प्रदेशसभा बैठक साउन २८ मा

कान्तिपुर संवाददाता

हेटौंडा — साउन ४ देखि स्थगित प्रदेश ३ को बैठक साउन २८ गते सोमबार बस्ने भएको छ । बैठक कार्यसूची तय गर्न आइतबार कार्यव्यवस्था परामर्श समितिको बैठक बोलाइएको समिति सदस्य सांसद छिरिङदोर्जे लामाले जानकारी दिए ।

आफ्ना माग पूरा नभए संसद् चल्न नदिने प्रमुख विपक्षी कांग्रेसको अडानका कारण बैठक स्थगित भएको थियो । सभामुख र उपसभामुखको विषयमा प्रतिनिधिसभामा सहमति भएपछि प्रदेशसभा चलाउन सत्तापक्ष र प्रतिपक्ष सहमत भए पनि वर्षा र पहिरोका कारण हेटौंडा आउजाउमा असहज भएको र विधेयकहरू पनि तयार हुँदै गरेकोले बैठक केही पर सारिएको हो ।

यसैबीच, प्रदेशसभा सचिवालयमा तीन विधेयक दर्ता भएका छन् । कानुन अधिकृत विनोद अमात्यका अनुसार, प्रदेश दुग्ध विकास बोर्डको स्थापना र व्यवस्थापन गर्न बनेको विधेयक, प्रदेशसभा सचिवालयको व्यवस्थापन गर्न बनेको विधेयक र प्रदेश प्रशासनिक कार्यविधि (नियमित) गर्ने सम्बन्धमा व्यवस्था गर्न बनेको विधेयक सचिवालयमा दर्ता भएको छ । ‘प्रदेशसभाका पदाधिकारी तथा सदस्यको पारिश्रमिक र सुविधा सम्बन्धमा व्यवस्था गर्न बनेको विधेयक’, ‘मुख्यमन्त्री र मन्त्रीहरूको पारिश्रमिक तथा सुुविधा सम्बन्धमा व्यवस्था गर्न बनेको विधेयक’ र मुख्य न्यायाधिवक्ताको काम, कर्तव्य र अधिकार तथा सेवाको सर्त सम्बन्धमा व्यवस्था गर्न बनेको विधेयकमाथि पनि दफावार छलफल प्रतिवेदन तयार भए पनि सभामा प्रस्तुत हुन सकेको छैन ।

Yamaha

दुई साताअघि साउन ३ गते बसेको प्रदेशसभा बैठकमा प्रदेश राजधानी सम्भाव्यता अध्ययन विशेष समितिको प्रतिवेदन पेस हुने कार्यसूची थियो । बैठकमा ‘मुख्यमन्त्री र मन्त्रीहरूको पारिश्रमिक तथा सुुविधासम्बन्धमा व्यवस्था गर्न बनेको विधेयक’ मा परेका संशोधनसहितको प्रतिवेदन प्रस्तुत गर्ने कार्यसूची भए पनि छलफल हुन सकेन । प्रदेश प्रमुखबाट प्रमाणीकरण भएका आर्थिक विधेयक, विनियोजन विधेयक र कर तथा गैरराजस्व लगाउने तथा उठाउने सम्बन्धमा व्यवस्था गर्न बनेको विधेयकबारे सभालाई जानकारी गराउने कार्यसूची भए पनि अवरोधका कारण त्यो पनि हुन सकेको थिएन ।

प्रकाशित : श्रावण २४, २०७५ ०८:०८
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

टहरामाथि नै पहिरो

भूकम्पपीडित सधैं त्रासको बास
अनिश तिवारी

सिन्धुपाल्चोक — बल्लतल्ल बनाएको टहरा पहिरोले पुरेपछि त्रिपुरासुन्दरी गाउँपालिका घोर्थली गैह्राबारीका कसाइ गुरुङ अब कहाँ जाने भन्ने अन्योलमा छन् । ऋण गरेर हालेको टहरासहित भएको भूभाग भास्सिएपछि गुरुङका सबै खुसी खोसिएको छ ।

अविरल वर्षाका कारण पहिरोको जोखिममा परेको सिन्धुपाल्चोकको जुगल गाउँपालिका बराम्ची चनौटेस्थित भूकम्पपीडितको बस्ती । तस्बिर : अनिश । कान्तिपुर

