लामाटारबाट बुढानिलकण्ठसम्म बस सुरू

कान्तिपुर संवाददाता

काठमाडौँ — महालक्ष्मी नगरपालिका– ९ लामाटारबाट काठमाडौंको बुढानिलकण्ठसम्म बस सेवा सञ्चालनमा आएको छ । ‘हामी सबैको यातायात’ ले बस सञ्चालनमा ल्याएको हो । 

ललितपुरको लामाटारस्थित पाटीचौरमा महालक्ष्मी नगरपालिकाका मेयर रामेश्वर श्रेष्ठ, महानगरीय प्रहरी वृत्त सातदोबाटोका प्रहरी नायब उपरीक्षक विनोद सिलवाललगायतले संयुक्त रुपमा बस सेवाको शुभारम्भ गरे ।

२७ सिटको टाटा कम्पनीको १३ वटा बसले सोमबारबाट पाटीचौर, धाराचौर, शंखादेवी, बिष्णुडोल, सिद्धिपुर, इमाडोल, ग्वार्को, सातदोबाटो, लगनखेल, रत्नपार्क, महाराजगञ्ज हुँदै बुढानिलकण्ठसम्म र फर्केर इमाडोलबाट आई टिकाथली, चाङ्गथली, लुभु, डाँडाथोकबाट पाटीचौर हुँदै धाराचौरबाट सिद्धिपुर निस्कनेगरी दायाँ र बाँया दुईतर्फी सवारी सञ्चालनमा ल्याएका छन् ।

उदघाटनमा बोल्दै महालक्ष्मी नगरपालिकाका मेयर रामेश्वर श्रेष्ठले यातायात सेवाको विकासका लागि आवश्यक सडक निर्माणमा आफू लागेको बताए । उनले नगरपालिकालाई अन्य नगरपालिकाहरूसँग जोड्ने गरी यातायात सञ्चालनमा ल्याउन चाहनेलाई प्रोत्साहित गरिने उल्लेख गरे ।

प्रकाशित : जेष्ठ २९, २०७५ २०:०२
प्रतिक्रिया
पठाउनुहोस्

तनहुँमा प्रहरी र विद्यार्थीबीच झडप

प्रताप रानामगर

दमौली — पेट्रोलियम पदार्थको मुल्य वृद्धि र बालकृष्ण ढुंगेलको रिहाईको विरुद्धमा नेविसंघ तनहुँले मंगलबार साँझ दमौलीमा मसाल जुलुश निकालेको छ ।

नेपाली कांग्रेस पार्टी कार्यालय तनहुँबाट निस्केको मशाल जुलुश सफा सडक हुर्दै मेनचोकमा पुगी कोणसभा गर्ने क्रममा दोहोरो झडप भएको छ ।

मेनचोकमा प्रधानमन्त्री केपी ओली विरुद्ध नाराबाजी गर्ने क्रममा प्रहरी र विद्यार्थीबीच झडप हुँदा नेविसंघ तनहुँका जिल्ला अध्यक्ष चुडामणि खनाल, सचिव विमल गिरी, क्षेत्रिय सभापति समुन थापामगर र पूर्व केन्द्रिय सदस्य लक्ष्मीभत्त खनाल घाइते भएको नेविसंघ प्रवक्ता हरि खनालले बताए ।
दुवै पक्षबीच झडप हुँदा दमौली बजार केही तनावग्रस्त हुन पुगेको थियो ।मशाल जुलुश पछि प्रधानमन्त्री ओलीको पुत्ला समेत दहन गरेको छ ।

पेट्रोलियम पदार्थ मुल्य वृद्धि फिर्ता लिनुपर्ने, बलात्कारको आरोप लागेका घिरिङ्ग गाउँपालिका वडा नम्वर ४ वडा अध्यक्ष झक बहादुर कुमाल र वडा सदस्य शक्ति थापालाई पक्राउ नगरेको भन्र्दै नेविसंघले विरोध स्वरुप मशाल जुलुश र प्रधानमन्त्री ओलीको पुत्ला दहन गरेको नेविसंघले जनाएको छ ।

यता प्रहरीले भने झडपमा कुनै पनि विद्यार्थी घाइते नभएको बताएको छ । प्रहरीले मशाल जुलुश खोस्न खोज्दा सामान्य धकेला धकेल भएको प्रहरी उपरिक्षक सिद्धीविक्रम शाहले बताए ।

आन्दोलन दबाउन प्रहरीले लाठी चार्ज गरेको नेविसंघका जिल्ला अध्यक्ष चुडामणि खनालले आरोप लगाए ।

प्रकाशित : जेष्ठ २९, २०७५ १९:५७
पूरा पढ्नुहोस्
प्रतिक्रिया
पठाउनुहोस्