सौराहामा फुड फेस्टिभल

कान्तिपुर संवाददाता

भरतपुर — चितवनको पर्यटकीय नगरी सौराहाको सिसुवार मैदानमा भ्यालेनटाइन डे (प्रणय दिवस) को अवसर पारेर आइतबारबाट फुड फेस्टिभल (खाना महोत्सव) सुरु भएको छ ।

रेस्टुरेन्ट एन्ड बार एसोसिएसन नेपाल (रेवान) को आयोजनामा १२ औं सौराहा फुड फेस्टिभल सुरु भएको हो । फेस्टिभल फागुन ३ गतेसम्म चल्नेछ । विभिन्न समुदायले बनाएका खानाका परिकार फेस्टिभलको मुख्य आकर्षणका रूपमा रहेका छन् ।
रेवानका अध्यक्ष गोकर्ण गिरीका अनुसार ४८ वटा खानाका स्टल राखिएका छन् । फेस्टिभलमा सहभागी हुन आउने पाहुनाका लागि त्यस अवधिभर रेवानमा आबद्ध रेस्टुरेन्ट तथा होटलमा १५ प्रतिशत छुटको व्यवस्था गरिएको छ । ‘यो चितवनकै गौरवको फेस्टिभल हो,’ अध्यक्ष गिरीले भने, ‘यहाँ आउने आन्तरिक तथा बाह्य पर्यटकसमेत फेस्टिभलमा रमाउँछन्, यसलाई उत्सवकै रूपमा लिएका छौं ।’ फेस्टिभल सुरु हुनुअघि बिहान शोभायात्रा निकालिएको थियो । विभिन्न ८८ वटा महिला समूहले झाँकीसमेत प्रदर्शन गरेका थिए । चितवन घुम्न आएका विदेशी पर्यटकहरूको पनि फेस्टिभलमा बाक्लै उपस्थिति देखिन्थ्यो । उनीहरू कलश यात्रामा समेत सहभागी भएका थिए । फेस्टिभलको मुख्य उद्देश्य स्थानीय समुदायले तयार पारेको खानाहरूको प्रवद्र्धन गर्नुभएको गिरीले जनाए । फेस्टिभलमा प्रेमपत्र लेखन प्रतियोगिता पनि हुने जनाइएको छ ।
फेस्टिवलमा ५८ वटा स्टल राखिएका छन् । यसवर्ष हात्ती वनभोज कार्यक्रम थप गरिएको छ ।
पहिलो पटक हात्तीको वनभोज कार्यक्रम समावेश गरिएको सौराहा फुड फेस्टिभलका संयोजक कपिल रेग्मीले जानकारी दिए । यसअघि हात्ती महोत्सवमा आयोजना गरिँदै आएको वनभोज पहिलोपटक फेस्टिभलमा पनि राखिएको हो । वनभोजमा करिब ६० वटा हात्ती सहभागी हुनेछन् ।
हात्तीलाई उखु, फलफुल, सखर, धानलगायत मनपर्ने खाना राखेर सामुहिक रूपमा खुवाइनेछ ।
महोत्सवको टिकट बिक्रीबाट आएको आम्दानी केही प्रतिशत विभिन्न सामाजिक क्षेत्रमा खर्च गरिने भएको छ ।

प्रकाशित : माघ २९, २०७४ ११:१६
प्रतिक्रिया
पठाउनुहोस्

फरार अभियुक्त पक्राउ

कान्तिपुर संवाददाता

हेटौंडा — जिल्ला अदालत परिसरबाट एक साताअघि फरार लागूऔषध कारोबारीलाई प्रहरीले शनिबार पक्राउ गरेको छ । 

म्याद थप्न लैजाँदा फरार भएका सर्लाही हरिपुर्वा नगरपालिका–३ का १७ वर्षीय दीपेन्द्र साहलाई प्रहरीले मलंगवा नगरपालिका ३ बाट पक्राउ गरेको हो । उनलाई पसलमा सामान किनिरहेका बेला पक्राउ गरेको प्रहरीले जनाएको छ ।
मकवानपुर प्रहरीले साहलाई सर्लाही प्रहरीको समन्वयमा पक्राउ गर्न सफल भएको हो । साहलाई आइतबार हेटौंडा ल्याई कारबाहीका लागि आवश्यक कानुनी प्रक्रिया अगाडि बढाइसकिएको प्रहरी उपरीक्षक विकासराज खनालले बताए । गाँजासहित पक्राउ परेका साहलाई माघ २२ गते जिल्ला अदालतमा म्याद थप गरेर प्रहरीको गाडी राख्ने क्रममा उनी भागेका थिए । साह र सर्लाहीकै औरही गाउँपालिका ८ का १६ वर्षीय धर्मेन्द्र पासवान १५ केजी ४ सय ग्राम गाँजासहित माघ २१ गते हेटौंडाको रातोमाटेबाट पक्राउ परेका थिए ।
उनीहरू दुवैलाई हत्कडी लगाएर म्याद थप गर्न अदालतमा लगिएको थियो । म्याद थप गरेर गाडी राख्न लाग्दा हत्कडी फुत्काएर भागेका थिए । उनीहरूलाई म्याद थप गर्न लगेका ३ प्रहरी जवानलाई जिल्ला प्रहरी कार्यालय हेटौंडाले निलम्बनपछि हिरासतमा राखेकोछ । फरार अभियुक्त पक्राउ परेसँगै उनीहरूको निलम्बन फुकुवा हुनसक्ने एक प्रहरी अधिकृतले बताए ।

प्रकाशित : माघ २९, २०७४ ११:१६
पूरा पढ्नुहोस्
प्रतिक्रिया
पठाउनुहोस्