‘खै अब कहाँ जाने हो, आफ्नो बस्ने ठाउँ नै पहिरोले पुर्‍यो,’ उनले भन्छन्, ‘छिमेकीको जग्गामा आश्रय लिएर कतिन्जेल बाँचिएला र ?’ साता दिनदेखि अलिअलि गरेर भास्सिरहेको पहिरो बुधबार बेलुकीको वर्षाले त पूरै बगायो । अब उनीलगायत १२ परिवार बासकै समस्या परेका छन् । ‘ऋण खोजेर घर बनाउने सोच्दै थिएँ,’ उनले भने, ‘घर त काँ बन्नु, बस्ने टहरा नै बगायो ।’ पिस्करको थामीटोल, मूलाटोल, खडकाटोललगायतका बस्ती पहिरोको अति जोखिममा परेका छन् । गैह्रीबारीका बाँकी ८ परिवार पनि डरैडरमा रात बिताइरहेका छन् ।

आफ्नो बस्ती नै पहिरोको जोखिममा परेपछि सुनकोसी गाउँपालिका कालिकागाउँका ३० र थुम्पाखरका १७ परिवारको बिजोग भएको सुनकोसी गाउँपालिका उपप्रमुख लक्ष्मी पौडेलले बताइन् । ‘यहाँका अधिकांश भूकम्पपीडितले टहरै ढालेको छ,’ उनले भनिन्, ‘कतिपयका बगेका छन्, बस्तीपिच्छै भास्सिएर पहिरो जान थालेको छ ।’ केही भूकम्पपीडित सुरक्षित स्थान खोजेर गए पनि अन्यत्र जाने ठाउँ नभएका धेरै पहिरो पन्छाएर बसेका छन् ।

जिल्लाको दुर्गम भेगदेखि सीमावर्ती क्षेत्रसम्मका सडक, पुलदेखि बस्ती पहिरोले धरापमा पार्दै लगेको प्रहरीले जनाएको छ । वर्षाले गर्दा भूभाग भासिँदा मेलम्ची नगरपालिका ४ खनालथोकका १२ घर उच्च जोखिममा छन् । बस्तीको तलमाथि नै सडक खनिएकाले पहिरो लागेको कारणले त्यहाँको पूरै गाउँ जोखिममा परेको छ । जुगल गाउँपालिकाको बराम्चीस्थत चनौटेमा निर्माणाधीन विद्यालय र बस्तीमा खसेको पहिरोले स्थानीय त्रासमै बसिरहेका छन् ।

चिनियाँ कम्पनीले बनाइरहेको रत्नराज्य मावि भवन माथिको ढिस्को पानीसँगै बग्न थालेपछि त्रास फैलिएको बराम्चीका वडाध्यक्ष सनत अधिकारी बताए । ‘बुधबारदेखि झनै पहिरो बढदै गएको छ,’ उनले भने, ‘यस्तै हो भने बस्ती तसनहस बनाउनेछ र ठूलो क्षति हुने सम्भावना देखिन्छ ।’

पूर्व तातोपानीदेखि पश्चिम हेलम्बुसम्म पहिरोले तहसनहस बनाएपछि यस क्षेत्रमा त्रासमय वातावरण बनेको छ । सडक, पुलदेखि विभिन्न भौतिक संरचनाका साथै सयाैं बस्ती पहिरोको उच्च जोखिममा छन् । ‘वर्षातका कारण जिल्लाभर पहिरो खसेको देखिन्छ, यति घर जोखिममा छन् भनेर यकिन गर्नै सकिने अवस्था छैन,’ जिल्ला प्रहरी प्रमुख विमलराज कर्णेलले भने, ‘पहिरोले क्षतिग्रस्त स्थानमा उद्धार गर्न प्रहरी पुगिसकेको छ ।’ पहिरोको जोखिम भएका अधिकांश स्थानबाट सुरक्षित क्षेत्रमा सरिसकेको र त्यही बसेकालाई सावधानी अपनाउन सुझाएको उनले सुनाए ।

प्रकाशित : श्रावण २४, २०७५ ०८:०८
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT