स्थानीय तह : ६५ प्रतिशत योजना पूरा

जिल्लामा उपमहानगर, नगर र ८ गाउँपालिका गरी १० स्थानीय तह छन् । जिल्ला समन्वय समिति मकवानपुरले गरेको जिल्लासभामा १० वटै तहका प्रमुख र मुख्य प्रशासकीय अधिकृतले प्रगति विवरण प्रस्तुत गरेका थिए ।

मकवानपुरको उत्तरी क्षेत्रको थाहा नगरपालिकाले उक्त अवधिमा ३ सय ४० योजनामध्ये २ सय ४ वटा सम्पन्न गरिसकेको छ । बाँकी योजना निर्माणाधीन रहेको नपाका मेयर लवशेर विष्टले बताए । उनले भने, ‘ती योजना पनि तोकिएकै समयमा सम्पन्न हुन्छन् ।’

जिल्ला समन्वय समिति मकवानपुरले आयोजना गरेको कार्यक्रमा मुख्यमन्त्री डोरमणि पौडेलले थाहा नगरपालिकाको कामको खुलेर प्रशंसा गरे । पौडेलले मकवानपुरका १० वटै स्थानीय तहका जनप्रतिनिधिले राम्रो काम गरेको जनाउँदै थाहा नगरपालिका उत्कृष्ट भएको बताए । थाहा नगरपालिकाले मकवानपुरमा नै पहिलो पटक वडाबाट एकीकृत कर तिर्न सकिने तथा अभिलेख रहने अनलाइन प्रणाली सुरु गरेको छ ।

त्यसैगरी, अनलाइनबाटै व्यक्तिगत घटना दर्ताको व्यवस्थाका साथै ई–हाजिरी तथा सीसीटीभी पनि जडान गरिएको छ । १ सय ९२ वर्गकिलोमिटरमा फैलिएको थाहाले जनशक्तिको अभावका कारण नगरवासीलाई छिटोछरितो सेवा पुर्‍याउन बिहान ९ बजेदेखि नै कार्यालय सञ्चालन गर्दै आएको छ । नगरवासीलाई प्राथमिक स्वास्थ्य केन्द्रबाट नि:शुल्क ल्याब सेवा प्रदान गर्दै आएको छ ।

देशभर एलजीसीडीपीको सहयोगमा कार्यरत सामाजिक परिचालकको सम्झौता भंग गर्दा थाहाले सामाजिक परिचालकले खाइपाई आएको तलबमा ३ हजार थपेर सेवा दिँदै आएको छ । स्थानीयवासीको सहयोगमा फोहोर संकलन सुरु गरेको छ ।

यसैगरी, हेटौंडा उपमहानगरले आफ्नो कुल आयोजनाका ६० प्रतिशत योजना सम्पन्न गरेको छ । नगरभित्रका मुख्य र सहायक सडकलाई आकर्षक बनाउन सडकको दायाँबायाँ फूलका बिरुवा रोपिएका छन् । उपमहानगर कार्यालयभित्र कर्मचारीले सामाजिक सञ्जाल चलाउन नपाउने तथा ई–हाजिरीको व्यवस्थासमेत गरिएको छ ।

उपमहानगरले सबै वडाका बासिन्दालाई स्वच्छ खानेपानीको सुविधा र सडक पुर्‍याउने उद्देश्यले लिएको छ । उपमहानगरमा १९ वडा छन् । त्यसैगरी, गर्भवती महिलालाई स्वास्थ्य संस्थामा सुत्केरी हुन एम्बुलेन्स सेवा नि:शुल्क उपलब्ध गराइएको छ ।

प्रत्येक वडामा शारीरिक व्यायाम गर्न जिम हाउस स्थापना गर्न लागेको छ । यसैगरी बकैया गाउँपालिकाले ठिंगनस्थित पशुपालक कृषकहरूलाई खुवा बनाउन मेसिन उपलब्ध गराउन लागेको छ भने गाउँपालिकाका प्रत्येक वडामा सडक पुर्‍याउन लागेको छ । मनहरी र इन्द्रसरोवर गाउँपालिकाले भिलेज प्रोफाइल बनाएका छन् भने मनहरीले स्वास्थ्य संस्थामा सुत्केरी हुने महिलालाई १ हजार रुपैयाँ थप रकम दिनुको साथै कुरुवालाई समेत खानेबस्ने व्यवस्था गरेको छ ।

राक्सिराङ र कैलाश गाउँपालिका अत्यन्त दुर्गम भएकाले सडक निर्माण कार्यमा जोड दिएका छन् । मकवानपुर गढी, भीमफेदी र वागमती गाउँपालिकाले ऐन कानुन निर्माण गरी विकासलाई प्राथमिकता दिएका छन् । ‘मकवानपुरका १० वटै स्थानीय तहको विकास निर्माण लगायत अन्य कार्य सही बाटोमा छन्,’ समन्वय समितिका अध्यक्ष रघुनाथ खुलालले भने, ‘स्थानीय तहका जनप्रतिनिधिले विभिन्न समस्या र अवरोधका बीचमा पनि सकारात्मक ढंगले काम गरिरहेका छन् ।’

यहाँका स्थानीय तहका जनप्रतिनिधि स्वस्थ्य किसिमले आफू–आफूमा पनि प्रतिस्पर्धा गरिरहेको अवस्था रहेको खुलालले बताए । ‘संघीयताको जग नै स्थानीय तह भएकाले स्थानीय तहका जनप्रतिनिधि बढी जिम्मेवार र इमानदार भएर काम गर्नुपर्छ,’ मुख्यमन्त्री पौडेलले भने, ‘स्थानीय सरकार जनताले देख्ने र भेट्ने सरकार हो, यसका क्रियाकलापले नै संघीय लोकतान्त्रिक गणतान्त्रिक व्यवस्थाको महत्त्वलाई थप स्थापित गर्छ ।’

मकवानपुरको दुर्गमदेखि सुगम क्षेत्रका बासिन्दाले विगतको भन्दा अहिले सेवा सुविधा सहज ढंगले पाउन थालेको महसुस गरेका छन् । ‘पहिलाको भन्दा अहिले गाउँमा चुनाव भएपछि गाउँको विकास पनि देखिन थालेको छ, काम गर्न पनि सजिलो भएको छ,’ कैलाश गाउँपालिका– १० का सूर्यबहादुर ब्लोनले भने ।