छैन । जिल्ला प्रहरी कार्यालय, सिआईबी, प्रदेश प्रहरी कार्यालय, प्रदेश प्रहरीको ब्युरो कार्यालय लगायतका स्थानबाट छुटाछुटै अनुसन्धान टोली खटिए पनि सप्तरीको खडग नगरपालिका ५ का ७५ वर्षीय सबुरी साह र उनकी श्रीमती ६५ वर्षीय बेचनीदेवी साहको हत्यामा संलग्नको पहिचान अझै भएन ।

साह दम्पतीको गत फागुन १४ गते राति हत्या भएको थियो । घटनापछि प्रहरीले तालिम प्राप्त कुकुर, बीपी कोइराला स्वास्थ्य विज्ञान प्रतिष्ठानको फरेन्सिक टोली समेत बोलाएर छानबिन सुरु गरेको थियो । वृद्ध दम्पतीको हत्या गरिएको घरभित्र र बाहिर धेरै स्थानमा रगतका छिटाहरू देखिएकाले दम्पतीको धारिलो हतियार प्रहार गरी हत्या गरेर जलाइएको हुनसक्ने अनुमान गरिएको थियो ।

जिल्ला प्रहरी कार्यालय सप्तरीका डीएसपी भावेश रिमालले अझै सम्म पनि अनुसन्धान पुरा नभएको स्विकारे । ‘घटना कसरी वा के कारणले भएको हो ठयाक्कै भन्न सकिने अवस्था छैन,’ डिएसपी रिमालले भने, ‘अझै हामी अनुसन्धानमै छौं ।’ उता जेठको पहिलो हप्तादेखि अपहरणमा परेका राजविराज बोरियाका तुलसी दासको अझै पतो छैन । चिनेजानेका व्यक्तिले बोलाएर गएका उनी फर्किएर आएका छैनन् । बोलाउने व्यक्तिले नै अपहरण गरेको दासको परिवारको आरोप छ । तर, बोलाउने व्यक्ति समेत फेला नपरेको प्रहरीको भनाइ छ ।

साउनको दोस्रो साता डाकनेश्वरी नगरपालिका १ की कंचनकुमारी यादवको शव झुण्डिएको अवस्थामा फेला पर्‍यो । माइती पक्षले कर्तव्य गरी पति र सासू–ससुराले मारेको आरोप लगाइरहँदा प्रहरीले भने उनको हत्या वा आत्महत्या हो भन्ने ठम्याउन सकेको छैन । कंचनका पति अरबिन्दलाई प्रहरीले नियन्त्रणमा लिएर अनुसन्धान भइरहेको जनाएको छ । ‘पोष्टमार्टम रिर्पोट आइसकेको छैन, आएपछि थप कुरा खुल्छ,’ डिएसपी रिमालले बताए ।

साउन ५ गते नै अग्नीसाइर कृष्णासवरण गाउँपालिका ३ की रन्जु यादवको पनि शंकास्पद मृत्यु भयो । माइती पक्षले सासु ससुराले कर्तव्य गरी मारेको जाहेरीका आधारमा प्रहरीले ससुरा महेन्द्र यादव र सासु लीलादेवी यादवलाई पक्राउ गरी अनुसन्धान गरिरहेको छ ।

खरचुहियाका साह दम्पतीको हत्या, तुलसी दासको अपहरण तथा दुई महिलाको शंकास्पद मृत्यु सम्बन्धी घटना उदाहरण मात्र हुन् । जिल्लामा अपराधका अन्य कयौं घटना भएको लामो समय बितिसक्दा पनि प्रहरीले अझै पनि अनुसन्धान पूरा गरी कारण ठम्याउन सकेको छैन । अपराधका घटनाका विषयमा प्रहरी अनुसन्धान नजिक पुग्न नसक्दा एकातिर प्रहरीको अपराध अनुसन्धानमाथि नै प्रश्न चिह्न खडा भएको छ भने अर्को तर्फ समाजमा त्रासको स्थिति सृजना हुने गरेको छ ।

प्रकाशित : श्रावण २८, २०७६ १०:३४
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT