कार दुर्घटनामा एकको मृत्यु, तीन घाइते 

हरिहरसिंह राठौर

धादिङ — चितवनको इच्छाकामना गाउँपालिका–३ स्थित चुम्लिङटारमा सोमबार राति कार दुर्घटना हुदाँ एक जनाको मृत्यु भएको छ  । तीन जना घाइते छन् ।

इलाका प्रहरी कार्यालय मुग्लिनका अनुसार धादिङबाट पोखरा जाँदै गरेको बा १२ च ४६१५ नम्बरको कार पृथ्वी राजमार्गअन्तर्गत मुग्लिन–मलेखु खण्डको चुम्लिङटारस्थित सडक किनारामा राति ३ बजे दुर्घटनामा परेको थियो।

दुर्घटनामा कारमा सवार धादिङ थाँक्रेका २४ वर्षीय सरोज सुवेदीको मृत्यु भएको हो। गम्भीर घाइते भएका सुवेदीको भरतपुरमा उपचारका क्रममा मंगलबार बिहान मृत्यु भएको प्रहरीले जनाएको छ।

दुर्घटनामा कार चालक धादिङ जुंगेखोलाका २४ वर्षीय अनुप सिंह, बेनीघाटका २१ वर्षीय महेश श्रेष्ठ र धुनिबेँसीका २४ वर्षीय शरद रोक्का घाइते छन्। रोक्काको अवस्था गम्भीर रहेको प्रहरीले जनाएको छ। तीनै जनाको भरतपुरमा उपचार भइरहेको छ।

प्रकाशित : फाल्गुन २९, २०७४ १२:४७
प्रतिक्रिया
पठाउनुहोस्

राईप्रति हङकङबाट श्रद्धाञ्जली अर्पण

कान्तिपुर संवाददाता

हङकङ — मूर्धन्य साहित्यकार इन्द्रबहादुर राई (इबरा) प्रति हङकङका नेपाली साहित्यकर्मी तथा साहित्यप्रेमीहरुले श्रद्धाञ्जली अर्पण गरेका छन् । उक्त प्रयोजनका लागि विश्व नेपाली साहित्य महासंघ हङकङको आयोजनामा श्रद्धाञ्जली सभा सम्पन्न भयो ।

चुम्लुङ हिममा आयोजित कार्यक्रममा सहआयोजक नेपाली साहित्य प्रतिष्ठानका अध्यक्ष टंक सम्बाहाम्फेले स्वागत मन्तव्यको क्रममा स्व. राईको जीवनी संक्षिप्तमा राखेका थिए ।

उक्त समारोहमा सहआयोजक समीक्षक समाजका संयोजक हेम लावती, साब्लाबुङ प्रकाशनका अध्यक्ष राजकुमार राई, आदिवासी जनजाति साहित्यिक समूहका संयोजक भूपेन्द्र चेमजोङ, हिमालयन म्युजिक एकाडेमीका अध्यक्ष दिनेश सुब्बा, चित्रकार दीपेन्द्र राई र नीजि भ्रमणमा रहेका नेपालका साहित्यकर्मी लक्ष्मण सिटौलाले श्रद्धाञ्जली मन्तव्य व्यक्त गरेका थिए ।

वक्ताहरुले स्व. राईको निधनले नेपाली साहित्यलाई ठूलो क्षति पुगेको बताएका थिए । उनको नेतृत्वमा प्रतिपादित तेश्रो आयाम र लीला लेखनले नेपाली साहित्यलाई विश्व साहित्यको समकक्षमा पुर्‍याएको दावी बक्तहरुको थियो ।

प्रमुख अतिथि नेपाली भाषा तथा साहित्य परिषद्का अध्यक्ष किसन राईले इबराले शुरु गरेको साहित्यिक विचारलाई सहयोग पुग्ने गतिविधिले मात्र उनीप्रति साँचो अर्थमा श्रद्धाञ्जली व्यक्त हुने बताएका थिए ।
एक मिनेट मौन धारण, पुष्पागुच्छा अर्पणसहितको कार्यक्रमको अध्यक्षता महासंघका अध्यक्ष चन्द्र मादेन ‘आन्छन्’ले गरेका थिए । कार्यक्रम संचालक महासंघका सचिव बल्लभ रोक्का रहेका थिए ।

प्रकाशित : फाल्गुन २९, २०७४ १२:४७
पूरा पढ्नुहोस्
प्रतिक्रिया
पठाउनुहोस्