कोदारी सडकमा पहिरै–पहिरो

अनिश तिवारी

डाक्लाङ (सिन्धुपाल्चोक) — कोदारी राजमार्गको विभिन्न स्थानमा पहिरो खस्न थालेपछि सीमाबासी पैदल हिँडेर जोखिमपूर्ण यात्रा गरिरहेका छन् । बाह्रबिसे बजारबाट तातोपानी जोड्ने पुल साँधीखोल्साले बगाएपछि बस पारि जान सकेका छैनन् । यहाँ अस्थायी ट्रयाक खोलेर सञ्चालनमा ल्याइए पनि दैनिक भइरहने वर्षाका कारण साँधीखोल्साले बगाउने गरेको छ ।

अविरल वर्षाले विभिन्न ठाउँमा पहिरो जाँदा बाह्रबिसेबाट तातोपानी पुग्ने सवारी, बस चल्न सकेको छैन । कोदारी राजमार्गको सिरिसे, चाकुभिर डाक्लाङ, लार्चा, नौ किलो, दसकिलो, पोप्लाङ हुँदै कोदारी, लिपिङ बजार जोड्ने सडक कटानमा परेको छ ।


Yamaha

‘बर्खाले सडकपिच्छै पहिरो गएको छ, खोर्सानीबारीमा अडिएका सवारी पनि पारि जान मान्दैनन्, ‘राजधानी जान डाक्लाङको पहिरो तर्दै गरेका पासाङ शेर्पाले भने । बिरामी, वृद्धवृद्धाले झनै सास्ती भोग्नुपरेको छ, हिँड्नै मुस्किल भएको उनले बताए । बाह्रबिसे तातोपानी खण्डको २६ किलोमिटरको डाक्लाङमा मर्मत गरिएको भाग पूरै भत्किएको छ । साँधीखोल्साले पुल बगाएपछि हिँडडुलमा झनै सास्ती भएको उनले सुनाए ।


‘यहाँको सडक कोसीको कटान र पहिरोले खाइहाल्यो, सडक बन्न कति समय लाग्ने हो, सधैं यसरी कतिन्जेल हिँड्नु,’ फुल्पिङकट्टी झिर्पु हिन्दीकी सानुकान्छी तामाङले भनिन् । नौकिलोस्थित सडक झन्डै सय मिटर भासिएको छ । भोटेकोसी जलविद्युत्ले सडक पुनर्निर्माण काम गरिरहे पनि अझै सकिएको छैन । जमिन जताततै फाटेर झर्न थालेपछि पुनर्निर्माणले तीव्रता पाउन नसकेको हो । पोप्लाङ सडकको पूरा भाग लार्चा खोलाले बगाएपछि सीमा बजारसँग सम्पर्क टुटेको छ । ‘नौकिलो कटेपछि त नेटवर्क, बिजुली केही छैन, पैदलै हिँड्न पनि ज्यानको माया मार्नुपर्छ,’ उनले भनिन् ।


पोप्लाङ खण्ड खोलाले बगाएर बजारसँगको सम्पर्क पूर्णरूपमा टुटाएको छ । नौकिलोबाट चार घण्टा हिँडेपछि तातोपानी पुग्न सकसपूर्ण रहेको नयाँ बस्तीका रामचन्द्र घतानीले सुनाए । ‘लिपिङ, तातोपानी बजारअघिको मात्रै होइन, बजार छेवकै भूभाग पूरा भासिएको छ,’ उनले भने, ‘यस्तै तालले बगे बर्खाले भागभाग बनाउँछ ।’


बिरामी र स्थानीय घण्टौं पैदल हिँडेर बाह्रबिसे आउने गरेको भोटेकोसी गाउँपालिका प्रमुख राजकुमार पौडेल सुनाउँछन् । ‘सीमामा पहिरो खस्ने क्रम रोकिएको छैन,’ उनले भने । सुक्खा बन्दरगाह बनाइरहेको चिनियाँ कम्पनी सीआरसीसीले यो खण्डको सडक पुनर्निर्माण गर्ने जिम्मा लिएको उनले बताए ।


‘तर बर्खाभर यो काम अघि बढ्न दिएको छैन,’ उनले भने, ‘सडक अवरोधले बन्दरगाहको कामलाई समस्या भइरहेको छ ।’ भोटेकोसी बाढीले कटान पारेको बाह्रबिसे तातोपानी खण्ड २६ किलोमिटर चिनियाँ कम्पनी सीआरसीसीले मर्मत गरेको थियो । हाल चिनियाँ कम्पनीले गरेको कालोपत्रे पहिरो लागेका दर्जनौं स्थानमा बिग्रिसकेका छन् ।


त्यहाँबाट पारि जाने तातोपानी, लिस्तीकोट लगायतका गाउँ पुग्नेहरू घण्टौं हिँड्नुपर्ने मारमा परेका छन् । सीमास्थित सशस्त्र प्रहरी बलका डीएसपी कृष्णगोपाल तामाङका अनुसार सीमागाउँ तग्रिन सकेको छैन । सीमा जोड्ने तातोपानी बजार नै जोखिममा परेपछि तातोपानी क्षेत्र खण्डहर बन्दै गएको छ । ‘दैनिक यात्रामा ज्यान जोखिममा राखेर जानुपर्छ, कहाँ कुन दिन सडक भासिन्छ थाहा छैन,’ उनले भने, ‘उद्धारका लागि सशस्त्र टोली बाटो बाटोमा खटाइरहेका छौं ।’


प्रकाशित : भाद्र ६, २०७५ १०:२९
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

बाढीले बाह्रबिसे–ताताेपानी जोड्ने पुल बगायाे

बाह्रबिसे बजारबाट सीमाक्षेत्रसँग सम्पर्क टुट्यो
अनिश तिवारी

बाह्रबिसे (सिन्धुपाल्चोक) — शुक्रबार रातिको वर्षाले धकेलिएको पुलमा साँधीखोल्चा थुनिदाँ बाह्रबिसे–ताताेपानी जाेड्ने पुल बगाएकाे छ । शनिबार राति पुल बगाए पछि बाह्रबिसे देखि ताताेपानी सीमासितकाे सम्पर्क टुटेको छ । 

आइतबार बाह्रबिसे नगरपालिकाको बाह्रबिसे र खुर्सानीबजार जोड्ने पुल भीरकुना र कोसिनडाँडा हुँदै आउने साँधीखोल्साले क्षतिग्रस्त बनाएको थियो । पुलमा ठूला ढुंगा आए पछि खोला थुनिएर बजारमा पसेको थियो । बेलुकी १० बजेतिर पुल बगाएपछि सबैतिर भागभाग बनाएको स्थानीय राजेन्द्र श्रेष्ठले बताए ।

‘भीषण वर्षासगै साँधीखोल्सा थुनिएर बेलुकी ठूलो आवाज आएको थियो,’ आफ्नो पसलभित्रै लेदो र भल पसेपछि सफा गरिरहेका राजेन्द्र श्रेष्ठले भने, ‘त्यसपछि सडकमा खोला बग्यो अनि बगर बन्यो, डरले कतिपय झोलीतुम्बा कसेर भागे ।’ उनले बजारक्षेत्रभर लेदो पसेर नदी बनेपछि बजारभर हाहाकार मच्चिएको बताए । तीन इन्च उता सरेको पुलको स्लापसंगै लेदो सबै साँधीखोल्साले बगाएर भोटेकोसी छेउमा थुपारेको छ । जसले कोसी थुनिने सम्भावना बढेको स्थानीयको भनाई छ ।

भीरकुनाबाट झरेको पुरा पहिरो यहाँ आइसकेको छैन्, त्यसैले जोखिम झन् बढ्दै छ । बजारका अधिकांश पसलमा भित्र पानीको बहाव पसेर क्षति पुर्‍याएको स्थानीयले बताएका छन् । स्थानीय पसलभित्र पसेका हिलो पन्छाउन र हिलोमै फसेका सवारीसाधन निकाल्न व्यस्त छन् । साँधीखोल्सा वरीपरी रहेका झण्डै ६ घरमा अत्यधिक क्षति पुगेको छ । छेउका ४ घर उच्च जोखिममा छन् ।

सडकमा गिर्खा, बालुवा र हिलोले क्षतिग्रस्त बनाएपछि एक्जाभेटरबाट पन्छाउने प्रयास भइरहेको छ । नदि छेउको वरीपरीका संरचना तहसनहस बनाउन थाले लगत्तै भोटेकोशीको सतह बढेपछि स्थानीयमा त्रास फैलिएको प्रहरीले जनाएको छ ।

नगरक्षेत्रभर बाढी र पहिरोको त्रासले कोलाहल मच्चाउन थालेपछि प्रहरीलाई चौकन्ना बनाइएको इलाका प्रहरी बाह्रबिसे प्रहरी निरीक्षक यादव थापा क्षेत्रीले बताए । ‘बजारक्षेत्रमा यस्तो घटना घटेपछि सबैलाई सर्तक गराउने कार्यमा अग्रसर भएका छौ, सुरक्षा र उद्धारको लागि प्रहरी तयार छन् ,’ उनले भने । उनले भौतिक क्षतिको तंथ्याक संकलन भइरहेको बताए ।


प्रकाशित : भाद्र ३, २०७५ ०८:३२
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT