कारमा ढुङगा हान्ने दुई बन्दकर्ता पक्राउ 

हरिहरसिंह राठौर

धादिङ — काठमाडौंबाट  धादिङ सदरमुकाम आइरहेको निजी कारलाई जंगलबाट ढुङगा हान्ने दुई जना बन्दकर्ताहरुलाई जिल्ला प्रहरी कार्यालय धादिङले पक्राउ गरेको छ ।

पक्राउ पर्नेमा सिद्धलेक गाउँपालिका–५ बस्ने १५ वर्षीय रोशन श्रेष्ठ र चितवन घर भएका २२ वर्षीय ईश्वर पाण्डे रहेका छन् ।

Yamaha


पाण्डे नेपाल बन्द आयोजक विप्लव समूहका विद्यार्थी संगठनका जिल्ला अध्यक्ष पनि हुन् ।काठमाडौंबाट धादिङवेसीतर्फ आउँदै गरेको नीलकण्ठ आयल स्टोर्सका मालिक टंक श्रेष्ठको बा ६ च ४९९५ नम्बरको निजी कारमा मंगलबार दिउसो ढुङ्गा प्रहार गरेको प्रहरीले जनाएको छ ।

उक्त कारलाई मलेखुदेखि सदरमुकाम आउने कालुपाण्डे मार्गको मुक्तिनाथ मन्दिर जंगलबाट ढुंगा प्रहार गरिएको थियो ।

ढुङगा प्रहारबाट कारको सीसा फुटेको छ भने कारमा सवार श्रेष्ठकी श्रीमती पार्वती श्रेष्ठ घाईते भएकी छन् ।

नेत्र विक्रम चन्द (विप्लव) समूहले आह्वान गरेको बन्दका प्रभाव धादिङमा सामान्य परेको छ । छिटफुट रुपमा बजार र सवारी साधन बन्द रहेपनि शैक्षिक संस्था भने सूचारु भएको छ ।

प्रकाशित : श्रावण २९, २०७५ १७:२६
ADVERTISEMENT
ADVERTISEMENT
प्रतिक्रिया
पठाउनुहोस्

लमजुङमा सुतली बम निष्क्रिय

कान्तिपुर संवाददाता

लमजुङ — राइनास नगरपालिका ५ सिम्ले र कैनीटारमा मंगलबार बिहान फेला परेको दुई वटा सुतली बम सेनाले निष्क्रिय पारेको छ ।

उदिपुरस्थित सेनाको श्रीजंग गणबाट गएको बम डिस्पोजल टोलीले विस्फोटक पदार्थ निष्क्रिय पारेको प्रहरीले जनाएको छ । सेनाले सुतली बम भएको पुष्टि गरेको छ । साढे २ सय मिटर फरकमा भेटिएको दुई सुतली बम सेनाले डिस्पोज गरेको डीएसपी यादव ढकालले बताए । शंकास्पद बस्तु भेटिएपछि स्थानीय डराएका थिए । धमिलिकुवाबाट बोराङखोला जाने सडकको छेउमा शंकास्पद वस्तु देखेपछि स्थानीयले प्रहरीलाई खबर गरेका थिए । लगत्तै प्रहरीले सेनालाई खबर गरेपछि डिस्पोजको गरिएको हो ।

नेकपाले विस्फोटक पदार्थ राखेर नागरिकलाई त्रसित बनाउन खोजेको प्रमुख जिल्ला अधिकारी झंकनाथ ढकालले आरोप लगाए । आफ्ना नेता, कार्यकर्ता पक्राउको विरोधमा नेत्रविक्रम चन्द नेतृत्वको नेकपाले मंगलबार बन्दको आह्वान गरेको हो ।

प्रकाशित : श्रावण २९, २०७५ १७:१६
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT