वन कार्यालयद्वारा गाँउपालिकालाई क्षेत्राधिकार मिचेको आरोप 

कान्तिपुर संवाददाता

धादिङ — जिल्ला वन कार्यालयले तस्करबाट बरामद काठ गाउँपालिकाले लुकाएको आरोप लगाएको छ । 

धादिङकाे सिद्धलेक गाउँपालिकामा बरामद अबैध काठ र तस्करीमा प्रयोग भएको जीप । तस्बिर : कान्तिपुर

आफ्नो क्षेत्राधिकार मिचेर सिद्धलेक गाउँपालिकाका प्रमुख प्रेमनाथ सिलवालले अवैध काठ आफैले राखेको जिल्ला वन कार्यालयको आरोप छ।

Citizen

गत चैत्र १६ गते सिद्धलेख–३ का वडाअध्यक्ष देवबहादुर मगरले मध्यरातमा तस्करी हुँदै गरेको दारकाठ र ढुवानीमा प्रयोग गरिएको सवारी साधन बरामद गरी गाउँपालिकालाई बुझाएका थिए। ‘करिब ३ साता बित्दा समेत उक्त काठ वन कार्यालयलाई बुझाएको छैन,’ जिल्ला वन अधिकृत ईमानाथ पौडेलले भने।काठ तस्करीको मुद्दा स्थानीय निकायले हेर्न नपाउने प्रावधान भए पनि गाँउपालिका प्रमुख सिलवालले काठ नियन्त्रणमा लिएर राखेको वन कार्यालयको भनाई छ।

बरामद काठ जिल्ला कार्यालयमा बुझाउन पत्रचार मार्फत ताकेता गरे पनि गाउँपालिकाले कुनै जवाफ नदिएको वन कार्यालयले जनाएको छ।

काठतस्करीमा संलग्नभनिएका सिद्धलेख–३ कमलाबारीमा फर्निचर उद्योग सञ्चालन गरेका निरकमल थापा फरार छन्। सरकारवादी मुद्दालाई गाउँपालिकाले वन कार्यालयलाई नबुझाएपछि तस्कर फरार भएको जिल्ला वन कार्यालय धादिङको आरोप छ। तस्करहरुले ना १ ज ५५९० नम्बरको बोलेरो जीपमा काठ तस्करी गर्दै आएका थिए।

गाउँपालिका प्रमुख सिलवालले स्थानीय निकाय सञ्चालन ऐन अनुसार आफुले काठ नियन्त्रणमा लिएको दाबी गरेका छन्। ‘मैले स्थानीय निकाय सञ्चालन ऐन अनुसार नै बरामद भएको काठ राखेको हुँ,’ उनले भने।

प्रकाशित : वैशाख ३, २०७५ १४:५७
प्रतिक्रिया
पठाउनुहोस्

सडक सुधार पछि पुनर्निर्माण तीव्र

राजेन्द्र मानन्धर

दोलखा — निर्माण सामाग्री ढुवानीका लागि सडक सुधार भएपछि दोलखाका दक्षिणी गाउँमा निजी आवास पुनर्निर्माण तीव्र भएकाे छ ।

दोलखा सदरमुकामबाट सेरावेशी हुँदै काटाकुटी जाने सडक सुधारपछि पुनर्निर्माण भैरहेका निजी घरहरु । तस्बिर: राजेन्द्र मानन्धर/कान्तिपुर

भूकम्पले थलिएका बस्तीमा सरकारी अनुदान लिए पनि निजी आवास निर्माण कछुवा गतिमा थियो। निर्माण सामग्री ढुवानी हुन नसक्दा अनुदान पाए पनि अधिकांश भूकम्प पीडितले घर बनाउन सकेका थिएनन्। ढिलासुस्तीमा सडक मुख्य कारण देखिएपछि मर्मतसुधार अभियान थालिएको हो।

सडकमा सुधार हुने वित्तिकै बालुवा, गिट्टी, सिमेन्ट र डण्डी गाडीमा ढुवानी गरेर घडेरी छेउमै पुर्‍याउन थालेकाले निजी आवास निर्माण तीव्र भएको शैलुङ गाउँपालिका—५ काटाकुटीका वडाअध्यक्ष किरण बस्नेतले बताए। बस्नेतका अनुसार सडक बर्षात्मा हिलाम्मे हुन्थ्यो। साघुरो, मोड नपुग्ने, ग्रेड नमिलेको तथा खाल्डाखुल्डीले उक्त सडकममा मालवाहक गाडी चल्न सकेका थिएनन्। ‘सडकमा ढुङ्गा विछ्याउने र मोड सुधारेर सहजै गाडी चल्ने बनाए पछि घर निर्माणले तीव्रता पाएको हो,’ वडाअध्यक्ष बस्नेतले भने।

दोलखाबाट राजधानीसँग जोडिएको लामोसाँघु–जिरी सडकबाहेक त्यससँग जोडिएका ग्रामीण सडकको अवस्था नाजुक छ। जिल्लाका दक्षिणी गाउँमा विस्तार गरिएका सडकहरु भूकम्पपछि उपभोक्ता समितिको २० प्रतिशत श्रमदानले सुधार हुन थालेका हुन।

स्थानीयको माग अनुसार नेपाल ग्रामीण पुनर्निर्माण संस्थाले सडक सुधार गर्न नौ उपभोक्ता समितिलाई एक करोड १५ लाख दिने सम्झौता गरेको छ।दुधपोखरीमा १३, लाकुरीडाँडामा ११, मागापौवामा ७, बोचमा ६, काटाकुटीमा ७ र भुसाफेदामा ७ किलोमिटर सडक सुधारको काम भएको छ।

उक्त बस्तीहरुमा अहिले ९५ प्रतिशत निजी आवास निर्माण सकिने क्रममा छ। जम्बसिंह–दुधपोखरी ग्रामीण सडक उपभोक्ता समिति अध्यक्ष थीरबहादुर मोक्तानले निर्माण सामाग्री ढुवानी सहजताका लागि बाटो बनाउन गाउँलेहरु उत्साहपूर्वक श्रमदान गर्न तयार भैरहेको बताए।

प्रकाशित : वैशाख ३, २०७५ १४:३२
पूरा पढ्नुहोस्
प्रतिक्रिया
पठाउनुहोस्